ខេត្តព្រះសីហនុ ៖ ខេត្តព្រះសីហនុជាតំបន់ដែលមានឧត្តមភាពលេចធ្លោសម្រាប់ការអភិវឌ្ឍដោយសារខេត្តនេះ មានភូមិសាស្ត្រនៅជាប់សមុទ្រ មានកំពង់ផែទឹកជ្រៅ អាកាសយានដ្ឋាន និងតំបន់ឆ្នេរទេសចរណ៍ជាច្រើនទើបរាជរដ្ឋាភិបាលបានសម្រេចឱ្យមានការសិក្សា និងរៀបចំផែនការមេ ដើម្បីអភិវឌ្ឍ និងប្រែក្លាយខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណងដែលបានកំណត់នៅក្នុងគោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥-២០២៥ ។
លោក ឡុង ឌីម៉ង់ អភិបាលរងខេត្តព្រះសីហនុបានឱ្យកោះសន្តិភាពដឹងថា ផែនការមេខាងលើនេះ គឺជាត្រីវិស័យក្នុងការអភិវឌ្ឍខេត្តព្រះសីហនុឱ្យទៅជាតំបន់សេដ្ឋកិច្ចគំរូពហុបំណង និងជាប៉ូលសេដ្ឋកិច្ចដ៏សំខាន់មួយ ដើម្បីបម្រើឱ្យខ្សែច្រវាក់ផលិតកម្ម ក្នុងតំបន់ សំដៅជំរុញកំណើនសេដ្ឋកិច្ច, ការអភិវឌ្ឍសង្គម និងការការពារបរិស្ថានប្រកបដោយចីរភាព និងនិរន្តរភាព ។
នៅក្នុងរយៈពេលប៉ុន្មានឆ្នាំចុងក្រោយនេះជាមួយនឹងសុខសន្តិភាព និងស្ថិរភាពនយោបាយនៅក្នុងប្រទេសខេត្តព្រះសីហនុបានប្រែក្លាយពីខេត្តដែលភាពស្ងៀមស្ងាត់ទៅជាខេត្តដែលមានសកម្មភាពសេដ្ឋកិច្ចរស់រវើកទាំងក្នុងវិស័យទេសចរណ៍ និងវិស័យពាណិជ្ជកម្មដោយយោងតាមកត្តាភូមិសាស្ត្រ, និន្នាការវិវត្តថ្មីៗនៃសេដ្ឋកិច្ចសកល និងចរន្តបំលាស់ទីនៃប្រភេទឧស្សាហកម្មរបស់ចិនមួយចំនួនមកកាន់តំបន់អាស៊ីដែលបណ្តាលមកពីសង្គ្រាមពាណិជ្ជកម្មខេត្តព្រះសីហនុនឹងកាន់តែមានសក្តានុពលខ្ពស់ក្នុងការទាក់ទាញ និងស្រូបយកវិនិយោគពីខាងក្រៅ និងអាចក្លាយទៅជា«ក្បាលម៉ាស៊ីន» និងជា «ក្បាលនាគ» ជំរុញកំណើនសេដ្ឋកិច្ចជាតិ ។
លោកបន្តថា ដើម្បីចាប់យកកាលានុវត្តភាពនេះការរៀបចំផែនការមេ ដើម្បីអភិវឌ្ឍ និងប្រែក្លាយខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណង គឺជាកិច្ចការសំខាន់ចាំបាច់ខ្លាំងដែលត្រូវជំរុញអនុវត្តឱ្យឆាប់តាមដែលអាចធ្វើបាន ដើម្បីឆ្លើយតបឱ្យបានទាន់ពេលវេលានូវការកើនឡើងនូវតម្រូវការវិនិយោគិន ដែលផ្តោតសំខាន់លើការធ្វើពិពិធកម្ម ក្នុងវិស័យឧស្សាហកម្ម ដែលត្រូវផ្សារភ្ជាប់ខ្សែច្រវាក់ឧស្សាហកម្ម, ខ្សែច្រវាក់ការផ្គត់ផ្គង់ និងខ្សែច្រវាក់តម្លៃសកល, ពន្លឿនការសាងសង់ប្រព័ន្ធហេដ្ឋារចនាសម្ព័ន្ធ ដោយមានការគិតគូរវែងឆ្ងាយ និងជាក់លាក់ និងការរៀបចំគោលនយោបាយលើកទឹកចិត្ត និងគោលនយោបាយគាំពារនានា ដើម្បីទាក់ទាញការវិនិយោគ និងបង្កើតការងារ ។
លោក ឡុង ឌីម៉ង់ បានឱ្យដឹងទៀយថា ដំណើរការអនុវត្តផែនការមេនេះត្រូវតែសម្រេចឱ្យបាននូវភារកិច្ចមួយចំនួនរួមមាន ៖ ការកំណត់ទិសដៅអភិវឌ្ឍន៍, ការបញ្ជាក់ពីមុខងារតាមតំបន់ទីតាំងនីមួយៗផ្សេងៗគ្នា, ការរៀបចំសម្របសម្រួលឱ្យមានដីធ្លីសម្រាប់ការសាងសង់ និងអភិរក្សតំបន់អេកូឡូស៊ីធម្មជាតិ, ការរៀបចំហេដ្ឋារចនាសម្ព័ន្ធ និងប្រព័ន្ធសេវាសាធារណៈ ជាពិសេសការរៀបចំឱ្យមានជាថ្នាលបណ្តុះបណ្តាលធនធានមនុស្ស និងជំនាញនៅនឹងកន្លែង ដោយផ្តោតសំខាន់លើជំនាញបច្ចេកទេស ដើម្បីបម្រើឱ្យវិស័យឧស្សាហកម្ម, សេវាកម្ម និងវិស័យពាក់ព័ន្ធដទៃទៀត ដែលប្រើប្រាស់បច្ចេកវិទ្យាទំនើបៗ ។
លោកបន្តថា គោលបំណងនៃការរៀបចំផែនការមេផែនការមេនេះ គឺជាផែនការបែបយុទ្ធសាស្ត្រដែលមានចក្ខុវិស័យវែងឆ្ងាយ, ច្បាស់លាស់ និងអាចអនុវត្តបានព្រមទាំងមានសង្គតិភាពជាមួយយុទ្ធសាស្ត្រថ្នាក់ជាតិ និងយុទ្ធសាស្ត្រអភិវឌ្ឍគន្លឹះនានាដោយសំដៅប្រែក្លាយខេត្តព្រះសីហនុទៅជាទីក្រុងដ៏ល្បី និងសំខាន់មួយនៅក្នុងតំបន់អាស៊ីអាគ្នេយ៍, តំបន់ដែលប្រើប្រាស់បច្ចេកវិទ្យាវ័យឆ្លាត (Smart Technology) និងបំពាក់ដោយសេវាសាធារណៈ បរិក្ខាសម្រាប់រស់នៅលំដាប់ពិភពលោក (World ClassFacility)។
លោក ឡុង ឌីម៉ង់ បានឱ្យដឹងទៀតថា ដើម្បីអភិវឌ្ឍ និងប្រែក្លាយខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណងនឹងរួមបញ្ចូលកិច្ចការសំខាន់ៗដូចជា ៖ ការវាយតម្លៃលើស្ថានភាពជាក់ស្តែងដែលមានគោលដៅស្វែងយល់ និងវិភាគអំពីលក្ខខណ្ឌ និងស្ថានភាពជាក់ស្តែងរបស់ខេត្តព្រះសីហនុ និងប្រទេសកម្ពុជា រួមទាំងវាយតម្លៃមូលដ្ឋាននៃវិស័យឧស្សាហកម្ម, ធនធានធម្មជាតិ, ហេដ្ឋារចនាសម្ព័ន្ធ, បរិស្ថាន, ការគ្រប់គ្រងកម្លាំងពលកម្ម និងបរិយាកាសអាជីវកម្មជាដើម ។
ប៉ុន្តែបច្ចុប្បន្ននេះ ខេត្តព្រះសីហនុកំពុងប្រឈមនឹងបញ្ហាមួយចំនួនដូចជាការអភិវឌ្ឍគំហុកនៃសំណង់អគារ, សកម្មភាពរិកប្បកម្មពីធ្លីនិងវិស័យកាស៊ីណូ ដែលកត្តាទាំងនេះបានជំរុញឱ្យថ្លៃដើមកើនឡើងខ្ពស់, កង្វះធនធានកម្លាំងពលកម្មក្នុងស្រុក ជាពិសេសកម្លាំងពលកម្មដែលមានជំនាញខ្ពស់, ការអភិវឌ្ឍវិស័យឧស្សាហកម្មមានលក្ខណៈបែកខ្ញែក និងកង្វះហេដ្ឋា-រចនាសម្ព័ន្ធគាំទ្រនានា, ការប្រកួតប្រជែងជាមួយនឹងបណ្តាទីក្រុងក្នុងតំបន់, ការពង្រឹងភាពទាក់ទាញរបស់ទីក្រុង និងការដោះស្រាយនូវបញ្ហាបំពុលបរិស្ថាន និងប្រព័ន្ធអេកូឡូស៊ីធម្មជាតិ ។ល។
ការដាក់ចេញនូវផែនការរៀបចំហេដ្ឋារចនាសម្ព័ន្ធដែលមានលក្ខណៈពេញលេញ និងប្រទាក់ក្រឡា រួមទាំងអាកាសយានដ្ឋាន, កំពង់ផែ, ផ្លូវល្បឿនលឿន, ផ្លូវដែក និងប្រព័ន្ធហេដ្ឋារចនាសម្ព័ន្ធក្នុងទីក្រុង ដូចជាផ្លូវថ្នល់, ការផ្គត់ផ្គង់ទីក, ប្រព័ន្ធលូ ថាមពលអគ្គិសនី, និងការដោះស្រាយកាកសំណល់រឹង និងរាវព្រមទាំងផែនការសម្រាប់រៀបចំហេដ្ឋារចនាសម្ព័ន្ធបម្រើដល់សេវាសាធារណៈ។
ការដាក់ចេញគោលនយោបាយដោះស្រាយបញ្ហាដីធ្លី ដោយប្រកាន់យកគោលការណ៍សុខដុមនីយកម្មផ្នែកលើទិដ្ឋភាពច្បាប់, រដ្ឋបាល និងទីផ្សារ ។ ការដាក់ចេញផែនការសកម្មភាពអនុវត្តជាដំណាក់កាល ផែនការមេនេះនឹងរួមបញ្ចូលនូវផែនការសកម្មភាពអនុវត្តរយៈពេល៣ ទៅ៥ ឆ្នាំ និងធ្វើការវិភាគសមិទ្ធិលទ្ធភាពសេដ្ឋកិច្ចលើគម្រោងសំខាន់ៗ ដោយកំណត់ឱ្យច្បាស់នូវយន្តការអនុវត្ត និងជាជំហានសំខាន់ៗ ។
ដើម្បីអនុវត្តកិច្ចការនេះឱ្យមានប្រសិទ្ធភាពខ្ពស់ និងមានភាពរលូន, តាមបទពិសោធន៍របស់បណ្តាប្រទេសដែលអនុវត្តទទួលបានជោគជ័យ គឺត្រូវមានក្រុមប្រឹក្សាកម្រិតនយោបាយ ដែលមានតួនាទីសម្រេចកម្រិតនយោបាយលើកិច្ចការចម្បងៗ និងអនុម័តលទ្ធផលនៃផែនការមេដោយគួរមានសមាសភាពដឹកនាំ ដោយស្នើសុំ សម្តេចតេជោនាយករដ្ឋមន្ត្រី ជាប្រធាន និងមានឧបនាយករដ្ឋមន្ត្រីពីររូប ជាអនុប្រធាន រួមមាន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងឧបនាយករដ្ឋមន្ត្រី រដ្ឋមន្ត្រីក្រសួងដែនដីគនរូបនីយកម្ម និងសំណង់, ព្រមទាំងមានរដ្ឋមន្ត្រីពីក្រសួង-ស្ថាប័នពាក់ព័ន្ធជាសមាជិក ។
ស្នើសុំបង្កើតគណៈកម្មាធិការពីរទៀត ដែលដឹកនាំដោយឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងមានការចូលរួមពីក្រសួង ស្ថាប័នពាក់ព័ន្ធជាសមាជិក ដើម្បីដឹកនាំ សម្របសម្រួល និងត្រួតពិនិត្យវាយតម្លៃគម្រោងសិក្សារៀបចំផែនការមេ ដើម្បីអភិវឌ្ឍនិងប្រែក្លាយខេត្តព្រះសីហនុ ទៅជាតំបន់សេដ្ឋកិច្ចពិសេសគំរូពហុបំណង ៕
ចែករំលែកព័តមាននេះ