ធ្វើតាមវិធីសាស្ត្រធម្មជាតិ4យ៉ាងទទួលបានធ្មេញស
ជាធម្មតា មនុស្សមួយចំនួនធំតែងតែចង់បានស្នាមញញឹមដែលបង្កប់ទៅដោយមន្តស្នេហ៍ ។ ដោយឡែកធ្មេញសលោងស្អាត គឺជាផ្នែកមួយដែលបង្កប់ក្នុងស្នាមញញឹមប្រកបទៅដោយភាពទាក់ទាញ
ជាធម្មតា មនុស្សមួយចំនួនធំតែងតែចង់បានស្នាមញញឹមដែលបង្កប់ទៅដោយមន្តស្នេហ៍ ។ ដោយឡែកធ្មេញសលោងស្អាត គឺជាផ្នែកមួយដែលបង្កប់ក្នុងស្នាមញញឹមប្រកបទៅដោយភាពទាក់ទាញ ។ ធ្វើឱ្យធ្មេញសចាំងមិនមែនជាកិច្ចការមួយលំបាកហើយមិនចាំបាច់ចំណាយអស់ថវិកាច្រើននោះឡើយ ។ ខាងក្រោមនេះជាវិធីសាស្ត្រធម្មជាតិមួយចំនួនដើម្បីធ្វើឱ្យធ្មេញរបស់អ្នកសភ្លឺ ៖
១-ប្រើម្សៅធ្វើនំ Baking Soda ៖ នេះគឺជាវិធីសាស្ត្រធ្វើឱ្យធ្មេញមានពណ៌សចាំងដោយអស់ថវិកាថោកបំផុតតែមានប្រសិទ្ធភាពខ្ពស់ ។ ជាទូទៅម្សៅធ្វើនំ Baking Soda ងាយនឹងរកបាននៅតាមហាងលក់ទំនិញនានា។ ចូរច្របាច់ថ្នាំដុសធ្មេញបន្តិចដាក់ក្នុងកូនចានតូចមួយរួចចាក់ម្សៅ Baking Soda មួយកូនស្លាបព្រាកាហ្វេចូល ។ កូរវាឱ្យសព្វហើយយកមកដុសសម្អាតធ្មេញ ។ ចូរអនុវត្តមុនពេលចូលសម្រាន្ត ប៉ុន្តែត្រូវខ្ពុរមាត់ឱ្យបានស្អាតក្រោយពីដុសរួចដ្បិតម្សៅ Baking Soda មិនមានរសជាតិឆ្ងាញ់ទេ ប្រសិនជាវាសល់នៅក្នុងមាត់ ។
២-ទទួលទានផ្លែស្ត្របឺរី ៖ ស្ត្របឺរីជាផ្លែឈើដែលមានរសជាតិឆ្ងាញ់ ហើយវាអាចដុសលាងធ្មេញបានល្អនៅពេលទទួលទានវា ។ គ្រាប់ដ៏តូចរបស់វាបានជួយដុសសម្អាតក្អែល ឬកំបោរពណ៌លឿងចេញពីធ្មេញរបស់អ្នក ។ អ្នកអាចធ្វើអនាម័យមាត់ធ្មេញតាមរយៈការទទួលទានផ្លែស្ត្របឺរីញឹកញាប់ពេញមួយថ្ងៃ ។
៣-ប្រើទុយយ៉ូបឺត ៖ មនុស្សស្ទើរទាំងអស់ចូលចិត្តផឹកកាហ្វេឬតែ ។ ទោះជាយ៉ាងណា នេះគឺជាទម្លាប់ដែលអាចបំផ្លាញធ្មេញ ។ ការផឹកតែ និងកាហ្វេនឹងធ្វើឱ្យធ្មេញមានពណ៌ស្រអាប់ ។ ដើម្បីចៀសវាងបញ្ហានេះ គេគួរបោះបង់ទម្លាប់នេះចោល ឬយ៉ាងហោចណាស់ប្រើទុយោបឺតជាជាងការប៉ះផ្ទាល់ ។
៤-ប្រើខ្សែកួតសម្អាត ៖ មនុស្សភាគច្រើនមិនបានគិតដល់ខ្សែសម្អាតធ្មេញប្រភេទនេះទេ។ ទោះជាយ៉ាងណា ការកួតសម្អាតដោយប្រើខ្សែគឺជាទម្លាប់មួយដែលអ្នកត្រូវតែចាប់យក ។ វាគឺជាវិធីមួយក្នុងចំណោមវិធីដ៏ល្អបំផុតមួយចំនួនក្នុងការសម្អាតកាកសំណល់អាហារដែលបានបរិភោគអស់ពេញមួយថ្ងៃ ។ ទោះបីជាអ្នកលាងជម្រះយ៉ាងម៉ត់ចត់ក៏ដោយ ប៉ុន្តែកម្ទេចកម្ទីម្ហូបអាហារដែលទទួលបាននៅតែជាប់ស្អិតនៅចន្លោះធ្មេញជាដដែល ។ ចូរអនុវត្តការដុសសម្អាតដោយខ្សែបែបនេះរៀងរាល់ល្ងាចក្រោយទទួលទានបាយរួច ៕
ចែករំលែកព័តមាននេះ