ហេតុអ្វីរបៀបគិតរបស់មនុស្ស អាចធ្វើឱ្យសង្កមប្រែប្រួលបាន? កាលបើមនុស្សមានការគិតមួយ កាន់តែវិជ្ជមានអំពីសង្គមនោះហើយធ្វើអ្វីៗ ដើម្បីភាពវិជ្ជមាននោះ សង្គមនឹងកាន់តែប្រសើរ ។
នៅក្នុងសង្គមខ្មែរបច្ចុប្បន្ន មនុស្សម្នាច្រើនចង្អុលមុខដាក់គ្នាអំពីកំហុសឆ្គងនៅក្នុងសង្គម ។ មនុស្សជាច្រើន បាននាំគ្នាបន្ទោសដល់មន្ត្រី ដែលពុករលួយ ដែលបានធ្វើឱ្យសង្គមមានការរីកចម្រើនយឺតយ៉ាវ ។ ប៉ុន្តែទន្ទឹមគ្នានោះ យើងមិនបាននាំគ្នាគិតថា ម្នាក់ៗសុទ្ធតែអាចមានលទ្ធភាពនៃការបំបាត់អំពើពុករលួយ តាមរយ:ការអប់រំចិត្តរបស់មនុស្សម្នាក់ៗផ្ទាល់ ឱ្យរសនៅតាមរបៀបមួយដ៏ស្អាតស្អំឡើយ ។
នៅពេលដែលអំពើពុករលួយ ឬគ្រួសារនិយម ឬបក្សពួកនិយម ស្ថិតនៅក្នុងផលប្រយោជន៍នៃបុគ្គលិកណាមួយនោះ បុគ្គលិកនោះនឹងស្ងាត់មាត់ឈឹង ។ ប៉ុន្តែនៅពេលដែលអំពើពុករលួយ បក្សពួកនិយម ឬគ្រួសារនិយម បានធ្វើឱ្យប៉ះពាល់ដល់មនុស្សណាម្នាក់នោះ គេក៏ចាប់ផ្តើមស្រែកខឹង ។
មនុស្សម្នាជាច្រើនបានចង្អុលដល់គ្នាទៅវិញទៅមក អំពីអំពើអសកម្មក្នុងសង្គមដោយម្នាក់ៗ ភ្លេចគិតថា តើខ្លួនត្រូវអប់រំខ្លួនរបៀបណា ដើម្បីធ្វើឱ្យខ្លួនក្លាយជាពលរដ្ឋល្អម្នាក់ ដែលស្អាតស្អំ ដែលគោរពច្បាប់ និងដែលជួយដល់សង្គមជាតិ។ ការផ្លាស់ប្តូររបៀបគិតអំពីការបន្ទោសដាក់គ្នា អំពីបញ្ហាសង្គមនានា មកជាការគិតរៀបចំជីវិតមនុស្សម្នាក់ៗ ឱ្យកាន់តែមានចំណេះដឹង ឱ្យកាន់តែមានសីលធម៌ និងឱ្យកាន់តែសំបូរសប្បាយនឹងធ្វើឱ្យសង្គមប្រែប្រួលជាវិជ្ជមានច្រើនជាងការប្រើម្រាមដៃចង្អុលគ្នាទៅវិញទៅមក ។
នៅពេលដែលសង្គមកម្ពុជា សំបូរទៅដោយមនុស្សមានចំណេះដឹង មានសេចក្តីថ្លៃថ្នូរ និងមានសីលធម៌ហើយនោះ សង្គមកម្ពុជាទាំងមូលនឹងកាន់តែប្រសើរដោយស្វ័យប្រវត្តិ ។
វាសាមញ្ញណាស់ នៅក្នុងការធ្វើឱ្យសង្គមកែប្រែជាវិជ្ជមាន ។ មនុស្សនៅក្នុងសង្គមម្នាក់ៗ អាចរួមចំណែកបានដោយគ្រាន់តែឈប់ចំណាយពេលស្រែកឡូឡាអត់ប្រយោជន៍អំពីបញ្ហាសង្គម ហើយប្រឹងកសាងជីវិតមួយ ដែលពោរពេញដោយចំណេះ និងអប់រំចរិតឱ្យថ្លៃថ្នូរ និងឱ្យមានសីលធម៌ខ្ពស់ៗ ៕
ចែករំលែកព័តមាននេះ