ប្រទេសថៃ ៖ ថៃកំពុងតែចូលរួមជាមួយប្រទេសវៀតណាម និងកម្ពុជា ក្នុងការដេញថ្លៃដើម្បីលក់អង្ករទៅឱ្យប្រទេសហ្វ៊ីលីពីន ដែលមានគម្រោងទិញអង្ករចំនួន២៥ម៉ឺនតោន នាថ្ងៃទី៣១ សីហា
ប្រទេសថៃ ៖ ថៃកំពុងតែចូលរួមជាមួយប្រទេសវៀតណាម និងកម្ពុជា ក្នុងការដេញថ្លៃដើម្បីលក់អង្ករទៅឱ្យប្រទេសហ្វ៊ីលីពីន ដែលមានគម្រោងទិញអង្ករចំនួន២៥ម៉ឺនតោន នាថ្ងៃទី៣១ សីហា ខាងមុខនេះ ។
លោកស្រី Duangporn Rodphaya អគ្គនាយិកានៃនាយកដ្ឋានពាណិជ្ជកម្មបរទេស បាននិយាយថា ការដេញថ្លៃអង្ករនាពេលខាងមុខនេះ នឹងធ្វើឡើងតាមរយៈរដ្ឋាភិបាល និងរដ្ឋាភិបាល ។
នេះជាផ្នែកមួយនៃគម្រោងទិញអង្កររបស់ប្រទេសហ្វ៊ីលីពីន ដែលជាអតិថិជនមួយក្នុងចំណោមអតិថិជនទិញអង្ករដ៏ធំជាងគេនៅលើពិភពលោក ។ គម្រោងនេះមានគោលដៅនាំចូលអង្ករចំនួន១លានតោនដើម្បីផ្គត់ផ្គង់ស្បៀងសម្រាប់ឆ្នាំក្រោយ ក្នុងពេលដែលតម្លៃអង្ករចុះថោក ។ ក្នុងនោះ៧៥ម៉ឺនតោននឹងត្រូវបានទិញតាមរយៈរដ្ឋាភិបាលនិងរដ្ឋា ភិបាល ចំណែក២៥ម៉ឺនតោនទៀត គឺនាំចូលតាមរយៈក្រុមហ៊ុនឯកជន ។
នៅក្រោមកិច្ចការជំនួញរវាងរដ្ឋាភិបាល និងរដ្ឋាភិបាល ប្រទេសហ្វ៊ីលីពីនតែងតែទិញអង្ករពីប្រទេសមួយក្នុងចំណោមប្រទេស៣ រួមមាន វៀតណាម ថៃ និងកម្ពុជា ។
គម្រោងនេះអាចទ្រទ្រង់តម្លៃអង្ករជាសកលដែលបានធ្លាក់ចុះ ដោយសារមូលហេតុការផ្លាស់ប្តូរតម្រូវការនៅតំបន់អាស៊ី និងអាហ្វ្រិក ធ្វើឲ្យមានការសម្រេចនូវតម្លៃយ៉ាងទាបក្នុងប្រទេសដែលផ្គត់ផ្គង់ធំៗដូចជា ប្រទេសវៀតណាម និងថៃ ។
ទោះជាយ៉ាងណា ការគ្រោងទុកនៃការទិញនេះ គឺនៅតែតិចជាងការនាំចូលកាលពីឆ្នាំ ២០១៥របស់ហ្វ៊ីលីពីន ដែលមានរហូតដល់១,៨លានតោន ។
លោកប្រធានាធិបតី Rodrigo Duterte ដែលបានឡើងកាន់តំណែងនៅថ្ងៃទី៣០ មិថុនា សន្យាថា នឹងធ្វើឲ្យប្រទេសហ្វ៊ីលីពីនមានអង្ករគ្រប់គ្រាន់ក្នុងអំឡុងពេល៦ឆ្នាំ ដែលលោកកាន់តំណែង ។
ហ្វ៊ីលីពីនបានប៉ាន់ប្រមាណពីផលិតកម្មស្រូវក្នុងប្រទេស គឺអាចស្មើនឹង១៨,២លានតោននៅឆ្នាំនេះ ខណៈបានបាត់បង់កសិផលជាច្រើនក្នុងឆមាសទី១ ដោយសារមានគ្រោះរាំងស្ងួត ។
លោកស្រី Duangporn បានទទួលស្គាល់ថា អង្កររបស់ថៃក្នុងពេលបច្ចុប្បន្ននេះ គឺមានតម្លៃខ្ពស់ជាងប្រទេសផ្សេងៗទៀតដែលកំពុងប្រកួតប្រជែង ។ ជាក់ស្តែង តម្លៃអង្ករនាំចេញរបស់ថៃ២៥% គឺស្មើនឹង៣៨៨ដុល្លារក្នុង១តោន ខណៈអង្ករវៀតណាមមានតម្លៃត្រឹមតែ៣៣៥ដុល្លារប៉ុណ្ណោះក្នុង១តោន ៕
ចែករំលែកព័តមាននេះ