រាជធានីភ្នំពេញ៖ យោងតាមការស្រាវជ្រាវរបស់លោកវេជ្ជបណ្ឌិតផ្នែកថ្នាំបង្ការប្រទេសវៀតណាមនិង កម្ពុជាបានឲ្យដឹងថា ជំងឺ រលាកខួរក្បាលប្រភេទ ជេអ៊ី(JE) អាចសម្លាប់មនុស្សប្រមាណ១៥០០០នាក់ នៅក្នុងតំបន់អាស៊ី ។
លោកវេជ្ជបណ្ឌិតThomas Gaudry ប្រធានផ្នែកថ្នាំបង្ការប្រចាំប្រទេសវៀតណាមនិងកម្ពុជា បានលើកឡើងក្នុងពិធីសម្ពោធផលិតផលថ្នាំបង្ការជំងឺរលាកខួរក្បាល IMOJEV (អ៊ីម៉ូជេហ្វ) ថ្នាំបង្ការជំងឺរលាកខួរក្បាលជេអ៊ី (JE)នៅសណ្ឋាគា រសុខាភ្នំពេញកាលពីពេលថ្មីៗនេះថា «ជំងឺរលាកខួរក្បាលជេអ៊ី(JE) នេះជាមូលហេតុដ៏ចម្បងមួយនៃពិការភាពផ្នែកប្រព័ន្ធប្រសាទ។
លោកវេជ្ជបណ្ឌិតបន្តថា យ៉ាងហោចណាស់៥០% នៃកុមារដែលរស់រានមានជីវិតពីជំងឺនេះ ក៏នៅតែបន្សល់ទុកនូវផលវិបាកធ្ងន់ធ្ងរជាច្រើនចំពោះអ្នកជំងឺផ្ទាល់ក៏ដូចជាក្រុមគ្រួសារ ព្រោះតែជំងឺរលាកខួរក្បាលជេអ៊ី (JE)នេះ ប៉ះពាល់ពេញមួយជីវិតរបស់កុមារ និងមនុស្សពេញវ័យទូទៅ ។ តាមការប៉ាន់ស្មាន មានករណីជំងឺប្រមាណ៦០០០០នាក់ និងមានករណីស្លាប់ប្រមាណ១៥០០០នាក់ ក្នុងមួយឆ្នាំនៅតំបន់អាស៊ីនេះ»។ ដោយឡែកលោកវេជ្ជបណ្ឌិត Alain Bouckenooghe អនុប្រធានទទួលបន្ទុកផ្នែកកិច្ចការវេជ្ជសាស្ត្រ និងផ្នែកស្រាវជ្រាវ និងអភិវឌ្ឍប្រចាំតំបន់អាស៊ីប៉ាស៊ីហ្វិក បានពន្យល់ថាជំងឺនេះមិនមែនជាជំងឺឆ្លងពីមនុស្សទៅមនុស្សឡើយ ប៉ុន្តែវាជាជំងឺដែលឆ្លងតាមរយៈសត្វមូស ដែលត្រូវបានគេស្គាល់ឈ្មោះវាថាគុយលិច ឬជាភាសាឡាតាំងថា Culex Tritaeniorhynchus។ រោគសញ្ញានៃជំងឺរលាកខួរក្បាលនេះ គឺមានគ្រុនក្តៅខ្លាំង ក្អួតចង្អោរ ប្រកាច់ រឹង ក រឹងសាច់ដុំនិងមានចលនាមិនធម្មតា។
វេជ្ជបណ្ឌិតរូបនេះបញ្ជាក់ផងដែរថាមនុស្សគ្រប់គ្នាអាចចាក់ថ្នាំបង្ការការពារជំងឺរលាកខួរក្បាលជេអ៊ី (JE)នេះបាន ចាប់ពីកុមារអាយុ ៩ខែ រហូតដល់មនុស្សពេញវ័យ ។ ការចាក់ថ្នាំបង្ការនេះមានភាពចាំបាច់ ព្រោះវាអាចការពារជំងឺនេះ បានយ៉ាងប្រសើរជាពិសេសមនុស្សដែលងាយរងគ្រោះឬមនុស្ស ដែលស្ថិតនៅក្នុងចំណោមអ្នកដែលមានជំងឺ ។ ទោះជាយ៉ាងណា រាល់ការទទួលសេវាចាក់ថ្នាំបង្ការ ត្រូវតែធ្វើជាមួយគ្រូពេទ្យដែលមានជំនាញច្បាស់លាស់៕
ចែករំលែកព័តមាននេះ