ខេត្តប៉ៃលិន ៖ ទោះបីឆ្នាំនេះស្ថានភាពរកស៊ីហាក់បានប្រសើរជាងឆ្នាំមុនយ៉ាងណាក្តី ពលរដ្ឋដែលជាប់សែស្រឡាយចិន និងវៀតណាមមួយនៅមិនទាន់មានប្រាក់ច្រើន ដើម្បីរៀបចំពិធីសែនក្នុងឱកាសចូលឆ្នាំថ្មីប្រពៃណីចិន និងវៀតណាម នោះនៅឡើយទេ ។ នៅឯខេត្តប៉ៃលិនទោះបីពលរដ្ឋកាត់ចិន…
ខេត្តប៉ៃលិន ៖ ទោះបីឆ្នាំនេះស្ថានភាពរកស៊ីហាក់បានប្រសើរជាងឆ្នាំមុនយ៉ាងណាក្តី ពលរដ្ឋដែលជាប់សែស្រឡាយចិន និងវៀតណាមមួយនៅមិនទាន់មានប្រាក់ច្រើន ដើម្បីរៀបចំពិធីសែនក្នុងឱកាសចូលឆ្នាំថ្មីប្រពៃណីចិន និងវៀតណាម នោះនៅឡើយទេ ។ នៅឯខេត្តប៉ៃលិនទោះបីពលរដ្ឋកាត់ចិន និងវៀតណាមមួយចំនួនបានទៅផ្សារទិញសម្ភារ និងនំចំណីត្រៀមសែនចូលឆ្នាំក្តី តែអ្នកលក់និយាយថានៅមិនទាន់ដូចកាលមិនទាន់ផ្ទុះកូវីដ ១៩ នោះទេ ។
អ្នកស្រី សុផល អាជីវករលក់គ្រឿងទេស និងសម្ភារសែនព្រេន នៅក្នុងផ្សារប៉ាហ៊ី ក្រុងប៉ៃលិន បាននិយាយរៀបរាប់ឱ្យដឹងថា ឆ្នាំ២០២២ នេះ ការលក់របស់សែនហាក់ដាច់ជាងឆ្នាំ ២០២១ ពោលគឺ ចាប់តាំងពីថ្ងៃទី ២៣ ខែមករា ឆ្នាំ ២០២២ មកម្លេះ ព្រោះនៅថ្ងៃទី ២៦ មករា ខាងមុខនេះ គេសែនដកជើងធូប ឬសែនជូនដំណើរទេវតា ដូច្នេះការលក់ដូររបស់អាជីវករម្នាក់ៗហាក់ដូចជាមមាញឹកខ្លាំង ។
អាជីវករបានបន្តទៀតថា សម្ភារសម្រាប់សែន ដែលលក់ដាច់ជាងមានដូចជា លុយដុល្លារសែន ធូប ទៀន ផ្ទះក្រដាស ម៉ូតូ ឡាន ដែលគេយកទៅដុតសម្រាប់សែនឧទ្ទិសដល់អ្នកស្លាប់បាត់បង់ជីវិត មានឧបការីជន ជីដូនជីតា កងម៉ាជាដើមនោះ ។ ឆ្លៀតពេលមមាញឹកក្នុងការលក់ដូរអ្នកស្រី សុផល រៀបរាប់បន្ថែមថា ការលក់ដូរនៅតែមិនទាន់ដាច់ខ្លាំងដូចពេលមិនទាន់មានកូវីដ ១៩នោះទេ ព្រោះបច្ចុប្បន្នប្រជាពលរដ្ឋនៅតែពិបាករកលុយ និងមានការបារម្ភពីការឆ្លងជំងឺកូវីដ ១៩ ទើបមិនសូវចេញមកផ្សារ ។
នៅឯភ្នំពេញនេះវិញ ដើម្បីរក្សាសណ្តាប់ធ្លាប់ និងរបៀបរៀបរយទីក្រុង រដ្ឋបាលរាជធានីភ្នំពេញ បានប្រកាសថា ក្នុងឱកាសបុណ្យចូលឆ្នាំថ្មីប្រពៃណីចិន និងវៀតណាម ដែលនឹងប្រព្រឹត្តទៅចាប់ពីថ្ងៃទី ៣១ ខែមករា ឆ្នាំ ២០២២ ដល់ថ្ងៃទី ៣ ខែកុម្ភៈ ឆ្នាំ ២០២២ ខាងមុខ អាជ្ញាធរមិនអនុញ្ញាតឲ្យដុតផាវ កាំជ្រួច ឬបង្កសំឡេង ផ្ទុះគ្រប់ប្រភេទ មិនឲ្យលេងល្បែងស៊ីសង និងការហែក្បួនផ្សេងៗ ទាំងបែបសាសនា និងប្រពៃណី គ្មានការអនុញ្ញាត ។ អាជ្ញាធរនៅតែទទួចឲ្យពលរដ្ឋ អនុវត្តវិធានការសុខាភិបាលជាប់ជានិច្ចដើម្បីទប់ស្កាត់ការឆ្លងរាលដាលជំងឺកូវីដ ១៩ ៕
ចែករំលែកព័តមាននេះ