បណ្តាវេជ្ជបណ្ឌិតតែងបានផ្តល់ដំបូន្មានជារឿយៗដល់មនុស្សទូទៅពីសារសំខាន់ក្នុងការពិនិត្យតាមដានសម្ពាធឈាមរបស់ខ្លួនខណៈវាជាកត្តាប្រឈមមួយក្នុងចំណោមកត្តាប្រឈមសំខាន់មួយចំនួនទៀតដែលអាចបង្កើនហានិភ័យកើតមានជំងឺបេះដូង ដាច់សរសៃឈាមខួរក្បាលនិងឈានទៅពិការភាព ។ លើពិភពលោក ក្នុងចំណោមមនុស្ស៣នាក់គឺមានម្នាក់ដែលរងផលប៉ះពាល់ពីជំងឺលើសឈាម ប៉ុន្តែមនុស្សជាច្រើនមិនបានដឹងថា ខ្លួនមានជំងឺនេះទេ ។ នេះពីព្រោះ ដំណើរលើសឈាមមិនបានបង្ហាញរោគសញ្ញាឱ្យបានច្បាស់លាស់ ។ ទោះជាយ៉ាងណា យោងតាមអ្នកជំនាញមកពីសាកលវិទ្យាល័យ Florida State University សហរដ្ឋអាមេរិកបានអះអាងថា គេអាចកាត់បន្ថយដំណើរលើសឈាមបានតាមរយៈការទទួលទានផ្លែឪឡឹកទុំ ។
តាមការពិសោធលើបុរស-ស្ត្រីដែលមានបញ្ហាលើសឈាមរយៈពេល១២សប្តាហ៍បង្ហាញថា បុគ្គលធាត់លើសទម្ងន់អាចកាត់បន្ថយសម្ពាធឈាមរបស់ពួកគេបានដោយការទទួលទានឪឡឹក ។ ប្រសិទ្ធភាពបែបនេះ ពីព្រោះឪឡឹកផ្ទុកទៅដោយអាមីណូអាស៊ីត L-citulline និង L-arginine ។
សាស្ត្រាចារ្យដឹកនាំការសិក្សា Arturo Figueroa បានថ្លែងថា សម្ពាធឈាមនៅក្នុងសរសៃឈាមអាក់ទែរសំខាន់និងក្នុងបេះដូង បានថយចុះក្រោយពីប្រើប្រាស់សារធាតុចម្រាញ់ពីឪឡឹក ។
ក្រៅពីសារធាតុសំខាន់ពីរខាងលើ ឪឡឹកក៏មានផ្ទុកសារធាតុសរសៃ លីកូប៉ែន វីតាមីន A និងប៉ូតាស្យូមផងដែរ ។ សារធាតុទាំងនេះសុទ្ធតែផ្តល់អត្ថប្រយោជន៍ជួយឱ្យសម្ពាធឈាមចុះទាប ៕
ចែករំលែកព័តមាននេះ