យោងតាមការសិក្សាបានបង្ហាញថា ការធាត់លើសទម្ងន់អាចកាត់បន្ថយអាយុប្រហែលមួយឆ្នាំ តែបើការធាត់នោះខ្លាំងពេកអាចប្រឈមនឹងការកាត់បន្ថយអាយុដល់ទៅ១០ឆ្នាំ។
យោងតាមការសិក្សាបានបង្ហាញថា ការធាត់លើសទម្ងន់អាចកាត់បន្ថយអាយុប្រហែលមួយឆ្នាំ តែបើការធាត់នោះខ្លាំងពេកអាចប្រឈមនឹងការកាត់បន្ថយអាយុដល់ទៅ១០ឆ្នាំ។
តាមការសិក្សាទ្រង់ទ្រាយធំមួយ បានរាយការណ៍កាលពីពេលកន្លងទៅថ្មីៗនេះ ដោយប្រើប្រាស់ទិន្នន័យពីវ័យជំទង់ជិតបួនលាននាក់ មកពីទ្វីបទាំងបួន ។ ការសិក្សា ដែលបានចុះផ្សាយក្នុងទស្សនាវដ្តីវេជ្ជសាស្ត្រ Lancet បានរកឃើញថា មនុស្សធាត់លើសទម្ងន់តិចតួចអាចបាត់បង់អាយុមួយឆ្នាំ និងអ្នកដែលធាត់មធ្យមកាត់បន្ថយអាយុប្រហែលបីឆ្នាំ ។
អ្នកនិពន្ធនាំមុខ លោក Emanuele Di ngelantonio ពីសាកលវិទ្យាល័យខេមប្រ៊ីដ បានប្រាប់ AFP ថា៖ «ការសិក្សានេះពិតជាបង្ហាញថា ការធាត់លើសទម្ងន់មានទំនាក់ទំនងជាមួយនឹងហានិភ័យនៃការស្លាប់មុនអាយុ» ។ លោកបានថ្លែងថា ហានិភ័យនៃជំងឺសរសៃឈាមបេះដូង ជំងឺដាច់សរសៃឈាមខួរក្បាល ជំងឺផ្លូវដង្ហើម និងជំងឺមហារីក ត្រូវបានកើនឡើងគ្រប់មុខសញ្ញា ។ លោក Di Angelantonio បានបន្ថែមថា មនុស្សធាត់ពេក អាចបាត់បង់អាយុប្រហែល១០ឆ្នាំនៃអាយុពិតរបស់គាត់ ប្រឈមនឹងការស្លាប់មុនអាយុ៧០ ។
ក្រុមអ្នកស្រាវជ្រាវអន្ដរជាតិដ៏ធំមួយ បានពិនិត្យយ៉ាងម៉ត់ចត់លើទិន្នន័យដែលប្រមូលបានជាង១០,៦លាននាក់នៅក្នុងការសិក្សាចំនួន ២៣៩ ដែលបានធ្វើឡើងនៅក្នុងឆ្នាំ១៩៧០ និងឆ្នាំ២០១៥ក្នុងនោះ ប្រទេសចំនួន៣២ ក្នុងអាមេរិកខាងជើង អឺរ៉ុប អូស្ត្រាលី នូវែលសេឡង់ និង ភាគខាងកើត រួមនឹងភាគខាងត្បូងអាស៊ី ត្រូវ បានចូលរួមប្រមូលទិន្នន័យនេះ ។ កិច្ចខិតខំប្រឹងប្រែងនៃការប្រមូលទិន្នន័យទាំងនេះជា ការប្រមូលសំណុំទិន្នន័យធំបំផុត ដែលមិនធ្លាប់មាន ដែលសិក្សាទៅលើការលើសទម្ងន់ និងការស្លាប់នៃបុគ្គលធាត់ ។
អ្នកស្រាវជ្រាវបានរកឃើញថា ហានិភ័យនៃការស្លាប់មុនអាយុ៧០ បានកើនឡើងពី១៩ ភាគរយចំពោះបុរសដែលមានទម្ងន់ធម្មតា ទៅ ២៩,៥ ភាគរយនៅក្នុងក្រុមដែលធាត់មធ្យម និងពី១១ភាគរយដល់១៤,៦ភាគរយសម្រាប់ស្ត្រី។
សេចក្តីថ្លែងការណ៍ពីទស្សនាវដ្តី Lancet បានបង្ហាញថា៖ «ការកើនឡើងដាច់ខាតសម្រាប់បុរសគឺមានចំនួន១០,៥ភាគរយគឺច្រើនជាងស្ត្រីបីដងដែលស្ត្រីមានត្រឹម៣,៦ភាគរយ»។
ការរកឃើញនេះ ផ្ទុយនឹងការស្រាវជ្រាវពីលើកមុនដែលបង្ហាញថា ការធាត់លើសទម្ងន់ អាចនឹងមិនមានហានិភ័យនៃការស្លាប់ទេ តែអាចជាអត្ថប្រយោជន៍នៃការរស់នៅសម្រាប់មនុស្សចាស់ទៅវិញ ៕
ចែករំលែកព័តមាននេះ