រាជធានីភ្នំពេញ៖ ពលរដ្ឋអ្នកចិញ្ចឹមជ្រូក លក្ខណៈគ្រួសារតាមភូមិ បានត្អូញពីការខាតបង់ ក្នុងការចិញ្ចឹមជ្រូក ។ ខាតបង់ថវិកាដោយសារសាច់ជ្រូករស់ ធ្លាក់ថ្លៃចំណីវិញចេះតែឡើងថ្លៃមិនឈប់ ។
កញ្ញា ស៊ាន នីម ពលរដ្ឋអ្នកចិញ្ចឹមជ្រូកលក្ខណៈគ្រួសារ រកចំណូលបន្ថែមផ្គត់ផ្គង់គ្រួសារម្នាក់ បាននិយាយថា តម្លៃជ្រូករស់បច្ចុប្បន្នបានត្រឹម ៩ ពាន់រៀលប៉ុណ្ណោះក្នុងមួយគីឡូក្រាម ។ ពលរដ្ឋអ្នកឃុំសំបួរ ស្រុកទ្រាំង ខេត្តតាកែវ រូបនេះនិយាយបន្តថាទោះបីក្នុងតម្លៃដែលមិនចំណេញនេះយ៉ាង ក៍កញ្ញានឹងបង្ខំចិត្តលក់ជ្រូក ៤ ក្បាលរបស់ខ្លួន នៅពេលឆាប់ៗនេះ ពីព្រោះខ្លាចជ្រូករបស់ខ្លួនឆ្លងជំងឺពីសត្វជ្រូករបស់ពលរដ្ឋផ្សេងបណ្តាលឲ្យងាប់ ចឹងកាន់តែខាតបង់មិនបាន ។
អ្នកចិញ្ចឹមជ្រូកនៅក្នុងខេត្តតាកែវ ខាងលើរៀបរាប់ថា៖ «កាលពីវគ្គមុខខ្ញុំលក់ជ្រូករស់បានថ្លៃ ១២ ០០០ រៀល តែពេលនេះបានតែ ៩ ពាន់រៀល ។ វាប្រាកដជាមិនសូវចំណេញទេ ប៉ុន្តែសំណាងដែលខ្ញុំមិនសូវទិញចំណីឲ្យវាស៊ី ពីព្រោះខ្ញុំកែច្នៃចំណីលាយកាកសំណល់ពីការផលិតស្រាស ។ ពលរដ្ឋផ្សេងទៀតដែលគាត់ឲ្យចំណីទិញពីផ្សារប្រាកដជាមិនចំណេញទេ ពីព្រោះចំណីឡើងថ្លៃខ្លាំងណាស់ ។ យើងចិញ្ចឹមជ្រូកគ្មានជម្រើសទេដោយសារតម្លៃអាស្រ័យលើឈ្មួញប៉ុណ្ណោះ» ។
ក្រៅពីសាច់ជ្រូករស់ធ្លាក់ ការចិញ្ចឹមជ្រូករបស់អ្នកភូមិមានការប្រឈមនឹងជំងឺជ្រូកផងដែរ ។ ពលរដ្ឋសង្ឃឹមថា ឱកាសចូលឆ្នាំថ្មីប្រពៃណីរបស់ជនជាតិចិន និងវៀតណាម នៅសប្តាហ៍ក្រោយនេះជ្រូករស់នឹងអាចឡើងថ្លៃបន្តិច ដោយសារមានតម្រូវការខ្ពស់ ។
លោកស្រ៊ុនពៅ ប្រធានសមាគមអ្នកចិញ្ចឹមសត្វកម្ពុជា ហាក់មានសង្ឃឹមដូចពលរដ្ឋចិញ្ចឹមជ្រូកដែរ ។ លោកថាបើនៅកំលុងខែកុម្ភៈនេះ តម្លៃជ្រូករស់មិនបានឡើងទេ កសិករចិញ្ចឹមជ្រូកលក្ខណៈគ្រួសារ អាចប្រឈមការក្ស័យធុន ។ បច្ចុប្បន្ននេះកសិករចិញ្ចឹមជ្រូក ចំណាយថ្លៃដើមផលិតខ្ពស់សូម្បីតែកូនជ្រូក ដែលអ្នកចិញ្ចឹមទិញយកទៅចិញ្ចឹមនោះ ក៍ឡើងថ្លៃដែរ ចំណែកចំណីជ្រូកមានការឡើងថ្លៃ ប្រមាណថ្លៃ ៤០% ពីថ្លៃធម្មតា ៕
ចែករំលែកព័តមាននេះ