កញ្ញារាជនី តារាចម្រៀងថ្មី ទឹកដមសំឡេងពីរោះពីធម្មជាតិ
រាជធានីភ្នំពេញ ៖ បទចម្រៀងមួយបទមានចំណងជើងថា «នរណាដូចខ្ញុំលួចស្រឡាញ់សង្សារគេ?» ដែលទើបបង្ហោះនៅតាមហ្វេសប៊ុក និង YouTube កាលពីពេលថ្មីៗ កន្លងមកទទួលបានការចាប់អារម្មណ៍
រាជធានីភ្នំពេញ ៖ បទចម្រៀងមួយបទមានចំណងជើងថា «នរណាដូចខ្ញុំលួចស្រឡាញ់សង្សារគេ?» ដែលទើបបង្ហោះនៅតាមហ្វេសប៊ុក និង YouTube កាលពីពេលថ្មីៗ កន្លងមកទទួលបានការចាប់អារម្មណ៍ខ្លាំងពីបណ្ដាប្រិយមិត្តអ្នកស្ដាប់ ដោយខ្លះ Like ខ្លះComment ខ្លះShare ក្នុងន័យពេញចិត្ត បើទោះជាម្ចាស់បទចម្រៀងនេះជាតារាចម្រៀងថ្មី មិនធ្លាប់មានបទពិសោធប្រឡូកក្នុងវិស័យសិល្បៈចម្រៀងកន្លងមកក៏ដោយ។
ពេលភ្នាក់ងារកោះសន្តិភាពជួបសម្ភាសន៍ដោយផ្ទាល់ កញ្ញារាជនី និយាយទាំងញញឹមស្រស់ថា «នាងខ្ញុំសប្បាយរីករាយខ្លាំងណាស់ ដែលបទចម្រៀង Original Song ដំបូងរបស់នាងខ្ញុំ ហាក់ទទួលបានការគាំទ្រពីប្រិយមិត្តគួរឱ្យកត់សម្គាល់ ទាំងមិនទាន់បានផ្សព្វផ្សាយឱ្យទូលំទូលាយនៅឡើយនោះ ដែលជាកម្លាំងចិត្តមួយជម្រុញឱ្យនាងខ្ញុំមានទឹកចិត្តប្រឹងប្រែងហ្វឹកហាត់ច្រៀងបទ ក្រោយៗឱ្យបានកាន់តែល្អបន្ថែមទៀត ដើម្បីកំដរអារម្មណ៍ប្រិយមិត្តអ្នកស្ដាប់ ព្រោះនៅពេល ឆាប់ៗខាងមុខនេះនាងខ្ញុំនឹងមានបទចម្រៀងថ្មីចំនួន៥បទទៀត ដែលនឹងត្រូវផ្សព្វផ្សាយជាបន្ត» ។
នៅពេលសួរបញ្ជាក់ពីចំណងជើង និងប្រភេទបទដែលនឹងត្រូវចេញផ្សាយបន្តនោះ រាជនី សុំលាក់សិន តែចំពោះប្រភេទបទវិញភាគច្រើនបែបមនោសញ្ចេតនាស្នេហាដែលមនុស្សគ្រប់រូបតែងជួបប្រទះក្នុងរឿងស្នេហា។ រាជនីបានបន្ថែមពីអារម្មណ៍ពិតទាំងរំភើបចិត្តថា «តាមពិតទៅនាងខ្ញុំមិនដែលគិតថា នាងខ្ញុំនឹងមានបទចម្រៀង Original Song ដ៏ពីរោះបែបនេះជារបស់ខ្លួនឡើយ ដូច្នេះនាងខ្ញុំសូមថ្លែងអណរគុណយ៉ាងខ្លាំងចំពោះលោកគង់ រង្សី ជាអ្នកនិពន្ធកម្ពុជាដ៏ឆ្នើមមួយរូប ដែលបាននិពន្ធបទចម្រៀងនេះឡើង និងជ្រើសរើសយករូបនាងខ្ញុំជាតារាចម្រៀងដែលជាការផ្ដល់ឱកាសដ៏ធំមួយសម្រាប់ជីវិតនាងខ្ញុំក្នុងវិស័យសិល្បៈ ដែលបានត្រឹមតែស្រមៃកន្លងមក» ។
កញ្ញារាជនី បានថ្លែងអំណរគុណយ៉ាងជ្រាលជ្រៅចំពោះប្រិយមិត្តអ្នកស្ដាប់ទាំងឡាយដែលគាំទ្របទចម្រៀងដំបូងរបស់នាង និងសំណូមពរដល់ជនរួមជាតិកម្ពុជាបន្តគាំទ្រវិស័យសិល្បៈចម្រៀង Original Songs ខ្មែរឱ្យកាន់តែខ្លាំងឡើងជាបន្តទៅទៀត ដើម្បីភាពរីកចម្រើននៃសង្គមជាតិកម្ពុជាតាមរយៈវិស័យសិល្បៈចម្រៀង»។
កញ្ញារាជនី មានអាយុ២០ឆ្នាំ ជាតារាចម្រៀង Original Songs មួយរូបដែលមានដើមកំណើតនៅរាជធានីភ្នំពេញ ។ ចង់ដឹងថា តើបទចម្រៀង ក្រោយៗរបស់រាជនីពីរោះប្រកបដោយអត្ថន័យយ៉ាងណានោះ សូមរង់ចាំតាមដាននៅថ្ងៃខាងមុខទៀត ៕
ចែករំលែកព័តមាននេះ