ទីក្រុងតូក្យូ ៖ ប៉ូលិសបានចាប់ខ្លួនបុរសខ្មាន់កាំភ្លើងម្នាក់ នៅថ្ងៃសុក្រនេះ បន្ទាប់ពីការឡោមព័ទ្ធ អស់រយៈពេល ១១ម៉ោង ក្នុងករណីចាប់បុគ្គលិកពេទ្យ ចំនួន០៣នាក់ ជាចំណាប់ខ្មាំង…
ទីក្រុងតូក្យូ ៖ ប៉ូលិសបានចាប់ខ្លួនបុរសខ្មាន់កាំភ្លើងម្នាក់ នៅថ្ងៃសុក្រនេះ បន្ទាប់ពីការឡោមព័ទ្ធ អស់រយៈពេល ១១ម៉ោង ក្នុងករណីចាប់បុគ្គលិកពេទ្យ ចំនួន០៣នាក់ ជាចំណាប់ខ្មាំង ដែលពួកគេបានមកផ្ទះរបស់ជនសង្ស័យ ក្នុងទីក្រុង Fujimino ស្ថិតនៅភាគខាងជើងនៃទីក្រុងតូក្យូ ក្នុងប្រទេសជប៉ុន នេះបើយោងតាមកាសែត The Japan Times ។
ប៉ូលិសបានសម្រុកចូលលំនៅឋានខាងលើ ហើយបានចាប់ខ្លួនលោក Hiroshi Watanabe អាយុ ៦៦ឆ្នាំ ជាមួយកាំភ្លើងខ្លីមួយដើម នៅក្នុងផ្ទះ នៅម៉ោងប្រហែល៨ព្រឹកថ្ងៃសុក្រនេះ បន្ទាប់ពីបានឃុំខ្លួនបុគ្គលិកពេទ្យ ០៣នាក់ ទុកជាចំណាប់ខ្មាំង កាលពីថ្ងៃព្រហស្បតិ៍ ទី២៧ ខែមករា ម្សិលមិញនេះ ។
ប៉ូលិសបាននិយាយថា វេជ្ជបណ្ឌិតដ៏ល្បីឈ្មោះ Junichi Suzuki អាយុ ៤៤ឆ្នាំ ត្រូវជនសង្ស័យបាញ់សម្លាប់ ។ លោក Suzuki ស្ថិតក្នុងចំណោមបុគ្គលិកពេទ្យទាំង៣នាក់ ដែលបានទៅលេងផ្ទះជនសង្ស័យ ។ ជនរងគ្រោះទី២ ត្រូវបានគេរាយការណ៍ថា គឺបុរស អាយុ៤១ឆ្នាំ ដែលជាគិលានុបដ្ឋាយិកា ត្រូវបានបញ្ជូនទៅសង្គ្រោះនៅមន្ទីរពេទ្យ ស្ថិតក្នុងស្ថានភាពធ្ងន់ធ្ងរ ។ បុរសម្នាក់ទៀត អាយុ ៣២ឆ្នាំ បានរត់គេចពីផ្ទះជនសង្ស័យ ទៅកាន់ប៉ុស្តិ៍ប៉ូលិស ។
ប៉ូលិស កំពុងបើកការស៊ើបអង្កេតហេតុការណ៍នេះ គេមិនដឹងថា មានអំពើហិង្សាកើតឡើងដោយរបៀបណាទេ ? ហើយជនសង្ស័យ បានកាំភ្លើងមកពីទីណានោះដែរ ? ព្រោះថា ករណីបាញ់ប្រហារដោយកាំភ្លើង គឺកម្រមាននៅក្នុងប្រទេសជប៉ុន ដែលអាវុធត្រូវបានគ្រប់គ្រងយ៉ាងខ្លាំង ។
ប្រព័ន្ធផ្សព្វផ្សាយជប៉ុន បានចេញផ្សាយថា ក្រុមគ្រូពេទ្យ ជាអ្នកមើលថែទាំម្តាយរបស់ជនសង្ស័យ ប៉ុន្តែនាពេលថ្មីៗនេះ ស្ត្រីចំណាស់នោះ បានទទួលមរណភាព ។ ក្រុមគ្រូពេទ្យទាំងនេះ បានទៅចូលរួមរំលែកទុក្ខដល់ផ្ទះ កាលពីយប់ថ្ងៃព្រហស្បតិ៍ ទី២៧ មករា ២០២២ តាមការស្នើសុំរបស់ជនសង្ស័យ ។
ប៉ូលិសទទួលបានដំណឹងជាលើកដំបូងនៅម៉ោងប្រហែល ០៩និង១៥នាទីយប់ថ្ងៃព្រហស្បតិ៍ថា ពីអ្នកជិតខាង ដែលបានរាយការណ៍ពីករណីបាញ់ប្រហារនេះ បន្ទាប់ពីឮស្នូរកាំភ្លើង គេឃើញបុរសម្នាក់ហូរឈាមចេញពីទ្រូង ដេកដួលនៅខាងក្រៅផ្ទះ ។ យោងតាមប៉ូលិសស៊ើបអង្កេត និយាយថា សពបុរសរងគ្រោះ ត្រូវគ្រាប់កាំភ្លើងចំដើមទ្រូង និងពោះ ដេកស្លាប់នៅក្បែរច្រកចូលផ្ទះ ។
នៅពេលកម្លាំងប៉ូលិស បានចុះទៅឡោមព័ទ្ធដល់ផ្ទះ នៅយប់កើតហេតុនោះ មន្ត្រីប៉ូលិសបាននិយាយជាមួយខ្មាន់កាំភ្លើងពេញមួយយប់តាមរយៈទូរសព្ទ ប៉ុន្តែជនសង្ស័យមិនបានស្នើសុំ ឬទាមទារអ្វីនោះទេ ។
ជាមួយនឹងការឡោមព័ទ្ធនៅតែបន្ត រហូតដល់ព្រឹកថ្ងៃសុក្រ អាជ្ញាធរមូលដ្ឋាន បានជម្លៀសអ្នកស្រុកប្រហែល ១១០នាក់ ដែលរស់នៅក្នុងរង្វង់ ៣០០ម៉ែត្រ នៃផ្ទះកើតហេតុ ហើយសាលាបឋមសិក្សា និងអនុវិទ្យាល័យនៅក្បែរនោះ ត្រូវបានបិទមួយថ្ងៃ ។ ប៉ូលិសបានបិទផ្លូវ នៅជុំវិញផ្ទះជនសង្ស័យ ខណៈអ្នកយកព័ត៌មានបានប្រមូលផ្តុំគ្នា ជុំវិញតំបន់នោះ ។
នៅម៉ោងប្រហែល ៨ព្រឹកថ្ងៃសុក្រ កម្លាំងប៉ូលិសបានសម្រុកចូលផ្ទះ ហើយបានរកឃើញសពលោក Suzuki និងចាប់ខ្លួនបុរសខ្មាន់កាំភ្លើង ។
យោងតាមបុរស វ័យ៩១ឆ្នាំម្នាក់ ដែលរស់នៅក្បែរនោះ បានប្រាប់អ្នកយកព័ត៌មានថា ជនសង្ស័យបានផ្លាស់ទៅរស់នៅផ្ទះជាមួយម្តាយរបស់គាត់កាលពីប៉ុន្មានឆ្នាំមុន ហើយបានប្រាប់លោកថា គាត់មិនអាចសេពគប់ជាមួយអ្នកជិតខាងបានទេ ចាប់តាំងពីមើលថែម្តាយរបស់គាត់ នៅលើគ្រែ ៕
ចែករំលែកព័តមាននេះ