រាជធានីភ្នំពេញ ៖ រយៈពេលចុងក្រោយនេះទីផ្សារកៅស៊ីមានលំនឹងប្រសើរ ដែលធ្វើឲ្យកម្រៃពលកម្មក្នុងវិស័យកសិឧស្សាហកម្មនេះ មានភាពប្រសើរផងដែរ ។ លោកឧកញ៉ា លឹម ហេង ជាអ្នកវិនិយោគលើដំណាំកៅស៊ូម្នាក់នៅកម្ពុជា អះអាងថា នៅមួយឆ្នាំចុងក្រោយនេះ ប្រាក់ឈ្នូលកម្មករនៅក្នុងវិស័យកៅស៊ូបានសមរម្យ មានលក្ខណៈល្អប្រសើរជាងបណ្តាលប្រទេសមួយចំនួនទៅទៀតផង ។
ប្រាក់ឈ្នួលកម្លាំងពលកម្មនៅក្នុងឧស្សាហកម្មកៅស៊ូកម្ពុជា សម្រាប់កម្មករចៀរជ័រជាមធ្យមក្នុងមួយខែអាចរកប្រាក់ចំណូលបន្ថែមបានដល់ ៣០០ ដុល្លារអាមេរិក កម្មករដាំដុះកៅស៊ូជាធម្យមមួយខែទទួលបាន ២០០ ដុល្លារអាមេរិក ។ តាមលោកឧកញ៉ា លឹម ហេង ថា បច្ចុប្បន្នថ្លៃដើមផលិតកៅស៊ូក្នុងមួយតោនក្រុមហ៊ុននៅក្នុងស្រុកចំណាយពី ១៤០០ ទៅ ១៥០០ ដុល្លារអាមេរិកនៅតាមតំបន់ខណៈតម្លៃកៅស៊ូមួយតោនលក់ចេញបានថ្លៃពីចន្លោះ ១.៦០០ ទៅ ១.៧០០ ដុល្លារអាមេរិក ។
«នៅតាមចម្ការកៅស៊ូពេលបច្ចុប្បន្នជួបបញ្ហា ខ្វះខាតកម្លាំងពលកម្មសម្រាប់ចៀរជ័រកៅដោយសារតម្លៃកៅស៊ូកម្ពុជានៅមានកម្រិតនៅឡើយមិនទាន់អាចឱ្យម្ចាស់ក្រុមហ៊ុនហ៊ានជួលកម្មករក្នុងតម្លៃខ្ពស់បាននៅឡើយនោះទេ ។ បើកៅស៊ូអាចលក់បានថ្លៃជាង ២.០០០ ដុល្លារអាមេរិកក្នុងតោន ទើបយើងមានលទ្ធភាពច្រើនជួលកម្មករជំនាញឱ្យនៅធ្វើការក្នុងវិស័យនេះបាន» នេះបើតាមការបញ្ជាក់ពីម្ចាស់ចម្លារកៅស៊ូ ។
ប្រភពពីអ្នកវិនិយោគលើដំណាំឧស្សាហកម្មកៅស៊ូ បានទទួលស្គាល់ថា កម្រៃពលកម្មនៅកម្ពុជា ទាបជាងនៅប្រទេសថៃ ដែលធ្វើឱ្យពលករខ្មែរជាច្រើននៅតែចេញទៅលក់កម្លាំងឯប្រទេសគេ ។ របាយការណ៍ពីអគ្គនាយកដ្ឋានកៅស៊ូថា គិតត្រឹមឆ្នាំ ២០២១ កម្ពុជាមានផ្ទៃដីដាំកៅស៊ូសរុបជាង ៤០ ម៉ឺនហិកតាក្នុងនោះសម្រាប់កៅស៊ូឧស្សាហកម្មមានជាង ២៤ ហិកតា កៅស៊ូគ្រួសារ មានជាង ១៦ ម៉ឺនហិកតា ។ ផៃ្ទដីដែលមានកៅស៊ូចៀរជ័រជាង ៣១ ម៉ឺនហិកតា ។ ក្នុង ១ ឆ្នាំៗកម្ពុជាអាចផលិតផលកៅស៊ូស្ងួតបានចំនួនជាង ៣៦ ម៉ឺនតោន ផ្តល់ចំណូលសរុបចំនួនប្រមាណ ៦១២,៣ លានដុល្លារដោយក្នុងមួយតោនថ្លៃ ១.៦៦៦ ដុល្លារអាមេរិក ។
ក្រៅពីនាំចេញជ័រកៅស៊ូពាក់កណ្តាលសម្រេចទៅប្រទេសគេ សព្វថ្ងៃយ៉ាងហោចណាស់មានរោងចក្រផលិតកៅស៊ូកង់រថយន្តនៅកម្ពុជា ៤ ក្រុមហ៊ុន ។ ក្រុមហ៊ុនទាំងនោះប្រើប្រាស់ធនធានជ័រកៅស៊ូក្នុងស្រុក ដែលបានធ្វើឲ្យទីផ្សារជ័រកៅស៊ូបច្ចុប្បន្នមានលំនឹងល្អប្រសើរ ។
លោកឧកញ៉ា លឹម ហេង ដែលជាអនុប្រធានសភាពាណិជ្ជកម្មកម្ពុជា ផងនោះបាននិយាយថា កៅស៊ូនៅតែមានតម្រូវការខ្ពស់ ដោយសារតម្រូវការប្រើប្រាស់យានយន្តហើយបណ្តាប្រទេសមួយចំនួននៅលើពិភពលោកបានកាត់បន្ថយនៃការដាំដុះកៅស៊ូ ព្រោះតែមានការខាតបង់នៅពេលកន្លងមក ។ លោកឧញ៉ាថា ក្នុងឧស្សាហកម្មកៅស៊ូបើមានទីផ្សារនៅក្នុងស្រុកច្រើន ប្រសើរជាងការពឹងផ្អែកទីផ្សារខាងក្រៅ ៕
ចែករំលែកព័តមាននេះ