ខេត្តមណ្ឌលគិរី ៖ ឯកឧត្តម ថង សាវុន អភិបាលខេត្ត បានប្រតិកម្មជុំវិញសកម្មភាពរបស់ក្រុមអាជីវករមួយចំនួនតូច ដែលបានលក់បន្លែផ្លែឈើបន្លំដល់ភ្ញៀវទេសចរ ធ្វើឲ្យប៉ះពាល់ដល់កិត្តិនាម និងភាពល្បីល្បាញនៃផលិតផលធម្មជាតិដែលដាំដុះផ្ទាល់លើទឹកដីខេត្តមណ្ឌលគិរី…
ខេត្តមណ្ឌលគិរី ៖ ឯកឧត្តម ថង សាវុន អភិបាលខេត្ត បានប្រតិកម្មជុំវិញសកម្មភាពរបស់ក្រុមអាជីវករមួយចំនួនតូច ដែលបានលក់បន្លែផ្លែឈើបន្លំដល់ភ្ញៀវទេសចរ ធ្វើឲ្យប៉ះពាល់ដល់កិត្តិនាម និងភាពល្បីល្បាញនៃផលិតផលធម្មជាតិដែលដាំដុះផ្ទាល់លើទឹកដីខេត្តមណ្ឌលគិរី ។
ឯកឧត្តមអភិបាលខេត្តបានលើកឡើងថា ដើម្បីរក្សាគុណតម្លៃនិងអត្តសញ្ញាណបន្លែ ផ្លែឈើប្រចាំខេត្តឲ្យក្លាយជាផលិតផលសម្គាល់ភូមិសាស្ត្រ គ្រប់មន្ត្រីពាក់ព័ន្ធ ជាពិសេស មន្ទីរកសិកម្ម និងមន្ទីរពាណិជកម្ម ត្រូវបង្កើនសកម្មភាពចុះអប់រំផ្សព្វផ្សាយ និងហាមឃាត់ការលក់បន្លំរាល់ផលិតផលនាំចូលពីតំបន់ដទៃ និងនាំចូលមកពីប្រទេសជិតខាងថា ជាដំណាំដាំនៅក្នុងទឹកដីខេត្តមណ្ឌលគិរី ។
ឯកឧត្តមអភិបាលខេត្តបន្តថា អាជ្ញាធរមិនហាមឃាត់នោះទេ ការប្រកបរបររកស៊ីរបស់ប្រជាពលរដ្ឋ ប៉ុន្តែសូមឲ្យគ្រប់អាជីវករទាំងអស់ ត្រូវមានភាពស្មោះត្រង់ចំពោះអតិថិជនរបស់ខ្លួន។ របស់នាំចូលត្រូវបញ្ជាក់ឲ្យបានច្បាស់ ព្រោះអ្នកទិញគាត់អាចមានជម្រើសថា តើគួរទិញឬអត់ ?
ជាការកត់សម្គាល់ ការដាំបន្លែ និងដំណាំហូប ផ្លែនៅខេត្តមណ្ឌលគិរីនាពេលបច្ចុប្បន្នមានសន្ទុះកើនឡើងច្រើន ហើយអាចផ្គត់ផ្គង់ដល់ការប្រើប្រាស់ក្នុងខេត្តទៅតាមរដូវកាល ប៉ុន្តែការនាំចូលបន្លែផ្លែឈើមកពីប្រទេសវៀតណាម គឺនៅតែមានច្រើនតោនក្នុងមួយថ្ងៃៗ ។
ជាមួយនេះ មានអ្នកលក់ខិលខូចខ្លះបានបោះតង់ ឬសង់រោងលក់បន្លែ ផ្លែឈើ ដូចជា ស្ពៃក្តោប ការុត ខ្ទឹមស ក្រូចវល្លិ ទុរេន ប័រ… នាំចូលពីស្រុកយួនតាមដងផ្លូវមុខ ចម្ការបន្លែរបស់អ្នកភូមិ ដោយប្រាប់អ្នកទិញថា ជាបន្លែដាំផ្ទាល់នៅមណ្ឌលគិរី ៕
ចែករំលែកព័តមាននេះ