រាជធានីភ្នំពេញ ៖ រយៈពេលប៉ុន្មានថ្ងៃចុងក្រោយនេះ មានការរិះគន់លើបណ្តាញសង្គមផង ការជជែកតាមតុកាហ្វេផង រឿងការរំខានដោយប្រព័ន្ធទូរស័ព្ទពីក្រុមហ៊ុនលក់អចលនទ្រព្យមួយចំនួន ពិសេសនោះ គឺការតេចូល (Call) ចូលលេខឯកជនរបស់គេ…
រាជធានីភ្នំពេញ ៖ រយៈពេលប៉ុន្មានថ្ងៃចុងក្រោយនេះ មានការរិះគន់លើបណ្តាញសង្គមផង ការជជែកតាមតុកាហ្វេផង រឿងការរំខានដោយប្រព័ន្ធទូរស័ព្ទពីក្រុមហ៊ុនលក់អចលនទ្រព្យមួយចំនួន ពិសេសនោះ គឺការតេចូល (Call) ចូលលេខឯកជនរបស់គេ និងមានសម្លេងតារាចម្រៀងល្បីឈ្មោះមួយដួង គឺលោក ឆន សុវណ្ណរាជ ឃោសនាលក់ខុនដូទៅវិញ ។
ជាក់ស្តែងនៅលើបណ្តាញសង្គមហ្វេសប៊ុកនាថ្ងៃទី២៧ ខែមករានេះ មានការបង្ហោះសារ និងការចែកចាយយ៉ាងផុសផុលនូវរូបថតលោក ឆន សុវណ្ណរាជ អមជាមួយសារអង្វរក បែបធុញទ្រាន់ ពីមហាជនថា «លោក ឆន សុវណ្ណរាជ អើយ ឈប់បានឈប់ទៅ ឈប់ Call មកទៀត លោកមានដី មានផ្ទះ មានខុនដូរ លោកផុសលក់តាមផេកលោកទៅ មិនបាច់ Call មករាល់ថ្ងៃទេ ខលមកខ្ញុំមិនអស់ចិត្ត call មកប្រពន្ធខ្ញុំទៀត ខ្ញុំបាន Block លេខលោក២ខ្សែរហើយ នៅ call ទៅប្រពន្ធខ្ញុំទៀត ។ ថា call ក៏ call ចុះ តែសុំមើលម៉ោងពេលផង ខ្ញុំអ្នកធ្វើការ ហត់ណាស់ មានពេលបន្តិចបន្តួចសម្រាកថ្ងៃត្រង់ លោក call មកមិនឱ្យសម្រាកទៀត ។ call មកអស់ហើយមិនថាខ្ញុំ ប្រពន្ធខ្ញុំ ចូលដល់បងប្អូនខ្ញុំទៀត ។ លោកធ្វើអញ្ចឹងដើម្បីអី បាត់ប្រជាប្រិយភាពហើយ ។ សូមអរគុណលោក បើឈប់ call មកខ្ញុំទៀត» ។
បន្ទាប់មក ក៏មានអ្នកលេងបណ្តាញសង្គមផ្សេងទៀតធ្វើការចែកចាយ និងបញេញទស្សនៈរិះគន់ផងដែរថា«មែនតើ ធុញណាស់ “ជម្រាបសួរបាទ ខ្ញុំបាទ ឆន សុវណ្ណរាជ សូមណែនាំគម្រោង ខុនដូរមួយកន្លែងនៅ…..» ។ ចង់តែសួរថា បានលេខខ្ញុំពីណា ឥឡូវអោយតែឃើញលេខមិនស្គាល់លែងចង់ហ៊ានលើក ខ្ញុំក្មេងវត្ត នៅកុដិមួយលោកទេ អត់ចាប់អារម្មណ៍ខុនដូអីទេ… ទាន់?» ។
«វាចូលលក្ខណៈរំខានខ្លាំងមែនទែន ព្រោះអ្នកតេចូលមក ជាលេខធម្មតា តែពេលលើកឡើង ស្រាប់តែលឺសម្លេង លោក ឆន សុវណ្ណរាជ ឯណាមកណែនាំគម្រោងលក់ខុនដូរ ឯណាឆ្កុយ ។ អាជ្ញាធរពាក់ព័ន្ធគួរពិនិត្យល់បញ្ហានេះផង វាចូលលក្ខណៈរំខានគេខ្លាំងណាស់» ។ នេះជាការលើកឡើងរបស់ លោក វិចិត្រ ដែលជាបុគ្គលិកក្រុមហ៊ុនឯកជនមួយនៅរាជធានីភ្នំពេញ ប្រាប់សារព័ត៌មានកោះសន្តិភាព ។
លោកបានបន្តថា «មិនថាតែខ្ញុំទេ ដែលរងការរំខានបែបនេះ មិត្តភក្តិដទៃទៀត ក៏គេធុញទ្រាន់នឹងការធ្វើបែបនេះដែរ ។ ព្រោះពេលតេមក គឺជាលេខធម្មតា របស់ក្រុមហ៊ុនទូរស័ព្ទ ដែលគិតថា ជាលេខគេតេមកមានការអី តែពេលលើកនិយាយ ជាការប្រូម៉ូតលក់ខុនដូ និងជាសម្លេង តារាចម្រៀងរូបនេះ» ។
យ៉ាងណាមិញ គេនៅរង់ចាំមើលថា តើតារាចម្រៀងរូបនេះ នឹងធ្វើការបកស្រាយយ៉ាងណាជុំវិញបញ្ហាខាងលើនេះ ៕
ចែករំលែកព័តមាននេះ