លក្ខណៈទូទៅ
ដោយសារតែប្រវែងបណ្តោយដ៏វែងរបស់វា និងទម្ងន់២០គីឡូក្រាមទើបមនុស្សគ្រប់គ្នាច្រឡំថាវាជាអន្ទង់ តែការណ៍ពិតវាជាត្រីអគ្គិសនីខ្លួនវែងតែមួយគត់ក្នុងអម្បូរត្រី Knifefish ឬត្រីកាំបិត ពោលគឺជាប្រភេទត្រីធំបំផុងក្នុងក្រុមត្រី Gymnotiformes ។ ត្រីអគ្គិសនីជាប្រភេទត្រីខុសប្លែកពីត្រីផ្សេងទៀត ពោលគឺវាមានថាមពលអគ្គិសនីអាចឆក់សត្វក្នុងទឹក ឬមនុស្សបានដោយកម្លាំងឆក់ជិត៩០០វ៉ុល និងចរន្តអគ្គិសនី១អំពែឯណោះ ។ ត្រីអគ្គិសនីហែលបាន ៨គីឡូម៉ែត្រក្នុង១ម៉ោង និងមានអាយុកាលពី ១៥ឆ្នាំទៅ២២ឆ្នាំ ។
សណ្ឋាន និងសរីរាង្គពិសេស
ដូចបង្ហាញក្នុងរូបត្រីអគ្គិសនីមានប្រវែងប្រហែល២ម៉ែត្រ និងខ្នងពណ៌ប្រផះក្រមៅ ចំណែកពោះវិញពណ៌លឿង ឬពណ៌ទឹកក្រូច។ វាគ្មានស្រកាទេ ។ ជាទូទៅឈ្មោលមានទំហំតូចជាងញី ។ លក្ខណៈពិសេសរបស់ត្រីអគ្គិសនី គឺមានសរីរាង្គពោះ៣គូ ដូចជាសរីរាង្គសំខាន់ សរីរាង្គ Hunter និងសរីរាង្គ Sach ដែលផលិតថាមពលអគិ្គសនី ។
សរីរាង្គទាំងនេះបង្កើតឡើងពីសរីរាង្គអគ្គិសនីដែលមានចរន្តអីុយ៉ុងហូរចុះ-ឡើងក្នុងរាងកាយ ដូច្នេះហើយទើបបង្កើតចរន្តឆក់ពីរប្រភេទផ្សេងគ្នា គឺចរន្តឆក់កម្រិតវ៉ុលទាប (Low Volt) និងចរន្តឆក់កម្រិតវ៉ុលខ្ពស់ (High Volt) ។ ត្រីអគ្គិសនីបញ្ចេញចរន្តឆក់នៅពេលដែលវាឃើញចំណី និងសត្វផ្សេងទៀតព្យាយាមវាយប្រហារវាដោយកម្លាំងឆក់មានរយៈពេល២វិនាទី ។ កម្លាំងឆក់ជិត៩០០វ៉ុល និង១អំពែមិនអាចធ្វើឱ្យមនុស្សស្លាប់បានទេ ។ ទោះជាយ៉ាងណាក៏ដោយគ្មាននរណាម្នាក់ហ៊ានចាប់វាទេព្រោះតែកម្លាំងអគ្គិសនីរបស់វា ។
ជម្រក និងការបន្តពូជ
ជម្រករបស់ត្រីអគ្គិសនីនៅទឹកសាបក្នុងតំបន់អាម៉ាហ្សូន និងទន្លេ Orinoco ដែលជាទន្លេវែងជាងគេនៅទ្វីបអាមេរិកខាងត្បូង ។ ក្រៅពីនេះអ្នកស្រាវជ្រាវនឹងឃើញវាក្នុងតំបន់លិចទឹក វាលល្បាប់ ព្រែក និងទន្លេ តូចៗ ។ វាតែងតែរស់នៅក្នុងបាតភក់ ឬទឹកនឹង។ អាហាររបស់ត្រីអគ្គិសនីគឺសត្វឥតឆ្អឹងកង ។ ដោយឡែកត្រីអគ្គិសនីពេញវ័យស៊ីត្រី និងថនិកសត្វដូចជាកណ្តុរជាដើម ។ ត្រីអគ្គិសនីត្រូវបានគេស្គាល់ថាជាប្រភេទត្រីមានវិធីសាស្ត្របង្កាត់ពូជខុសប្លែកពីត្រីផ្សេងទៀត ពោលគឺនៅរដូវក្តៅឈ្មោលធ្វើសម្បុកពីទឹកមាត់របស់វាដើម្បីឱ្យញីក្រាបពងហើយក្នុង១សម្បុកអាចញាស់កូនដល់ទៅ៣.០០០ក្បាលឯណោះ ៕
ចែករំលែកព័តមាននេះ