ប្រទេសអារ៉ាប៊ីសាអូឌីត ៖ អារ៉ាប៊ីសាអូឌីតបានបញ្ជាក់ថា ខ្លួនអាចនឹងបង្កើនទិន្នផលប្រេងឆៅនៅខែសីហា ក្នុងកម្រិតខ្ពស់មួយដែលមិនធ្លាប់មានពីមុខមក ព្រោះវាអាចផ្ដល់នូវសក្ដានុពលកាន់តែច្រើនដល់ប្រទេសអារ៉ាប់ក្នុងកិច្ចពិភាក្សាក្រៅផ្លូវការនៅខែកញ្ញា ស្តីពីការបង្កកផលិតកម្ម។ នេះបើយោងតាមសារព័ត៌មាន Reuters បានរាយការណ៍នៅថ្ងៃពុធ ដោយដកស្រង់ចេញពីប្រភពឯកសារឧស្សាហកម្ម ។
ប្រទេសអារ៉ាប៊ីសាអូឌីត ជាប្រទេសផលិតប្រេងធំបំផុតក្នុងចំណោមបណ្តាប្រទេសនាំចេញប្រេង ហៅកាត់ថា OPEC ដែលបានបូមប្រេងឆៅចំនួន១០,៦៧លានបារ៉ែលក្នុងមួយថ្ងៃកាលពីខែកក្កដា ដោយកើនឡើង១២ម៉ឺនបារ៉ែលក្នុងមួយថ្ងៃ បើធៀបនឹងខែមិថុនា ។ ក្រុមហ៊ុនប្រេងនៅប្រទេសអារ៉ាប៊ីសាអូឌីត ជាធម្មតា បង្កើនការផលិតប្រេងឆៅនៅរដូវក្តៅ ដោយសារមានតម្រូវការខ្ពស់ ។ ប៉ុន្តែអ្វីដែលខុសពីធម្មតានោះ គឺការផលិតបានកើនឡើងដល់អត្រាមួយខ្ពស់ រហូតខ្ពស់ជាងកម្រិតកំពូលនៅរដូវក្តៅមុនទៅទៀត ។
បន្ទាប់ពីធ្វើឲ្យទិន្នផលមានស្ថិរភាពនៅក្នុងឆមាសទី១ ក្រុមហ៊ុនប្រេងនៅអារ៉ាប៊ីសាអូឌីត បានចាប់ផ្តើមបូមប្រេងកាន់តែច្រើនចាប់ពីខែមិថុនា និងបង្កើនផលិតកម្មរបស់ខ្លួន ក្នុងគោលបំណងផលិតប្រេងឲ្យលើសប្រទេសកំពូលផលិតប្រេងរបស់ពិភពលោក គឺប្រទេសរុស្ស៊ី ដែលមិនមែនជាសមាជិករបស់ OPEC ។ ទិន្នផលកាន់តែខ្ពស់ នឹងផ្តល់សក្តានុពលកាន់តែច្រើនដល់អារ៉ាប៊ីសាអូឌីត សម្រាប់កិច្ចប្រជុំនៅខែកញ្ញា ខាងមុខ ។ នេះបើយោងតាមប្រភពព័ត៌មាន Reuters ។
តាមប្រភពមួយដែលមិនមែនជាសមាជិករបស់អង្គការ OPEC បានប្រាប់សារព័ត៌មាន Reuters ថា ក្រុមហ៊ុនប្រេងអារ៉ាប៊ីសាអូឌីតបានប្រាប់ទីផ្សារជាសម្ងាត់ថា ទិន្នផលអាចនឹងកើនឡើងនៅក្នុងខែសីហា ចាប់ពី១០,៨លានបារ៉ែល ដល់១០,៩លានបារ៉ែលក្នុងមួយថ្ងៃ ។
ប្រទេសអារ៉ាប៊ីសាអូឌីតពូកែក្នុងការធ្វើឲ្យតម្លៃប្រេងកើនឡើង ហើយកាលពីសប្តាហ៍មុន រដ្ឋមន្ត្រីក្រសួងប្រេង លោក Khalid Al- Falih បាននិយាយថា អារ៉ាប៊ីសាអូឌីតនឹងចាត់វិធានការដើម្បីជួយឲ្យមានតុល្យភាពទីផ្សារឡើងវិញ។ តម្លៃប្រេងបានកើនឡើង ហើយវិនិយោគិនប្រញាប់ប្រញាល់ស្វែងរកឱកាសរកប្រាក់ពាក់ព័ន្ធនឹងតម្លៃប្រេងនេះ ។
ប្រទេសអារ៉ាប៊ីសាអូឌីត នឹងក្លាយជាអ្នកចរចាចម្បងក្នុងកិច្ចពិភាក្សារឿងបង្កកផលិតកម្ម នៅខែកញ្ញា ខាងមុខ ។ ប្រទេសនេះបានចរចាឈ្នះក្នុងកិច្ចប្រជុំនៃទីក្រុងដូហា កាលពីខែមេសា ដែលកិច្ចប្រជុំនោះមានគោលបំណងដើម្បីឈានដល់កិច្ចព្រមព្រៀងមួយបន្ទាប់ពីបានទទូចថា កិច្ចព្រមព្រៀងណាមួយត្រូវតែរួមបញ្ចូលជាមួយប្រទេសអីុរ៉ង់ ដែលអីុរ៉ង់នឹងមិនយល់ព្រមឡើយ ដោយសារតែខ្លួនទើបធូរស្រាលពីការដាក់ទណ្ឌកម្មប្រេង ។
កិច្ចប្រជុំក្រៅផ្លូវការនៅខែកញ្ញា រវាងអង្គការ OPEC និងដៃគូមិនមែន OPEC ត្រូវបានគេរំពឹងថា នឹងមិនទទួលបានជោគជ័យអ្វីឡើយ ពាក់ព័ន្ធនឹងផ្នែកផលិតកម្មនេះ ។
អតីតប្រធានអង្គការ OPEC លោក Chakib Khelil បានរាយការណ៍ស្តីពីការកើនឡើងនៃទិន្នផលក្នុងប្រទេសអារ៉ាប់ ប្រាប់ទូរទស្សន៍ Bloomberg ថា ប្រទេសមហាអំណាចប្រេងជាសមាជិកអង្គការ OPEC ដូចជា ប្រទេសអារ៉ាប៊ីសាអូឌីត អីុរ៉ង់ និងអីុរ៉ាក់ ព្រមទាំងប្រទេសមិនមែនសមាជិកអង្គការ OPEC គឺប្រទេសរុស្ស៊ី អាចនឹងយល់ព្រមលើការបង្កកការផលិត ដោយសារតែពួកគេដណ្តើមបានភាគហ៊ុនទីផ្សារទាំងអស់រួចទៅហើយ ។
តម្លៃប្រេងបានកើនឡើងភ្លាមៗ បន្ទាប់ពីភ្នាក់ងាររដ្ឋបាលព័ត៌មានថាមពល ហៅកាត់ថា EIA ចេញផ្សាយរបាយការណ៍ប្រចាំសប្តាហ៍ ថា ការស្តុកប្រេងឆៅបានធ្លាក់ចុះកាលពីសប្ដាហ៍មុនចំនួន២,៥លានបារ៉ែល រហូតដល់ថ្ងៃទី១២ សីហា មានចំនួន៥២១.១លានបារ៉ែល ៕
ចែករំលែកព័តមាននេះ