ក្រុមហ៊ុនមួយទៀតផ្តើមសាកល្បងវ៉ាក់សាំងប្រឆាំង Omicron
អាមេរិក ៖ ក្រុមហ៊ុនអាមេរិក Moderna បានប្រកាសកាលពីថ្ងៃពុធ ទី២៦ មករា ម្សិលមិញថា ខ្លួនបានចាប់ផ្តើមសាកល្បងដូស
អាមេរិក ៖ ក្រុមហ៊ុនអាមេរិក Moderna បានប្រកាសកាលពីថ្ងៃពុធ ទី២៦ មករា ម្សិលមិញថា ខ្លួនបានចាប់ផ្តើមសាកល្បងដូសជំរុញនៃវ៉ាក់សាំងដែលត្រូវបានបង្កើតឡើងដើម្បីប្រឆាំងនឹងវីរុសបំប្លែងថ្មី Omicron។
ការសាកល្បងនោះនឹងត្រូវធ្វើឡើងលើមនុស្សពេញវ័យសរុប ៦០០នាក់ ដោយក្នុងនោះពួកគេពាក់កណ្តាលទទួលបានការចាក់វ៉ាក់សាំង Modernaចំនួន ២ដូសរួចកាលពីរយៈពេល ៦ខែមុន និងពាក់កណ្តាលទៀតចាក់វ៉ាក់សាំង ២ដូស និងដូសជំរុញរួច។
ដូសជំរុញសម្រាប់ប្រឆាំង Omicron នេះនឹងត្រូវធ្វើការវាយតម្លៃ បន្ទាប់ពីការចាក់ដូសទី ៣ និងដូសទី ៤។ ក្រុមហ៊ុនបានផ្សព្វផ្សាយពីលទ្ធផលនៃប្រសិទ្ធភាពប្រឆាំងនឹងវីរុស Omicron របស់ដូសជំរុញដែលត្រូវបានអនុញ្ញាតឲ្យប្រើប្រាស់រួច។
ក្រុមហ៊ុននិយាយថា រយៈពេល៦ខែក្រោយពេលចាក់ដូសជំរុញ កម្រិតនៃអង្គបដិប្រាណប្រឆាំងនឹង Omicron ថយចុះចំនួន ៦ដង បើធៀបទៅនឹងការចាក់បានរយៈពេល ២៩ថ្ងៃដែលអង្គបដិប្រាណមានកម្រិតខ្ពស់ខ្លាំង។
ទិន្នន័យទាំងនេះទទួលបានតាមរយៈការសិក្សាទៅលើឈា.មរបស់មនុស្សចំនួន២០នាក់ដែលចាក់វ៉ាក់សាំងដូសជំរុញ ពាក់កណ្តាលទៀតចាក់បាន ២ដូស។
ការប្រកាសរបស់ Moderna កើតឡើងមួយថ្ងៃប៉ុណ្ណោះ ក្រោយពេលក្រុមហ៊ុនធំៗចំនួន ២គឺ Pfizer និង BioNTech បានប្រកាសពីការសាកល្បងវ៉ាក់សាំងប្រឆាំង Omicron របស់ពួកគេ។
Pfizer និយាយថា វ៉ាក់សាំងដើមចំនួន ២ដូសប្រហែលមិនមានប្រសិទ្ធភាពប្រឆាំងនឹងវីរុសបំលែងថ្មី Omicron ឡើយ ហើយប្រសិទ្ធភាពរបស់វាក្នុងការការពារពីការចូលពេទ្យ និងការស្លា.ប់អាចនឹងថយចុះ។
ទោះយ៉ាងណា មជ្ឈមណ្ឌលគ្រប់គ្រង និងបង្ការជំងឺអាមេរិក បាននិយាយថាដូសទី ៣នៃប្រភេទវ៉ាក់សាំងដូចជា Pfizer-BioNTech បានផ្តល់ការពារពារ ៩០ភាគយពីការចូលពេទ្យប្រឆាំងវីរុសកូវីដ ១៩។
ប្រទេសមួយចំនួន រួមទាំងកម្ពុជាផងដែរ បានចាប់ផ្តើមផ្តល់ការចាក់វ៉ាក់សាំងដូសទី ៤ដលពលរដ្ឋរបស់ខ្លួន ប៉ុន្តែការសិក្សាថ្មីៗរបស់អ៊ីស្រាអ៊ែលបង្ហាញថា ខណៈដែលវ៉ាក់សាំងដូសទី ៤ជំរុញអង្គបដិប្រាណ កម្រិតនៃប្រព័ន្ធការពារនោះមិនទាន់គ្រប់គ្រាន់អាចការពារវីរុស Omicron បានឡើយ។
សូមបញ្ជាក់ថា បច្ចុប្បន្ន វីរុសបំប្លែងថ្មី Omicron កំពុងរាតត្បាតយ៉ាងខ្លាំងនៅក្នុងពិភពលោក ដោយប្រទេសមួយចំនួនក្នុងតំបន់អ៊ឺរ៉ុបមានអ្នកឆ្លងប្រចាំថ្ងៃលើស ១០០.០០០ករណី។
គិតត្រឹមថ្ងៃទី ២៦ ខែមករានេះ ពិភពលោកយើងមានអ្នកឆ្លងកូវីដជាង ៣៥៩លាននាក់ និងស្លា.ប់ជាង ៥,៦២លានាក់៕ (យោងតាមប្រភព៖ AFP)
ចែករំលែកព័តមាននេះ