សៀវភៅឯតទគ្គកម្ម Guinness ធ្លាប់បានកត់ត្រាស្ត្រីបារាំងឈ្មោះហ្សានល្វីល៍ កាល់ម៉ង់ (១៨៧៥-១៩៩៧) ថាជាអ្នកមានអាយុវែងជាងគេបង្អស់នាសម័យជឿនលឿនសព្វថ្ងៃគឺ១២២ឆ្នាំ និង១៦៤ថ្ងៃ ។ របៀបរបបរស់នៅនាំឱ្យមានអាយុវែងរបស់ស្ត្រីរូបនេះ គឺជារឿងធ្វើឱ្យអ្នកវិទ្យាសាស្ត្របើកភ្នែក ធំៗ ។ ពិសេសក្នុងរយៈពេលកន្លះសតវត្សចុងក្រោយ បន្ទាប់ពីស្វាមីចែកឋានចោលនាឆ្នាំ១៩៤២ ដែលពេលនោះគាត់មានអាយុ៦៧ឆ្នាំ ។ បន្ទាប់ពីក្លាយជាជីវិតឯកោ គាត់តែងតែអផ្សុកដូច្នេះហើយជក់បារីបន្តគ្នា មួយដើមហើយមួយដើមទៀត ។ ទន្ទឹមនឹងជក់បារី ថែមទាំងផឹកស្រាជាប្រចាំទាំងព្រឹកទាំងល្ងាច និងពេលយប់ ក្លាយជាយាយប្រមឹកអត់អ្នកណាហាមឃាត់បាន ។ មិនទាន់អស់ទេ គាត់ងាកទៅទទួលទានសូកូឡាមួយសប្តាហ៍អស់១គីឡូក្រាមទៀត ដែលជារបៀបរបបបង្កឱ្យអាយុខ្លី នេះបើតាមការយល់ឃើញរបស់វិស័យវេជ្ជសាស្ត្រអន្តរជាតិ ។ ថ្វីបើលោកយាយហ្សានប្រព្រឹត្តបែបនេះជាប់រហូត តែគេសម្គាល់ឃើញសុខភាពគាត់នៅតែល្អ នៅតែអាចធាក់ទោចក្រយានលំហែកាយយ៉ាងរំភើយពេលអាយុឡើង១០០ឆ្នាំ នៅតែមានអាយុវែងជាងកូនស្រីទោលរបស់ខ្លួន និងចៅស្រីរបស់ខ្លួនទៅទៀត ។
មានរឿងមួយដែលគេកត់ត្រាបាន គឺក្នុងឆ្នាំ១៩៦៥ ពេលលោកយាយហ្សានអាយុ៩០ឆ្នាំ លោកមេធាវី អង់ដ្រេ ហ្វ្រង់ស្វ័៊រ រ៉ាហ្វហ្វ្រេ (១៩១៨-១៩៩៥) ដោយយល់ថាកូនក្តីរបស់ខ្លួនរស់នៅមិនបានប៉ុន្មានទៀតទេ ព្រោះអាយុ៩០ឆ្នាំទៅហើយ ក៏យល់ព្រមធ្វើកិច្ចព្រមព្រៀងជាមួយលោកយាយហ្សាន គឺព្រមព្រៀងផ្តល់ប្រាក់ជូនលោកយាយហ្សានក្នុងមួយខែចំនួន២៥០០ហ្វ្រង់ រហូតដល់គាត់អស់ជីវិត លុះគាត់អស់ជីវិតទៅខ្លួនជាអ្នកមានសិទ្ធិទទួលមត៌កគេហដ្ឋានដែលលោកយាយស្នាក់រាល់ថ្ងៃ ព្រោះកូន និងចៅគាត់ស្លាប់ចោលគាត់អស់ហើយ ។ លោកមេធាវីយល់ព្រមធ្វើកិច្ចព្រមព្រៀងដូច្នេះ ព្រោះគិតថាយ៉ាងយូរពីរឆ្នាំទៀតប៉ុណ្ណោះ លោកយាយមុខជាអស់ជីវិត ដឹងអីលោកយាយហ្សាននៅតែមានសុខភាពល្អដដែល ហើយអ្នកដែលត្រូវអស់ជីវិតមុននោះគឺលោកមេធាវីទៅវិញ ។
បន្ទាប់ពីលោកមេធាវីទទួលមរណភាព ភរិយាគាត់់រ៉ាប់រងផ្តល់ប្រាក់ដល់លោកយាយហ្សានបន្តពីប្តីទៀត ផ្តល់រហូតដល់ខែសីហា ឆ្នាំ១៩៩៧ ដែលជាដំណាក់កាលចុងក្រោយរបស់ជីវិតលោកយាយហ្សាន ។
អ្នកដឹងរឿងនាំគ្នាធ្វើលេខបូក លេខគុណសាកមើល ឃើញថាចំនួនទឹកប្រាក់ដែលលោកមេធាវីរ៉ាហ្វហ្វ្រេ និងភរិយាផ្តល់ឱ្យលោកយាយហ្សានច្រើនជាងថ្លៃផ្ទះជាកេរមត៌កដល់ទៅ៣ដងឯណោះ ៕
ចែករំលែកព័តមាននេះ