រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ កាលពីល្ងាចថ្ងៃទី២២ ខែសីហា បានចេញដីកាសម្រេចឃុំខ្លួនប្រធានសហជីពការងារកម្មករកម្ពុជាដើម្បីអភិវឌ្ឍន៍ដាក់ពន្ធនាគារ
រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ កាលពីល្ងាចថ្ងៃទី២២ ខែសីហា បានចេញដីកាសម្រេចឃុំខ្លួនប្រធានសហជីពការងារកម្មករកម្ពុជាដើម្បីអភិវឌ្ឍន៍ដាក់ពន្ធនាគារជាបណ្តោះអាសន្ន ក្រោមការចោទប្រកាន់ពីបទកំហែងយក តាមមាត្រា៣៦៣ និងមាត្រា៣៦៤ នៃក្រមព្រហ្មទណ្ឌ។ ជនជាប់សង្ស័យខាងលើនេះឈ្មោះ មុំ សុខមាន ភេទប្រុស អាយុ៣៥ ឆ្នាំមានទីលំនៅភូមិសំរោងចាស់ ឃុំអង្គពពេល ស្រុកគងពិសី ខេត្តកំពង់ស្ពឺ មុខរបរជាប្រធានសហជីពការងារកម្មករកម្ពុជាដើម្បីអភិវឌ្ឍន៍ នៃរោងចក្រ ដុងឌូ ថេកថាយ (ខេមបូឌា)ខូអិលធីឌី។
ទាក់ទិននឹងការឃុំខ្លួនប្រធានសហជីពខាងលើនេះ ត្រូវបានគេដឹងថា កាលពីវេលាម៉ោងប្រមាណ៦និង៥០នាទីព្រឹក ថ្ងៃទី២២ ខែសីហា កម្លាំងនគរបាលការិយាល័យ ព្រហ្មទណ្ឌកម្រិតស្រាលរាជធានីភ្នំពេញ ដឹកនាំដោយលោកវរៈសេនីយ៍ទោ ជីវ វិបុល អនុប្រធានការិយាល័យ បានយកដីកាបញ្ជាឲ្យចូលខ្លួនរបស់ស្ថាប័នអយ្យការអមសាលាដំបូងរាជធានីភ្នំពេញ ទៅនាំខ្លួនលោក មុំ សុខមាន នៅចំណុចស្ពានទឹកថ្លា សង្កាត់ក្រាំងពង្រ ខណ្ឌដង្កោ ដែលលោក មុំ សុខមាន កំពុងធ្វើដំណើរតាមផ្លូវសាធារណៈក្នុងគោលបំណងចូលមករាជធានីភ្នំពេញ។
ប្រភពព័ត៌មានបានឲ្យដឹងទៀតថា ក្រោយពីកម្លាំងសមត្ថកិច្ចដឹកនាំដោយលោក ជីវ វិបុល ឃាត់ខ្លួនហើយ ប្រធានសហជីពការងារកម្មករកម្ពុជាដើម្បីអភិវឌ្ឍន៍ ហៅកាត់ថា(CCNU)ត្រូវបាននាំទៅជូនតំណាងអយ្យការនៅព្រឹកថ្ងៃនោះដែរ។ សំណុំរឿងនេះស្ថិតនៅដៃលោក ងិន ពេជ្រ ព្រះរាជអាជ្ញារងអមសាលាដំបូងធ្វើការសាកសួរ និងក្រោយពីសាកសួរចប់សព្វគ្រប់ហើយតំណាងអយ្យការបានចោទប្រកាន់ឈ្មោះ មុំ សុខមាន ជាផ្លូវការពីបទកំហែងយក និងបានចាត់បញ្ជូនទៅចៅក្រមស៊ើបសួរ។
លុះរសៀលថ្ងៃដដែលនោះសំណុំរឿង បានធ្លាក់ដល់ដៃលោក គឹម រត្ន័ណារិន ចៅក្រមស៊ើបសួរសាលាដំបូង ដែលការសាកសួរបានបន្តរហូតដល់ពេលល្ងាច លោកចៅក្រមសម្រេចចេញដីកាឃុំខ្លួនប្រធានសហជីពរូបនោះដាក់ពន្ធនាគារជាបណ្តោះអាសន្ន។ ដើមចមបទល្មើសកំហែងយក ត្រូវបានលោក ថាន ថាវរៈ មេធាវីដើមបណ្តឹងបង្ហើបឲ្យដឹងថា ជាគោលការណ៍របស់រោងចក្រ ដុងឌូ ថេកថាយ (ខេមបូឌា) ខូអិលធីឌី មានរថយន្តដឹកកម្មករជាង១.៥០០នាក់ ទៅមកដើម្បីបម្រើការងាររោងចក្រដោយមិនគិតកម្រៃ (ម្នាក់៧ដុល្លារ)។
រោងចក្របានដំណើរការទៅតាមច្បាប់ការងាររបស់ក្រសួងការងារ ប៉ុន្តែមានពេលខ្លះរថយន្តដឹកកម្មករមិនគ្រប់គ្រាន់ បានធ្វើឲ្យឈ្មោះ មុំ សុខមាន ដើរញុះញង់កម្មករឲ្យចូលរួមធ្វើកូដកម្ម។ លោកមេធាវីបន្តថា ក្រោយកើតមានកូដកម្មខាងរោងចក្រក៏បានដោះស្រាយជូនកម្មកររួចរាល់ដែរ ឆ្លៀតពេលនោះឈ្មោះ មុំ សុខមាន បានសុំប្រាក់ពីថៅកែរោងចក្រយកទៅចាយវាយផ្ទាល់ខ្លួនម្តង២.០០០ ម្តង៣.០០០ដុល្លារអាមេរិក ដោយសំអាងហេតុថា ប្រពន្ធឈឺ កូនឈឺ ថៅកែរោងចក្រមានមនោសញ្ចេតនាជួយក៏ចេះតែឲ្យតាមការខ្វះខាត។
លុះពេលច្រើនលើកពេលខាងរោងចក្រក៏មានការធុញថប់ដែរពេលខ្លះឲ្យពេលខ្លះមិនឲ្យ បានជាឈ្មោះ មុំ សុខមាន ចាប់ផ្តើមគំរាមកំហែងញុះញង់កម្មករបន្តធ្វើកូដកម្មទៀត។ រឿងរាវកើតឡើងយ៉ាងដូច្នេះ ខាងរោងចក្រទ្រាំទ្រនឹងការគំរាមកំហែងលែងបាន ក៏សម្រេចដាក់ពាក្យបណ្តឹងទៅក្រសួងការងារ និងចូលទៅស្ថាប័នអយ្យការឲ្យចាត់ការតាមផ្លូវច្បាប់។ បណ្តឹងត្រូវបានក្រសួងការងារធ្វើលិខិតអញ្ជើញលោក មុំ សុខមាន ចូលទៅបំភ្លឺជាច្រើនលើកដែរ តែប្រធានសហជីពមួយនេះមិនបានចូល សូម្បីដីកាកោះរបស់សាលាដំបូងក៏ជនជាប់សង្ស័យមិនចូលខ្លួនដែរ បានជាសមត្ថកិច្ចទៅនាំខ្លួននោះ។
លោកមេធាវីបន្តថា ក្នុងដំណាក់ការចម្រូងចម្រះគ្នា រវាងលោក មុំ សុខមាន និងខាងរោងចក្រ សហព័ន្ធ សហជីពការងារកម្មករកម្ពុជាបានចេញសេចក្តីប្រកាសព័ត៌មានមួយដល់កម្មករ កម្មការនីឲ្យឈប់ធ្វើកូដកម្ម ហើយបានស្នើសុំឲ្យក្រុមប្រឹក្សាអាជ្ញាកណ្តាលជួយចាត់ការរឿងនេះ។ ក្រោយពីសាលាដំបូងរាជធានីភ្នំពេញ សម្រេច ចេញដីកាឃុំខ្លួនប្រធានសហជីពការងារកម្មករកម្ពុជាដើម្បីអភិវឌ្ឍន៍ ក៏មានលិខិតមួយច្បាប់ ដែលចុះហត្ថលេខាដោយលោក ងួន ហេ គោរពចូលទៅលោកស្រី ទេព គឹមវណ្ណារី ប្រធានក្រុមប្រឹក្សាសហជីពជាតិកម្ពុជា សំណើសុំអន្តរាគមន៍មានមានការដោះលែងលោក មុំ សុខមាន ដែលជាប្រធានសហជីពការងារកម្មករកម្ពុជាដើម្បីអភិវឌ្ឍន៍ នៃរោងចក្រ ដុងឌូ ថេកថាយ (ខេមបូឌា)ខូអិលធីឌី ឲ្យមានសេរីភាពវិញ ៕
ចែករំលែកព័តមាននេះ