ខេត្តកណ្ដាល ៖ ណាហ្គាវើលបេះដូងសប្បុរស បានរៀបចំកម្មវិធីប្រឡងប្រកបពាក្យភាសាអង់គ្លេសនៅតាមបណ្តាខេត្ត តាំងពីជាងពីរឆ្នាំមុនដោយសង្ឃឹមថា សិស្សានុសិស្សនៅទីជនបទ នឹងអាចបង្កើនសមត្ថភាពភាសាអង់គ្លេស
ខេត្តកណ្ដាល ៖ ណាហ្គាវើលបេះដូងសប្បុរស បានរៀបចំកម្មវិធីប្រឡងប្រកបពាក្យភាសាអង់គ្លេសនៅតាមបណ្តាខេត្ត តាំងពីជាងពីរឆ្នាំមុនដោយសង្ឃឹមថា សិស្សានុសិស្សនៅទីជនបទ នឹងអាចបង្កើនសមត្ថភាពភាសាអង់គ្លេសរបស់ពួកគេតាមរយៈកម្មវិធីនេះ ។ បច្ចុប្បន្ន កម្មវិធីនេះពិតជាមានប្រសិទ្ធភាពក្នុងការសម្រេចបាននូវគោលបំណងនេះ។
លោក James Ma នាយកផ្នែកទំនាក់ទំនងបុគ្គលិក និងការងារសង្គមណាហ្គាវើល មានប្រសាសន៍ថា៖«តាមរយៈការចុះទស្សនកិច្ចជាច្រើនដងរបស់យើងនៅតាមខេត្តនានា យើងបានកត់សម្គាល់ឃើញថា មានភាពចាំបាច់ក្នុងការពង្រឹងសមត្ថភាពភាសាអង់គ្លេសដល់កុមារនៅតាមបណ្តាខេត្ត ។ ណាហ្គាវើលបេះដូងសប្បុរសក៏បានរៀបចំផែនការ និងផ្តួចផ្តើមបង្កើតកម្មវិធីប្រឡងប្រកបពាក្យភាសាអង់គ្លេសឡើង សម្រាប់សិស្សបឋមសិក្សា ។ យើងបានរៀបចំកម្មវិធីប្រឡងប្រកបពាក្យភាសាអង់គ្លេសនៅខេត្តព្រៃវែង កំពង់ស្ពឺ និងតាកែវ ហើយលទ្ធផល គឺពិតជាមានការជំរុញលើកទឹកចិត្តយ៉ាងខ្លាំង» ។
លោកបន្ថែមទៀតថា៖«កម្មវិធីប្រឡងនេះពិតជាបានលើកទឹកចិត្តកុមារឲ្យរៀនភាសាអង់គ្លេស ។ ថ្មីៗនេះ យើងបានរៀបចំកម្មវិធីប្រឡងប្រកបពាក្យភាសាអង់គ្លេស«អ្នកឈ្នះក្នុងចំណោមអ្នកឈ្នះ»ជាលើកដំបូងរបស់យើង ដែលមានសិស្សចំនួន២៦១នាក់មកពីសាលាបឋមសិក្សាជ័យមង្គល សាលាបឋមសិក្សាតាគាត់មង្គល សាលាបឋមសិក្សារកា សាលាបឋមសិក្សា ហ៊ុន សែន ជន្លឹង សាលាបឋមសិក្សាស្លែងសាលាបឋមសិក្សា ហ៊ុន សែន ជីបាល សាលាបឋមសិក្សាខ្យោង និងសាលាបឋមសិក្សាព្រៃត្បេះ ក្នុងខេត្តកណ្តាល និងខេត្តកំពង់ចាម» ។
កុមារី សាន ណារី ជ័យលាភីលេខ១ក្នុងកម្មវិធីនេះ បាននិយាយថា៖«ខ្ញុំមានអារម្មណ៍សប្បាយរីករាយណាស់ ដែលបានទទួលជ័យជម្នះនេះ ។ ខ្ញុំបានទទួលរង្វាន់ទឹកប្រាក់ចំនួន ៤០ម៉ឺនរៀលដែលបានប្រគល់ដោយណាហ្គាវើលបេះដូងសប្បុរស ។ ប្រាក់នេះ គឺជាចំនួនដ៏សន្ធឹកសន្ធាប់សម្រាប់រូបខ្ញុំ »។
លោក រ៉េន នាយកសាលាបឋមសិក្សា ហ៊ុនសែន ជន្លឹង មានប្រសាសន៍ថា៖«កម្មវិធីប្រឡងប្រកបពាក្យភាសាអង់គ្លេស មានសារសំខាន់ណាស់សម្រាប់សិស្សានុសិស្ស ក្នុងការជួយពង្រឹងចំណេះដឹងសមត្ថភាពភាសាអង់គ្លេសរបស់ពួកគេ ។ ភាសាអង់គ្លេស គឺមានសារសំខាន់ណាស់ សម្រាប់ទាំងការងារ និងការអប់រំ ។ ជាមួយកម្មវិធីនេះ កុមារទទួលបាននូវឱកាសរៀនភាសាអង់គ្លេស មុនពេលយើងចាប់ផ្តើមបង្រៀនភាសាអង់គ្លេសដល់ពួកគេ»។
លោក ង៉ុយ ផាត នាយកសាលាបឋមសិក្សារកា មានប្រសាសន៍ថា៖«កម្មវិធីប្រឡងប្រកបពាក្យភាសាអង់គ្លេសដែលបានផ្តួចផ្តើមបង្កើតឡើងដោយណាហ្គាវើលបេះដូងសប្បុរសនេះ គឺជាកម្មវិធីដ៏ល្អអស្ចារ្យមួយ ។ កម្មវិធីនេះនឹងមានឥទ្ធិពលជាវិជ្ជមានយូរអង្វែងសម្រាប់កុមារកម្ពុជានាពេលអនាគត ។ ភាសាអង់គ្លេស គឺជាភាសាអន្តរជាតិដែលត្រូវបានគេប្រើប្រាស់យ៉ាងទូលំទូលាយសម្រាប់ទំនាក់ទំនងទូទាំងពិភពលោក»៕
ចែករំលែកព័តមាននេះ