រក្សាគម្លាត២ម៉ែត្រពីគ្នា! តែចិនផលិតស្រោមអនាម័យពិសេសសម្រាប់អូឡាំពិកក្រុងប៉េកាំង
ប៉េកាំង ៖ ប្រទេសចិនបានផលិតស្រោមអនាម័យសម្រាប់អត្តពលិក និងអ្នកពាក់ព័ន្ធកីឡាអូឡាំពិករដូវរងាទីក្រុងប៉េកាំងឆ្នាំ
ប៉េកាំង ៖ ប្រទេសចិនបានផលិតស្រោមអនាម័យសម្រាប់អត្តពលិក និងអ្នកពាក់ព័ន្ធកីឡាអូឡាំពិករដូវរងាទីក្រុងប៉េកាំងឆ្នាំ ២០២២ បើទោះបីជាប្រទេសនេះ បានដាក់ចេញវិធានការរក្សាគម្លាតសង្គមដ៏តឹងរឹងក្នុងបំណងទប់ស្កាត់ការឆ្លងរីករាលដាលនៃជំងឺកូវីដ-១៩ យ៉ាងណាក៏ដោយ។ នេះបើយោងតាមការចេញផ្សាយពីសារព័ត៌មាន Reuters។
អ្នករៀបចំបានប្រាប់ Reuters កាលពីថ្ងៃទី២៥ ខែមករា ថា អង្គភាពដែលទាក់ទងនឹងអូឡាំពិកទាំងអស់នឹងផ្តល់ជូនស្រោមអនាម័យដោយឥតគិតថ្លៃក្នុងពេលវេលាសមស្របដល់អ្នកដែលបានចុះឈ្មោះចូលមកកន្លែងស្នាក់នៅ ដែលស្ថិតក្នុងតំបន់ក្រោមការរៀបចំ និងគ្រប់គ្រងរបស់ខ្លួន។
ការប្រកួតនឹងប្រព្រឹត្តទៅចាប់ពីថ្ងៃទី៤ ដល់ថ្ងៃទី២០ ខែកុម្ភៈ ខាងមុខ ដែលធ្វើនៅទីក្រុងប៉េកាំង និងទីក្រុង Zhangjiakou នៅក្បែរនោះ ខណៈអត្តពលិក និងបុគ្គលិកពាក់ព័ន្ធទាំងអស់ ត្រូវបានបំបែកចេញពីសាធារណជនទូទៅ។
ទោះយ៉ាងណា អ្នកកាសែតដែលចូលទៅដល់សណ្ឋាគារ Guizhou បានប្រទះឃើញស្រោមអនាម័យ៥ប្រអប់ដាក់នៅតាមបន្ទប់នីមួយៗ ដែលមានពណ៌ផ្សេងគ្នាជាមួយរចនាបទរូបចង្កៀងគោមបុរាណចិនផងដែរ។ អ្នករៀបចំមិនបានបញ្ជាក់ភ្លាមៗថា តើស្រោមអនាម័យប៉ុន្មានដែលពួកគេនឹងចែកចាយនោះទេ។ ប៉ុន្តែបើយោងតាមសៀវភៅ Playbook ស្តីពីវិធានការទប់ស្កាត់កូវីដ-១៩ សម្រាប់បុគ្គលិក និងអត្តពលិក ត្រូវបានណែនាំឱ្យកាត់បន្ថយការឱប ចាប់ដៃគ្នា ជាពិសេសរក្សាគម្លាតសង្គមយ៉ាងហោច២ម៉ែត្រពីគ្នា។
គួរបញ្ជាក់ថា នេះមិនមែនលើកទី១ឡើយ ដោយវត្តមានស្រោមអនាម័យត្រូវបានចែកចាយចាប់តាំងពីព្រឹត្តិការណ៍អូឡាំពិករដូវក្តៅទីក្រុងសេអ៊ូលឆ្នាំ ១៩៨៨ មកម្ល៉េះ ដើម្បីការពារ ក៏ដូចជាបង្កើនការយល់ដឹងអំពីជំងឺអេដស៍៕
ចែករំលែកព័តមាននេះ