ប៉ូលិសហ្វ៊ីលីពីនរាយការណ៍កាលពីថ្ងៃទី២២ សីហា ថា មនុស្សជិត១.៨០០នាក់ ហើយត្រូវសម្លាប់ក្នុងក្របខណ្ឌនៃយុទ្ធការប្រឆាំងគ្រឿងញៀននៅហ្វ៊ីលីពីនចាប់តាំងពីការជាប់ឆ្នោតពីខែឧសភាមក របស់ប្រធានាធិបតីលោក RODRIGO DUTERTE ។
ប្រមុខប៉ូលិសជាតិហ្វ៊ីលីពីនលោក RONALD DELAROSA ថ្លែងកាលពីថ្ងៃទី២២ សីហា ចំពោះគណៈកម្មការមួយរបស់ព្រឹទ្ធសភាថា អ្នករត់ពន្ធគ្រឿងញៀន និងអ្នកសេពគ្រឿងញៀន៧១២នាក់ បានត្រូវសម្លាប់ក្នុងប្រតិបត្តិការនានារបស់ប៉ូលិស ។ ម្យ៉ាងវិញទៀត ប៉ូលិសកំពុងស៊ើបអង្កេតលើការស្លាប់របស់មនុស្ស១.០៦៧នាក់ទៀត ដែលទាក់ទិននឹងសង្គ្រាមប្រឆាំងគ្រឿងញៀនដែរ ។ ទោះបីយ៉ាងណា លោកពុំបានផ្តល់ភាពលម្អិតឡើយ ។
ក្នុងសេចក្តីប្រកាសមួយចេញផ្សាយកាលពីថ្ងៃទី២២ សីហា ក្រសួងការបរទេសអាមេរិកនិយាយថា ខ្លួនមានការព្រួយបារម្ភចំពោះព័ត៌មាននានារៀបរាប់ពីការសម្លាប់មនុស្សក្រៅប្រព័ន្ធតុលាការ ហើយស្នើយ៉ាងម៉ឺងម៉ាត់ដល់រដ្ឋាភិបាលហ្វ៊ីលីពីនឱ្យគោរពបណ្តាកាតព្វកិច្ចខាងការគោរពសិទ្ធិមនុស្ស ។
ចំណែកអ្នកជំនាញការ២នាក់ខាងសិទ្ធិមនុស្សរបស់ អ.ស.ប កាលពីសប្តាហ៍មុនបានស្នើដល់ក្រុងម៉ានីលឱ្យបញ្ឈប់អំពើហិង្សាទាក់ទិននឹងការតស៊ូប្រឆាំងការរត់ពន្ធគ្រឿងញៀនដែលប្រធានាធិបតីលោក RODRIGO DUTERTE សន្យាលុបបំបាត់ចោលពេលធ្វើយុទ្ធនាការឃោសនាបោះឆ្នោត ។
លោក RODRIGO DUTERTE បានបដិសេធរាល់ការទទួលខុសត្រូវរបស់ប៉ូលិស ឬរបស់រដ្ឋាភិបាលចំពោះការកើនឡើងនៃអំពើហិង្សានេះហើយក្នុងសន្និសីទសារព័ត៌មានមួយនៅទីក្រុង DAVAO ជាក្រុងកំណើតរបស់លោកប្រធានាធិបតីរូបនេះបានវាយប្រហារយ៉ាងចាស់ដៃចំពោះពួកអ្នកជំនាញការសិទ្ធិមនុស្ស អ.ស.ប ដែលលោកថា ជាមនុស្សសំពិក ហើយលោករហូតដល់គំរាមដកហ្វ៊ីលីពីនចេញពី អ.ស.ប ទៀតផង ។
ទោះបីយ៉ាងណា អ្នកទទួលខុសត្រូវហ្វ៊ីលីពីនជាច្រើនរូបនាថ្ងៃទី២២ សីហា បាននិយាយសម្រាលពាក្យពេចន៍របស់ប្រធានាធិបតីដែលគំរាមកាលពីថ្ងៃទី២១ សីហា ពីការដកខ្លួនថយរបស់ហ្វ៊ីលីពីនចេញពី អ.ស.ប ។ អ្នកនាំពាក្យប្រធានាធិបតីលោក ERNESTO ABELLA អះអាងថា នេះជារបៀបនិយាយរបស់ប្រជាជាតិមានអធិបតេយ្យ ។ មែនហើយនេះពុំមែនជាសេចក្តីថ្លែងការណ៍ដើម្បីប្រកាសថា យើងចាកចេញដោយពិតប្រាកដពី អ.ស.ប ឡើយ ។
ចំណែកលោក PERFECTO YASAY រដ្ឋមន្ត្រីការបរទេសហ្វ៊ីលីពីននៅមុខសារព័ត៌មានវាយតម្លៃសេចក្តីថ្លែងការណ៍របស់ប្រធានាធិបតីថាគ្រាន់តែបង្ហាញពីការខកចិត្តយ៉ាងខ្លាំងប៉ុណ្ណោះ ហើយពុំមែនជាសេចក្តីថ្លែងការណ៍មួយដែលអាចជាការគំរាមដកខ្លួនថយចេញពី អ.ស.ប ឡើយ៕
ចែករំលែកព័តមាននេះ