ខេត្តសៀមរាប ៖ ទោះបីក្រមប្រតិបត្តិអង្គរ បានផ្សព្វផ្សាយយ៉ាងទូលំទូលាយរយៈពេលជាច្រើនខែមកហើយក្តី តែភាពឆកល្វែងរបស់អ្នកទេសចរមួយចំនួនតូចនៅតែបន្តកើតមាន ដូចជាការស្លៀកពាក់ខ្លីមិនសមរម្យក្នុងពេលចូលទស្សនាតាមប្រាសាទជាដើម ។
ដើម្បីលើកតម្លៃរមណីយដ្ឋានអង្គរឲ្យស័ក្តិសមជាទីសក្ការនៃដួងព្រលឹងវប្បធម៌ជាតិ និងជាសម្បត្តិបេតិកភណ្ឌពិភពលោកអាជ្ញាធរជាតិអប្សរានឹងចាត់វិធានការចាប់ពីថ្ងៃទី៤ ខែសីហា ឆ្នាំ២០១៦ តទៅ ដោយតម្រូវឲ្យអ្នកទេសចរគ្រប់រូបស្លៀកពាក់ឲ្យបានសមរម្យ ខណៈពេលទិញសំបុត្រ ដើម្បីចូលទស្សនារមណីយដ្ឋានអង្គរ ។
កាលពីថ្ងៃទី១ កក្កដា ២០១៦ អគ្គនាយកដ្ឋានអាជ្ញាធរជាតិអប្សរា បានចេញសេចក្តីជូនដំណឹងដល់គ្រប់ក្រសួង មន្ទីរ ស្ថាប័នជាតិ អន្តរជាតិ សមាគមទីភ្នាក់ងារទេសចរណ៍ សមាគមមគ្គុទេ្ទសក៍ទេសចរណ៍ សមាគមសណ្ឋាគារ សមាគមដឹកជញ្ជូនភ្ញៀវទេសចរ មគ្គុទេ្ទសក៍ទេសចរណ៍ និងក្រុមហ៊ុនទេសចរណ៍ថា ដើម្បីលើកតម្លៃរមណីយដ្ឋានអង្គរឱ្យស័ក្តិសមជាទីសក្ការៈនៃដួងព្រលឹងវប្បធម៌ជាតិ និងជាសម្បត្តិបេតិកភណ្ឌពិភពលោកដ៏ល្បីល្បាញ ដែលទាក់ទាញអ្នកទេសចរមកទស្សនាកាន់តែច្រើន និងដើម្បីគ្រប់គ្រងតំបន់អង្គរប្រកបដោយចីរភាព អាជ្ញាធរជាតិអប្សរាបានផ្សព្វផ្សាយដាក់ឱ្យអនុវត្តជាផ្លូវការក្រមប្រតិបត្តិអង្គរ កាលពីថ្ងៃទី៤ ខែធ្នូ ឆ្នាំ២០១៥ និងបានចេញសេចក្តីជូនដំណឹងដល់ស្ថាប័នពាក់ព័ន្ធឱ្យជួយផ្សព្វផ្សាយបន្ត ព្រមទាំងបានផ្សព្វផ្សាយតាមរយៈបណ្តាញព័ត៌មានក្នុង និងក្រៅប្រទេសជាច្រើន ហើយទទួលបានសហការ និងគាំទ្រពីសាធារណជនទូទៅ វិស័យឯកជន និងថ្នាក់ដឹកនាំជាន់ខ្ពស់រាជរដ្ឋាភិបាល កម្ពុជា ។ ជាក់ស្តែងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបង្ហាញការគាំទ្រ ក្រមប្រតិបត្តិអង្គរ តាមរយៈប្រព័ន្ធផ្សព្វផ្សាយសង្គមហ្វេសប៊ុកផងដែរ ។
អាជ្ញាធរជាតិអប្សរានឹងជំរុញក្រមប្រតិបត្តិអង្គរនេះឱ្យកាន់តែមានប្រសិទ្ធភាព ក្នុងគោលបំណងបង្ការ និងទប់ស្កាត់ការប្រព្រឹត្តមិនសមរម្យរបស់ភ្ញៀវទេសចរ ខណៈពេលចូលទស្សនាក្នុងរមណីយដ្ឋានអង្គរ ដែលជាហេតុបង្កឱ្យមានផលប៉ះពាល់ដល់ប្រាសាទ បរិស្ថាន និងសហគមន៍ម្ចាស់ស្រុក ជាពិសេសទាក់ទងនឹងការស្លៀកពាក់របស់ភ្ញៀវឱ្យបានសមរម្យ ពេលចូលទស្សនារមណីយដ្ឋានអង្គរ ។
អាជ្ញាធរជាតិអប្សរានឹងចាត់វិធានការចាប់ពីថ្ងៃទី៤ ខែសីហា ឆ្នាំ២០១៦ តទៅ ដោយតម្រូវឱ្យអ្នកទេសចរគ្រប់រូប ត្រូវតែស្លៀកពាក់ឱ្យបានសមរម្យ ខណៈពេលទិញសំបុត្រ ដើម្បីចូលទស្សនារមណីយដ្ឋានអង្គរ ៕
ចែករំលែកព័តមាននេះ