រាជធានីភ្នំពេញ ៖ បើទោះមិនបានទទួលមេដាយពីការប្រកួតក្នុងព្រឹត្តិការណ៍អូឡាំពិករដូវក្ដៅឆ្នាំ២០១៦ នៅទីក្រុងរីយ៉ូ ប្រទេសប្រេស៊ីលក្ដី ក៏ក្រុមអត្តពលិកកម្ពុជានិងប្រតិភូ គ្រោងធ្វើសន្និសីទសារព័ត៌មានមួយ
រាជធានីភ្នំពេញ ៖ បើទោះមិនបានទទួលមេដាយពីការប្រកួតក្នុងព្រឹត្តិការណ៍អូឡាំពិករដូវក្ដៅឆ្នាំ២០១៦ នៅទីក្រុងរីយ៉ូ ប្រទេសប្រេស៊ីលក្ដី ក៏ក្រុមអត្តពលិកកម្ពុជានិងប្រតិភូ គ្រោងធ្វើសន្និសីទសារព័ត៌មានមួយ នៅពេលមកដល់មាតុប្រទេសវិញ ដើម្បីបង្ហាញពីមូលហេតុជាច្រើនដែលកីឡាករកីឡាការិនីកម្ពុជាមិនទទួលបានជោគជ័យ ។ ទោះជាយ៉ាងណា ពេលវេលានៃការធ្វើសន្និសីទសារព័ត៌មាននោះ មិនទាន់ត្រូវបានប្រកាសឱ្យដឹងនៅឡើយទេ ដោយខាងសហព័ន្ធបានត្រឹមតែបញ្ជាក់ថា អត្តពលិកនិងក្រុមប្រតិភូកម្ពុជានឹងត្រឡប់មកដល់កម្ពុជាវិញ នៅថ្ងៃទី២៥ ខែសីហា ។
ចាត់ទុកជាការសោកស្ដាយយ៉ាងខ្លាំង ដែលគ្រប់វិញ្ញាសានិងអត្តពលិកកម្ពុជាទាំងអស់មិនទទួលបានជោគជ័យក្នុងការដណ្ដើមយកមេដាយកម្រិតពិភពលោកពីការប្រកួតអូឡាំពិក ដែលទើបតែបញ្ចប់ថ្មីៗកន្លងទៅនេះ ។ ក្ដីសង្ឃឹមដ៏ធំរបស់កម្ពុជាបានបញ្ចប់ បន្ទាប់ពីកីឡាការិនី ស៊ន សៀវម៉ី ប្រកួតចាញ់ក្នុងវគ្គបើកឆាក ដែលធ្វើអ្នកគាំទ្រស្ទើរពេញមួយប្រទេសសោកស្ដាយ។ បើទោះបីកីឡាការិនីរូបនេះបង្ហូរទឹកភ្នែក និងបង្ហាញភាពក្ដុកក្ដួល ក៏ការបរាជ័យរបស់នាងនៅតែមានអ្នកខ្លះយល់ថា អាចបណ្ដាលមកពីនាងមើលស្រាលគូប្រកួត និងរាងញញើតញញើមកីឡាការិនីហុល្លង់នៅពេលប៉ះគ្នា ។ ម្នាក់ៗនិយាយថា សំអាងលើកម្ពស់និងទម្ងន់ជើងរបស់សៀវម៉ី បើនាងទាត់ផ្នែកខាងលើនោះ ការបរាជ័យក្រោមដៃកីឡាការិនីហុល្លង់នៅអូឡាំពិកអាចមិនកើតឡើងទេ តែមកពីនាងមិនហ៊ានប្រថុយនិងហាក់ចាញ់ច្រាបគូប្រកួត ទើបការប្រកួតរបស់នាងមិនសូវល្អ ។
យ៉ាងណាក៏ដោយ គេឃើញកីឡាការិនីហុល្លង់ ថ្វីដ្បិតតែទាបជាងសៀវម៉ីមែន ប៉ុន្តែគេក៏រហ័សដៃ និងពូកែគេចដែរ ទើបជើងខ្លាំងកម្ពុជាទៅមិនរួច ។ ងាកទៅវិញ្ញាសាផ្សេងៗរបស់កម្ពុជា ក៏បានត្រឹមតែបំបែកឯតទគ្គកម្មចាស់ប៉ុណ្ណោះ ដែលមានន័យថា ធ្វើបានលឿន និងល្អជាងការប្រកួតកាលពី៤ឆ្នាំមុននៅអូឡាំពិក ប៉ុន្តែលទ្ធផលគឺដូចមុន។
មានការរិះគន់ជាច្រើនពាក់ព័ន្ធនឹងការបញ្ជូនកីឡាករកីឡាការិនីដដែលៗឱ្យចេញទៅប្រកួតនៅអូឡាំពិក ។ បើទោះជាមន្ត្រីសហព័ន្ធអះអាងថា ហេតុផលដែលបញ្ជូនកីឡាករកីឡាការិនីដដែលៗឱ្យចេញទៅប្រកួត គឺដោយសារតែកីឡាករនិងកីឡាការិនីទាំងនោះ នៅពេលធ្វើការជម្រុះក្នុងស្រុកបានពិន្ទុល្អជាងគេ ក៏ក្រុមអ្នកគាំទ្រយល់ថា វាល្មមដល់ពេលប្ដូរកីឡាករកីឡាការិនីដែលប្រកួតយកបានតែបទពិសោធន៍ទាំងនោះ ដើម្បីទុកឱកាសឱ្យអ្នកថ្មីហើយ ។ យ៉ាងណាក៏ដោយ គេឃើញសមាសភាពទៅកាន់ព្រឹត្តិការណ៍អូឡាំពិកលើកនេះ មានការផ្លាស់ប្ដូរអ្នកចេញទៅប្រកួតចាញ់មុនៗមួយចំនួន បើទោះជាភាពជាក់ស្ដែងគឺអ្នកធ្លាប់ទៅប្រកួត ហើយទទួលបានតែបទពិសោធន៍ត្រឡប់វិញក៏នៅតែឃើញក្តី ។
ប៉ុន្តែចំពោះវិញ្ញាសាហែលទឹក កីឡាការិនីហែមថុន វិទិនី ក៏ធ្វើបានល្អគួរឲ្យសរសើរ ហើយបើងាកទៅម្ចាស់មេដាយមាសរាប់មិនអស់ក្នុងព្រឹត្តិការណ៍អន្តរជាតិកញ្ញា ចូវ សុធារ៉ា ក៏កាន់តែល្អផងដែរ បើទោះជានាងនៅតែមិនអាចទៅរួចក្នុងការប្រកួតប្រជែង ។ ការប្រកួតលើកចុងក្រោយរបស់កម្ពុជា គឺកីឡាករNeko បានទទួលត្រឹមតែចំណាត់ថ្នាក់ទី១៣៩ ក្នុងការរត់ប្រណាំងម៉ារ៉ាតុងល្អជាងគូប្រកួតផ្សេងដែលបានបោះបង់ទីលានកណ្ដាលទីចំនួន១៥នាក់ផ្សេងទៀត ។ កីឡាករកីឡាការិនី និងក្រុមប្រតិភូត្រូវបានប្រកាសថា នឹងត្រឡប់មកដល់កម្ពុជានៅល្ងាចថ្ងៃទី២៥ សីហា វេលាម៉ោង៤និង៥០នាទី តែមិនទាន់ច្បាស់ថានឹងមានពិធីទទួលស្វាគមន៍កម្រិតណានៅឡើយទេនៅអាកាសយានដ្ឋានអន្តរជាតិភ្នំពេញ ។
យោងតាមក្រុមមន្ត្រីអូឡាំពិកកម្ពុជាបានអះអាងថា ក្រុមប្រតិភូរបស់ក្រសួងអប់រំ និងស្ថាប័នពាក់ព័ន្ធនឹងអាចចូលរួម ប៉ុន្តែមិនច្បាស់ថាជាមន្ត្រីកម្រិតណានោះទេ បើទោះជាការប្រកួតរបស់កីឡាករកីឡាការិនីនៅក្នុងព្រឹត្តិការណ៍អូឡាំពិកមិនទទួលបានផ្លែផ្កាទាំងអស់គ្នា ។ ការទទួលនៅល្ងាចថ្ងៃនោះ នឹងមានភាគច្រើនជាបងប្អូនកីឡាករកីឡាការិនី ជាអ្នកគាំទ្រ និងជាមន្ត្រីនៅក្នុងសហព័ន្ធនីមួយៗតែម្ដង ដែលមានន័យថា ក៏នឹងមានភាពអុឹកធឹកផងដែរ។ ក្រោយការមកដល់នៅល្ងាចថ្ងៃនោះ វេទិកាសន្និសីទសារព័ត៌មាននឹងត្រូវប្រកាសឡើង បើទោះជានៅមិនទាន់ច្បាស់ពីពេលវេលាក្ដី ។ ក្នុងនោះការបើកវេទិកាបង្ហាញពីឧបសគ្គរបស់អត្តពលិកកម្ពុជាដែលមិនបានជោគជ័យ ក៏ត្រូវធ្វើឡើងដែរ បន្ទាប់ពីការមកដល់របស់អត្តពលិក និងក្រុមប្រតិភូទាំងអស់ ។
មន្ត្រីជាន់ខ្ពស់អូឡាំពិកកម្ពុជានៅតែអះអាងថា ការទទួលស្វាគមន៍អត្តពលិកនិងប្រតិភូពីព្រឹត្តិការណ៍អូឡាំពិកនៅតែត្រូវបានធ្វើ ដើម្បីជាការលើកទឹកចិត្ត ដោយសារតែភាពជាក់ស្ដែងគឺកីឡាករកីឡាការិនីទាំងនោះ ថ្វីដ្បិតតែចាញ់នៅលើសង្វៀនអូឡាំពិក ប៉ុន្តែក៏បានប្រឹងអស់ពីសមត្ថភាពដែលមានន័យថា ត្រូវតែស្វាគមន៍ដើម្បីលើកទឹកចិត្ត ។ វត្តមានអ្នកសារព័ត៌មាន ក៏នឹងបង្ហាញខ្លួនស្វាគមន៍ផងដែរ សម្រាប់ដំណើរមកដល់របស់អត្តពលិកនៅល្ងាចថ្ងៃទី២៥ ខែសីហា នោះ ។
គួររំឭកថា កម្ពុជាបានបញ្ជូនអត្តពលិកចំនួន៦រូបទៅចូលរួមក្នុងព្រឹត្តិការណ៍អូឡាំពិកឆ្នាំ២០១៦នេះ ដែលមានកីឡាការិនីតេក្វាន់ដូ ស៊ន សៀវម៉ី កីឡាការិនីហែលទឹក ហែមថុន វិទីនី និងកីឡាករ ពូ សុវិច្ចា កីឡាការិនីចំបាប់ ចូវ សុធារ៉ា កីឡាករអត្តពលកម្ម Neko និង កីឡាការិនី លី ណារី ៕
ចែករំលែកព័តមាននេះ