រាជធានីភ្នំពេញ ៖ តារាសម្តែងសារ៉ាយ សក្ខណា បានបើកសម្ពោធហាងកែសម្រស់ថ្មីមួយនៅម្តុំរង្វង់មូលទួលគោក រាជធានីភ្នំពេញ។ សក្ខណាបើកពង្រីកអាជីពថ្មីនេះបន្ទាប់ពីជោគជ័យលើមុខរបរហាង
រាជធានីភ្នំពេញ ៖ តារាសម្តែងសារ៉ាយ សក្ខណា បានបើកសម្ពោធហាងកែសម្រស់ថ្មីមួយនៅម្តុំរង្វង់មូលទួលគោក រាជធានីភ្នំពេញ។ សក្ខណាបើកពង្រីកអាជីពថ្មីនេះបន្ទាប់ពីជោគជ័យលើមុខរបរហាងស៊ុបជាច្រើនឆ្នាំកន្លងមក ។
ក្រុមគ្រួសារសារ៉ាយ សក្ខណា បានសម្រេចបើកសម្ពោធហាងកែសម្រស់នោះកាលពីព្រឹកថ្ងៃទី១៤ សីហា ឆ្នាំ២០១៦ ដោយមានភ្ញៀវជាច្រើនចូលរួមទាំងតារាល្បីទាំងផលិតករ និងអ្នកដឹកនាំរឿង ។ ហាងថ្មីរបស់សារ៉ាយ សក្ខណាមានឈ្មោះថា «ហ្សុីណូ» ។ ហាង «ហ្ស៊ីណូ»នេះដំណើរការនៅអាមេរិកជាច្រើនឆ្នាំ ហើយបានបើកសាខាថ្មីមួយទៀតនៅប្រទេសកម្ពុជា ។
បញ្ជាក់ប្រាប់អ្នកយកព័ត៌មានប្រកបដោយទឹកមុខរីករាយ សារ៉ាយ សក្ខណា ឱ្យដឹងថា ហាងថ្មីរបស់នាងទទួលថែរក្សាសម្រស់តាំងពីក្បាលដល់ចុងជើង ពិសេសផ្នែកដាំសក់ឡើង វិញ ។ វេជ្ជបណ្ឌិតមកពីអាមេរិកមានបទពិសោធន៍រាប់ឆ្នាំដែលមានជំនាញលើការរក្សាស្បែកមុខ និងផ្នែក ផ្សេងៗទៀត ។
ចំពោះខ្ទង់ចំណាយទុន សារ៉ាយ សក្ខណា សុំលាក់សិន តែអាចក្នុងកម្រិតមួយខ្ពស់ដោយឧបករណ៍ ផ្សេងៗនាំមកពីអាមេរិក ។ អាជីពនេះស្វាមីរបស់សារ៉ាយ សក្ខណា ជាអ្នកគិតគូរ និងមានមិត្តភក្តិនៅអាមេរិករបស់លោកជាវេជ្ជបណ្ឌិតជួយ ។ ប្រសិនបើដំណើរការល្អសក្ខណាមានគម្រោងបើកសាខាថ្មីទៀត ។ សក្ខណារំពឹងលើវេជ្ជបណ្ឌិតអាមេរិក ព្រោះធ្វើអ្វីច្បាស់លាស់និងមានបទពិសោធន៍រាប់ឆ្នាំ ។ ហាងនោះមានគម្រោងវះកាត់លើផ្នែកសម្រស់ដែរ ប្រសិនបើទៅថ្ងៃមុខដំណើរការល្អ ។
សារ៉ាយ សក្ខណា និងស្វាមីនឹងមកកម្ពុជាញឹកញាប់ ព្រោះជាមុខរបរថ្មីដែលមិនអាចចោលឆ្ងាយបាន ទោះបីបច្ចុប្បន្ននាង និងស្វាមីនៅអាមេរិកក្តី ។ សក្ខណាមកលេងស្រុកផង បានមើលមុខរបរជំនួញផង អាចឆ្លៀតពេលសម្តែងភាពយន្តផង ។
សារ៉ាយ សក្ខណា និយាយថា «តាំងពីដើមមកនាងខ្ញុំមិនដែលភ្លេចគុណសិល្បៈទេ នាងខ្ញុំទទួលស្គាល់ថាសិល្បៈពិតជាធ្វើឱ្យនាងខ្ញុំបានជួប អ្វីៗគ្រប់យ៉ាង ទាំងកិត្តិយសក៏ដូចបានជួបស្វាមីសាងអនាគតថ្មី ទើបមិនចោលឡើយ ។ ដូចនេះនាងខ្ញុំហាក់អន់ចិត្តដែរព្រោះកន្លងមកមានពាក្យមិនល្អទៅលើម្តាយនាងខ្ញុំថាជាអ្នកដឹកញីប្រស៊ីឈ្មោល នាំឱ្យខូចឈ្មោះរបស់ក្រុមគ្រួសារនាងខ្ញុំ ។ អ្នកណាៗក៏ដឹងថាម្តាយខ្ញុំគាត់ធ្វើអ្វីនោះមិនចង់មានភាពវែងឆ្ងាយឡើយ យើងចេះតែខំរកស៊ីទាំងអស់គ្នា អ្នកណាថាអ្វីជាការមើលឃើញ មិនអាចផ្គាប់ចិត្តបានត្រូវគ្រប់គ្នាឡើយ » ។
សារ៉ាយ សក្ខណា បន្ទាប់ពីទៅរស់នៅអាមេរិកបានចូលរួមសម្តែងភាពយន្តចំនួន២រឿង ហើយត្រៀមចាក់បញ្ចាំងនាពេល ឆាប់ៗខាងមុខ។ ទោះជាយ៉ាងណាក្តី សក្ខណាច្រានចោលការសម្តែងរឿងភាគព្រោះចំណាយពេលច្រើន ៕
ចែករំលែកព័តមាននេះ