ប្រជាពលរដ្ឋ៥៩នាក់ ដាក់ញត្តិសុំរកយុត្តិធម៌
ខេត្តស្វាយរៀង ៖ ប្រជាពលរដ្ឋរងគ្រោះ៥៩នាក់តំណាងឲ្យប្រជាពលរដ្ឋ១៣២គ្រួសារ មកពីភូមិចំនួន០៩ គឺភូមិព្រៃពោធិ ភូមិក្រសាំង ភូមិពង្រ ក្នុងឃុំធ្មា ភូមិហែកសំណាញ់ ភូមិភូមិតារោង
ខេត្តស្វាយរៀង ៖ ប្រជាពលរដ្ឋរងគ្រោះ៥៩នាក់តំណាងឲ្យប្រជាពលរដ្ឋ១៣២គ្រួសារ មកពីភូមិចំនួន០៩ គឺភូមិព្រៃពោធិ ភូមិក្រសាំង ភូមិពង្រ ក្នុងឃុំធ្មា ភូមិហែកសំណាញ់ ភូមិភូមិតារោង ភូមិត្រពាំងកណ្តាល ភូមិអង្គពក ភូមិម៉ឺនជយ័ ភូមិវាល ឃុំម៉ឺនជយ័ ស្រុករំដួល បាននាំគ្នាមកសាលាខេត្តស្វាយរៀងដើម្បីដាក់ញត្តិជូនលោកអភិបាលខេត្តសុំបទអន្តរាគមន៍ រកយុត្តិធម៌ទាមទារប្រាក់សំណងស្តីពី ផលប៉ះពាល់ដីធ្លី ផ្ទះសម្បែង ផលដំណាំ ដើមឈើហូបផ្លែ ដោយការអភិវឌ្ឍន៍ស្តារ និងសាងសង់ប្រឡាយមេកីចក ធ្វើឲ្យពួកគាត់រងគ្រោះគ្មានផ្ទះស្នាក់នៅ៤៩គ្រួសារ និង៩គ្រួសារកំពុងប្រឈមការរុះរើដោយបង្ខំពីក្រុមហ៊ុន អ៊ឹងស៊ីមស៊ាគ្រុប សាងសង់ប្រឡាយកីចកនេះ។
ប្រជាពលរដ្ឋមកដាក់ញត្តិនេះកើតឡើងកាលពីវេលាម៉ោង២និង០០រសៀល ថ្ងៃទី២៣ ខែសីហា ២០១៦ នៅមុខសាលាខេត្តស្វាយរៀង។ បើតាមស្ត្រីឈ្មោះ ម៉ែនថាវី អាយុ៤៤ឆ្នាំ មុខរបរជាគ្រូបង្រៀន មានទីលំនៅភូមិហែកសំណាញ់ ឃុំម៉ឺនជយ័ បានឲ្យដឹងថា ប្រជាពលរដ្ឋរងផលប៉ះពាល់ពីការសាងសង់ប្រឡាយកីចកនេះប៉ះពាល់១៣២គ្រួសារ ប៉ះពាល់ធ្ងន់ធ្ងរ៥៩គ្រួសារ (៤៩គ្រួសារត្រូវរុះរើផ្ទះដោយបង្ខំ និង៩គ្រួសារទៀតកំពុងប្រឈមការដេញឲ្យរុះរើបង្ខំ)។ ហើយការទទួលរងផល់ប៉ះពាល់នេះគឺ បាត់បង់ផ្ទះសម្បែង ដីលំនៅឋាន ដីស្រែ អណ្តូងទឹក ខឿនដាក់ធាតុ ថ្នូរខ្មោច និងដំណាំ ដើមឈើហូបផ្លែ បណ្តាលមកពីក្រុមហ៊ុនអ៊ឹងស៊ីមស៊ា គ្រុប ដេញឲ្យរុះរើដោយបង្ខំ និងឲ្យចាកចេញដោយគ្មានសំណង។
អ្នកស្រី សូ សារ៉ន អាយុ៥៥ឆ្នាំ នៅភូមិហែកសំណាញ់ ឃុំម៉ឺនជយ័ បានឲ្យដឹងទៀតថា ពួកគាត់រស់នៅលើទីតាំងមានទំនាស់នេះតាំងពីដូនតាមកហើយ នៅក្នុងរបបប៉ុលពតក៏រស់នៅទីនេះដែររហូតបច្ចុប្បន្ន។ ស្រាប់តែនៅខែវិច្ឆិកា ឆ្នាំ២០១៣ រដ្ឋមន្ត្រីក្រសួងធនធានទឹក និងឧតុនិយម បានចេញលិខិតលេខ២៥៩០ ធទឧ ចុះថ្ងៃទី០១ វិច្ឆិកា ២០១៣ ជម្រាបមកលោកប្រធានមន្ទីរធនធានទឹក និងឧតុនិយមខេត្ត និងលិខិតលេខ២៥៩១ធទឧ ចុះថ្ងៃទី០១ វិច្ឆិកា ២០១៣ ជម្រាបជូនលោកអភិបាលខេត្តស្វាយរៀង ស្តីពីការជួសជុល និងស្តារឡើងវិញនូវប្រឡាយមេកីចក។
ប្រជាពលរដ្ឋយល់ថា គ្រាន់តែជាការជួសជុល និងស្តារឡើងវិញលើប្រឡាយចាស់សម័យប៉ុលពត ដែលមានទំហំទទឹងប្រមាណ២៦ម៉ែត្រប៉ុណ្ណោះក៏យល់ព្រម ដោយអាជ្ញាធរប្រកាស គោលនយោបាយរបស់រាជរដ្ឋាភិបាលអភិវឌ្ឍន៍ប្រពន្ធ័ធារាសាស្ត្រ ដោយស្តារប្រឡាយមេមួយខ្សែនេះ លាតសន្ធឹងចាប់ពីរភូមិកីចក ស្រុករមាសហែក កាត់តាមឃុំម៉ឺនជ័យ ឃុំធ្មា ស្រុករំដួល កាត់ស្រុកស្វាយទាប ស្រុកកំពង់រោទិ៍ ដល់ស្រុកចន្ទ្រា។
បច្ចុប្បន្នប្រឡាយមេកីចកនេះបានសាងសង់ពីភូមិកីចកមកដល់ឃុំធ្មាស្រុករំដួលប្រឡាយចាស់ទទឹង២៦ម៉ែត្រ ការអនុវត្តន៍ជាក់ស្តែងក្រុមហ៊ុនជីកប្រឡាយ និងលើថ្នល់អមប្រឡាយ ទទឹងទំហំដល់ទៅ៧០ម៉ែត្រ ធំជាងប្រឡាយចាស់ ដែលជាហេតុធ្វើឲ្យបះពាល់ដល់ដីស្រែចំនួន២៧៥,២៨០ហិកតា ដីលំនៅឋាន៦, ៨៤២៦ម៉ែត្រការ៉េ ផ្ទះសម្បែង ចំនួន៤៩ខ្នង ត្រូវរុះរើដោយបង្ខំនិងឲ្យចាកចេញពីលំនៅឋាននិងផ្ទះចំនួន០៩ខ្នងទៀត កំពុងប្រឈមដេញឲ្យរុះរើដោយបង្ខំ ប៉ះពាល់អណ្តូងទឹក បង្គន់ ខឿន ផ្នូរខ្មោច និងដើមឈើជាច្រើនទៀត។
ប្រជាពលរដ្ឋសំណូមពរដល់សម្តេចអគ្គមហាសេនាបតីតេជោហ៊ុនសែន មេត្តាជួយអនតរាគមន៍ដោះស្រាយរកយុត្តិធម៌ឲ្យប្រជាពលរដ្ឋ បានទទួលសំណងដោយអនុគ្រោះ។ ទាក់ទិនករណីនេះដែរ មន្ត្រីនគបាលបានឲ្យតំណាងប្រជាពលរដ្ឋរងគ្រោះ២នាក់យកញត្តិចូលជូបលោក ពេជ្រ សាវ៉ាន់ អភិបាលរងខេត្ត ក៏ប៉ុន្តែមិនទាន់ទទួលចម្លើយថាតើដោះស្រាយបែបណាទេ គ្រាន់តែទទួលញត្តិទុកហើយប្រាប់ថា លោកនឹងចុះពិនិត្យដោះស្រាយ៕
ចែករំលែកព័តមាននេះ