រាជធានីភ្នំពេញ ៖ ចប់ពីវេទិការទេសចរណ៍អាស៊ានដែលកម្ពុជាធ្វើជាម្ចាស់ផ្ទះនៅដើមឆ្នាំ ២០២២ នៅខែធ្នូចុងឆ្នាំ ២០២២ កម្ពុជានឹងធ្វើជាម្ចាស់ផ្ទះរៀបចំ «មហាសន្និបាតក្លឹបឆ្នេរសមុទ្រដែលស្អាតបំផុតលើសកលលោក» ទៀត នៅខេត្តព្រះសីហនុ…
រាជធានីភ្នំពេញ ៖ ចប់ពីវេទិការទេសចរណ៍អាស៊ានដែលកម្ពុជាធ្វើជាម្ចាស់ផ្ទះនៅដើមឆ្នាំ ២០២២ នៅខែធ្នូចុងឆ្នាំ ២០២២ កម្ពុជានឹងធ្វើជាម្ចាស់ផ្ទះរៀបចំ «មហាសន្និបាតក្លឹបឆ្នេរសមុទ្រដែលស្អាតបំផុតលើសកលលោក» ទៀត នៅខេត្តព្រះសីហនុ ភ្ជាប់ជាមួយរមណីយដ្ឋានតារាសាគរ ក្នុងខេត្តកោះកុង ។
លោក ប្រ៊ុយណូ បូដាដ អគ្គនាយកក្លឹបឆ្នេរសមុទ្រដែលស្អាតបំផុតលើសកលលោកបានបញ្ជាក់នៅក្នុងលខិលិតមួយផ្ញើជូនរដ្ឋាភិបាលកម្ពុជា ថា មហាសន្និបាតក្លឹបឆ្នេរសមុទ្រដែលស្អាតបំផុតលើសកលលោកនេះ នឹងក្លាយជាឱកាសដ៏ល្អដើម្បីបង្ហាញដល់ប្រទេសជាសមាជិកក្លឹបឆ្នេរនូវគំរូពិសេសក្នុងការអភិវឌ្ឍតំបន់ឆ្នេរសមុទ្រ ដែលសម្រេចបានដោយកម្ពុជា ។
លោក នី ផល្លី អនុរដ្ឋលេខាធិការក្រសួងទេសចរណ៍ និងជាអគ្គលេខាធិការរងនៃអគ្គលេខាធិការដ្ឋានគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា បានឱ្យដឹងថា យោងតាមបទពិសោធន៍ដែលលោកធ្លាប់បំពេញការងារជាមួយលោក ប្រ៊ុយណូ បូដាដ គឺលោក ប្រ៊ុយណូ មានការកោតសរសើរចំពោះកម្ពុជាយ៉ាងខ្លាំង ។ លោកថា ការជ្រើសរើសប្រទេសកម្ពុជាជាទីតាំងរៀបចំមហាសន្និបាតក្លឹបឆ្នេរនេះ មិនមែនជារឿងចៃដន្យនោះឡើយ ។
លោក នី ផល្លី ថាលោកអគ្គនាយកក្លឹបឆ្នេរ មានសុទិដ្ឋិនិយមថា ឆ្លងតាមបទពិសោធន៍នៃការរៀបចំវេទិកាទេសចរណ៍អាស៊ានឆ្នាំ២០២២ (ATF 2022) របស់កម្ពុជាទទួលបានជោគជ័យនោះ កម្ពុជាពិតជាមានសមត្ថភាពគ្រប់គ្រាន់ក្នុងការរៀបចំមហាសន្និបាតរបស់ក្លឹបឆ្នេរ គឺកម្ពុជារៀបចំបានល្អទាំងការគ្រប់គ្រងផ្នែកសុខាភិបាល សុវត្ថិភាព សណ្ដាប់ធ្នាប និងការទទួលបដិសណ្ឋារកិច្ចបានល្អគ្រប់ជ្រុងជ្រោយ ។
ក្លឹបឆ្នេរសមុទ្រដែលស្អាតបំផុតលើសកលលោក ត្រូវបានបង្កើតឡើងនៅថ្ងៃទី ១០ ខែមីនា ឆ្នាំ ១៩៩៧ ដែលមានស្នាក់ការកណ្តាលនៅទីក្រុងវ៉ាន (Vannes) នៃប្រទេសបារាំង ។ បច្ចុប្បន្នមានប្រទេសជាសមាជិកចំនួន ២៦ ប្រទេស ។ ក្នុងចំណោមប្រទេសទាំង ២៦នេះ គឺមានឆ្នេរសមុទ្រសរុបចំនួន ៤៤ ឆ្នេរដែលបានចូលជាសមាជិក ៕
ចែករំលែកព័តមាននេះ