រាជធានីភ្នំពេញ ៖ គេមិនដឹងថាពលរដ្ឋនៅខេត្តកំពង់ស្ពឺម្ចាស់ដីដើម បានលក់របស់ខ្លួនហើយឬនៅពេលនោះទេ បើសិនជានៅ នៅពេលនេះអាចនឹងត្រូវប៉ាន់ ពីព្រោះអ្នករស់ស៊ីដីធ្លីបានមើលឃើញថា ខេត្តកំពង់ស្ពឺ បានកំពុងទាក់ទាញគម្រោងវិនិយោគធំៗ ក្នុងវិស័យឧស្សាហកម្ម ខណៈគម្រោងរោងចក្រមួយចំនួន ត្រូវផ្លាស់ចេញពីភ្នំពេញ និងគម្រោងថ្មីក៍បានបង្កើតដែរ ដែលមានតម្រូវការទីតាំងរោងចក្រនិងសហគ្រាសរបស់គេនោះ ។
លោក ប៊ូ សេងហ៊ួ ប្រធានសាខានៃក្រុមហ៊ុន Century 21 Zillion Holding ប្រចាំខេត្តកំពង់ស្ពឺ បានឱ្យដឹងថា តំបន់នៅតាមផ្លូវជាតិលេខ ៣ និងផ្លូវជាតិលេខ ៤ និងផ្លូវជាតិលេខ ៥១ ជាដើមសុទ្ធសឹងមានសក្តានុពលវិនិយោគដោយសារនៅជាប់ផ្លូវសំខាន់ៗ ។ លោកបន្តថា បច្ចុប្បន្ននេះ មានរោងចក្រមួយចំនួនហើយ បានផ្លាស់ប្តូរពីរាជធានីភ្នំពេញ តាមផែនការរបស់សាលាក្រុងក្នុងការ ទៅកាន់តំបន់ជាយៗរាជធានីភ្នំពេញ ក្នុងនោះបានទៅដល់ភូមិសាស្ត្រខេត្តកំពង់ស្ពឺដែរ ។
លោកថា ទីតាំងភូមិសាស្ត្រក្នុងខេត្តកំពង់ស្ពឺ ដែលងាយស្រួលក្នុងការដឹកជញ្ជូនទំនិញចេញ ចូលរោងចក្រទៅកាន់ពីកំពង់ផែទឹកជ្រៅក្រុងព្រះសីហនុ និងពីរោងចក្រទៅកាន់កំពង់ផែទឹកជ្រៅវិញ មានភាពងាយស្រួល ដែលជំរុញឱ្យអ្នកអភិវឌ្ឍន៍កាន់តែច្រើន ចូលទៅកាន់តំបន់នៃខេត្តកំពង់ស្ពឺ ។ លោកថា៖ «យើងបានឃើញហើយថា ក្រុមប្រឹក្សាអភិវឌ្ឍន៍បានចេញវិញ្ញាបនបត្រ ចុះបញ្ជីក្រុមហ៊ុនវិនិយោគជាបន្តបន្ទាប់ហើយក្នុងនោះដែរ កំពង់ស្ពឺក៏ទទួលបានគម្រោងវិនិយោគរោងចកក្រជាច្រើន គម្រោងផងដែរ ដែលមានទាំងគម្រោងរោងចក្រចេញ ពីភ្នំពេញចូលមកកាន់កំពង់ស្ពឺដែរ» ។
លោក ប៉ូ អ៊ាវគង់ ប្រធានក្រុមហ៊ុនអចលនទ្រព្យ Advance បានឱ្យដឹងផងដែរថា នៅពេលទីក្រុងភ្នំពេញមានការរីកចម្រើន តម្រូវការដីសម្រាប់ប្រើប្រាស់ជាតំបន់លំនៅឋាន និងពាណិជ្ជកម្មកាន់តែច្រើន ។ លោកថាដីធ្លីសម្រាប់បម្រើដល់ផ្នែកនេះ នឹងកាន់តែឡើងថ្លៃ ដូច្នេះសម្រាប់រោងចក្រថ្មីៗ មិនអាចឈរជើងឬបោះទីតាំង នៅក្នុងតំបន់ជិតក្រុងបានទេ ដោយសារតែតម្លៃដីធ្លីបានឡើងខ្ពស់ ។ ដើម្បីឱ្យការវិនិយោគបានផលចំណេញ ម្ចាស់គម្រោងរោងចក្រ ត្រូវការរកទីតាំងណាដែលឆ្ងាយតម្លៃជួលទីតាំងទាប ជាពិសេសងាយស្រួល ក្នុងការដឹកជញ្ជូនទៅកាន់កំពង់ផែ សម្រាប់នាំចេញទៅកាន់ទីផ្សារអន្តរជាតិ ។
លោកបន្តថា សម្រាប់តំបន់ឧស្សាហកម្ម លោកមើលឃើញថា នៅតាមបណ្ដោយផ្លូវជាតិលេខ៤ លេខ៣និងលេខ២ ជាផ្លូវជាតិដែលមានការទាក់ទាញ លើគម្រោងរោងចក្រជាងគេ ព្រោះជាតំបន់ដែលមានការអភិវឌ្ឍផ្លូវថ្មី មានផ្លូវតភ្ជាប់ទៅកំពង់ផែ និងតភ្ជាប់ទៅតំបន់ច្រកព្រំដែនកម្ពុជាជាដើម ៕
ចែករំលែកព័តមាននេះ