ខេត្តបាត់ដំបង៖ អ្នកនាំពាក្យរដ្ឋបាលខេត្តបាត់ដំបង នៅថ្ងៃទី១៩ ខែមករានេះ បានចេញសេចក្តីបំភ្លឺ ជុំវិញការបង្ហោះសារ និងរូបភាពរបស់គណនី Facebook ឈ្មោះ Ly…
ខេត្តបាត់ដំបង៖ អ្នកនាំពាក្យរដ្ឋបាលខេត្តបាត់ដំបង នៅថ្ងៃទី១៩ ខែមករានេះ បានចេញសេចក្តីបំភ្លឺ ជុំវិញការបង្ហោះសារ និងរូបភាពរបស់គណនី Facebook ឈ្មោះ Ly Dinory ដែលបានលើកឡើងថា រដ្ឋបាលខេត្តបាត់ដំបង ធ្វើការនិយមបក្សពួក និងបានបង្ហោះលិខិតគោរពជូនសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដែលមានខ្លឹមសារស្នើសុំអនុញ្ញាតលាឈប់ពីក្របខណ្ឌមន្ត្រីរាជការស៊ីវិលក្រសួងមហាផ្ទៃ។
ជុំវិញករណីនេះ រដ្ឋបាលខេត្តបាត់ដំបង បានបំភ្លឺជូនសាធារណជនថា លោក លី ឌីនូរី បច្ចុប្បន្នជាមន្ត្រីការិយាល័យគ្រប់គ្រងបុគ្គលិក នៃទីចាត់ការគ្រប់គ្រងធនធានមនុស្សសាលាខេត្តបាត់ដំបង។ កន្លងមក លោក លី ឌីនូរី ធ្លាប់កាន់មុខតំណែងជាអភិបាលរងនៃគណៈអភិបាលស្រុកថ្មគោល ប៉ុន្តែដោយសារតែភាពអសកម្មក្នុងការបំពេញតួនាទីរបស់លោក និងការអនុវត្តតួនាទី ភារកិច្ចមិនចុះសម្រុងជាមួយក្រុមប្រឹក្សាស្រុកថ្មគោល គណៈអភិបាលស្រុកថ្មគោល និងមន្ត្រីរាជការតាមបណ្តាអង្គភាពចំណុះរដ្ឋបាលស្រុកថ្មគោលផងនោះ ទើបលោក លី ឌីនូរី ត្រូវបានក្រសួងមហាផ្ទៃ សម្រេចផ្ទេរភារកិច្ចពីអភិបាលរងស្រុកថ្មគោល ឲ្យមកបម្រើការងារជាមន្ត្រីនៅសាលាខេត្តបាត់ដំបង ក្នុងអំឡុងខែមីនា ឆ្នាំ២០១៩។
លិខិតបំភ្លឺរបស់រដ្ឋបាលខេត្តបាត់ដំបង បន្តថា ក្រោយពីបានមកបម្រើការងារជាមន្ត្រីនៅការិយាល័យគ្រប់គ្រងបុគ្គលិក នៃទីចាត់ការគ្រប់គ្រងធនធានមនុស្សសាលាខេត្ត បានចំនួន ៤ខែ សាមីខ្លួន បានដាក់ពាក្យស្នើសុំស្ថិតនៅក្រៅក្របខណ្ឌដើម ដើម្បីទៅបំពេញមុខងារ ជាទីប្រឹក្សាក្រសួងសង្គមកិច្ច អតីតយុទ្ធជន និងយុវនីតិសម្បទា មានឋានៈស្មើអគ្គនាយក និងបានដាក់ពាក្យស្នើសុំចូលបម្រើការងារ នៅក្នុងអង្គភាពដើមវិញ នៅថ្ងៃទី២៧ ខែឧសភា ឆ្នាំ២០២០។
រដ្ឋបាលខេត្តបាត់ដំបង លើកឡើងថា ចាប់ពីថ្ងៃ ដែលរដ្ឋបាលខេត្តបាត់ដំបង បានអនុញ្ញាតឲ្យចូលមកបម្រើការងារនៅអង្គភាពដើមវិញ លោក លី ឌីនូរី ពុំបានមកបំពេញភារកិច្ច នៅអង្គភាពឲ្យបានជាប់លាប់នោះទេ គឺសាមីខ្លួន មកបម្រើការងារមួយព្រឹក ហើយអវត្តមាន គ្មានច្បាប់ពី ២ ទៅ ៣ថ្ងៃ ហើយការអវត្តមាននេះ ក៏មិនមានការជូនដំណឹងមកអង្គភាពសាមីឡើយ។ ក្នុងរយៈពេល ២សប្តាហ៍ចុងក្រោយ សាមីខ្លន បានអវត្តមានគ្មានច្បាប់អនុញ្ញាតជាប់ៗគ្នា ដោយគ្មានមូលហេតុ និងគ្មានការជូនដំណឹង មកអង្គភាពសាមី។
រដ្ឋបាលខេត្តបាត់ដំបង បន្ថែមថា ដើម្បីពង្រឹងការគ្រប់គ្រងមន្ត្រីរាជការស្របតាមគោលការណ៍ និងនីតិវិធីនៃការគ្រប់គ្រងបុគ្គលិករដ្ឋបាលថ្នាក់ក្រោមជាតិ រដ្ឋបាលខេត្ត បានធ្វើលិខិតអញ្ជើញលើកទី១ ដើម្បីឲ្យលោក លី ឌីនូរី ចូលមកបំពេញការងារ នៅការិយាល័យគ្រប់គ្រងបុគ្គលិក ក្រោយពីអវត្តមានគ្មានច្បាប់អនុញ្ញាតជាប់ៗគ្នា រយៈពេល ២សប្តាហ៍កន្លងមក ដើម្បីទុកឱកាសឲ្យមន្ត្រីរូបនេះ កែប្រែកំហុសខ្លួនឡើងវិញ។ ប៉ុន្តែផ្ទុយទៅវិញ មន្ត្រីរូបនេះ ពុំបានចូលមកបង្ហាញខ្លួន នៅការិយាល័យគ្រប់គ្រងបុគ្គលិកតាមការអញ្ជើញនោះទេ ហើយសាមីខ្លួន ក៏ពុំបានសាកសួរព័ត៌មានមកអង្គភាពខ្លួនដែរ បែរជាធ្វើការបង្ហោះសារ និងរូបភាពនៅលើគណនីហ្វេសប៊ុករបស់ខ្លួន ដែលនាំឲ្យសាធារណជន មានការភាន់ច្រឡំ មកលើការដឹកនាំរបស់រដ្ឋបាលខេត្តបាត់ដំបង។
រដ្ឋបាលខេត្តបាត់ដំបង បញ្ជាក់ថា «រដ្ឋបាលខេត្តបាត់ដំបង តែងតែគោរពប្រតិបត្តិ និងអនុវត្តជាប់ជាប្រចាំតាមគោលការណ៍ច្បាប់ ព្រះរាជក្រឹត្យ អនុក្រឹត្យ និងលិខិតបទដ្ឋានគតិយុត្តិជាធរមាន ជាពិសេសក្នុងដំណាក់កាលការផ្ទេរបុគ្គលិក និងផ្ទេរមុខងារ មកឲ្យរដ្ឋបាលថ្នាក់ក្រោមជាតិ ហើយសម្រាប់ខេត្តបាត់ដំបង មិនមែនមានតែករណីលោក លី ឌីនូរី តែម្នាក់នោះទេ គឺរាល់មន្ត្រី ដែលពុំមកបម្រើការងារ និងប្រព្រឹត្តកំហុសឆ្គាំឆ្គងវិជ្ជាជីវៈ គឺរដ្ឋបាលខេត្ត បានចាត់វិធានការ និងបានអនុវត្តតាមនីតិវិធីកំណត់ ហើយករណីដូចគ្នានេះ ក៏ត្រូវបានអនុវត្តចំពោះមន្ត្រីរាជការ ចំនួន ៣រូបទៀត ដែលបានអវត្តមានគ្មានមូលហេតុ និងគ្មានច្បាប់អនុញ្ញាត ដើម្បីប្រសិទ្ធភាពនៃការគ្រប់គ្រងមន្ត្រីរាជការ ស្របតាមច្បាប់ស្តីពីសហលក្ខន្តិកៈ មន្ត្រីរាជការស៊ីវិលនៃព្រះរាជាណាចក្រកម្ពុជា ព្រះរាជក្រឹត្យ ស្តីពីលក្ខន្តិកៈ ដោយឡែក សម្រាប់បុគ្គលិករដ្ឋបាលថ្នាក់ក្រោមជាតិ និងលិខិតបទដ្ឋានគតិយុត្តកំណត់»។
សូមរម្លឹកថា នៅថ្ងៃទី១៩ ខែមករា ឆ្នាំ២០២២នេះ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានសម្តែងការសោកស្តាយ ដោយលោករដ្ឋមន្ត្រី អះអាងថា មានយុវជនម្នាក់ ដើរចោលការងាររដ្ឋ ព្រោះយល់ថា មានរឿងបក្ខពួកនិយម។
លោករដ្ឋមន្ត្រីក្រសួងព័ត៌មាន បានសរសេរលើបណ្តាញសង្គម យ៉ាងដូច្នេះថា «សោកស្តាយ ឃើញយុវជនម្នាក់ដើរចោលការងាររដ្ឋ ព្រោះយល់ថា មានរឿងបក្ខពួក ។ អ្វីដែលខ្ញុំស្តាយ គឺប្អូនគិតថា ពិភពលោកមានតែពណ៌ ២គត់ គឺ ខ្មៅ និង ស។ តាមពិតពណ៌ ដែលមានច្រើនបំផុត ក្នុងលោក គឺពណ៌ប្រផេះ។ សម័យនេះ ព្រំដែន ដែលខណ្ឌការងារជាក្រុម(Teamwork) និងបក្ខពួក គឺស្តើងណាស់ សំខាន់ តើយើងមានជំនាញអី ដែលគេត្រូវការយើងទេ?» ។
ការលើកឡើងរបស់លោករដ្ឋមន្ត្រី ខៀវ កាញារីទ្ធ ខាងលើនេះ បន្ទាប់ពីមានពាក្យស្នើសុំលាឈប់ពីការងាររបស់មន្ត្រីសាលាខេត្តបាត់ដំបង មួយរូប ឈ្មោះ លី ឌីនូរី ឋានន្តរសក្តិ វរៈមន្ត្រី ថ្នាក់លេខ២ នៃក្របខណ្ឌមន្ត្រីរដ្ឋបាលជាន់ខ្ពស់ក្រសួងមហាផ្ទៃ បង្ហោះលើបណ្ដាញសង្គមហ្វេសប៊ុក នៅថ្ងៃទី១៩មករានេះ។
មូលហេតុនៃការដាក់សំណើសុំអនុញ្ញាតលាឈប់ពីក្របខណ្ឌមន្ត្រីរាជការស៊ីវិលក្រសួងមហាផ្ទៃ លោក លី ឌីនូរី បានបញ្ជាក់ថា លោកបានបំពេញភារកិច្ច ជាមន្ត្រីរាជការក្របខណ្ឌក្រសួងមហាផ្ទៃ ចាប់តាំងពីឆ្នាំ២០០៧ រហូតបច្ចុប្បន្ន ជាមន្ត្រីសាលាខេត្តបាត់ដំបង ដោយលោក ពុំពេញចិត្តនឹងការបង្កើតបក្សពួក ក្នុងសាលាខេត្តបាត់ដំបង ទើបលោកស្នើសុំលាឈប់ពីក្របខណ្ឌមន្ត្រីរាជការស៊ីវិលក្រសួងមហាផ្ទៃ ចាប់ពីថ្ងៃទី១៨ មករា ឆ្នាំ២០២២នេះតទៅ។
ជាមួយគ្នានេះដែរ នៅថ្ងៃទី១៨ មករា ឆ្នាំ២០២២ លោក មូល ធន នាយករដ្ឋបាលខេត្តបាត់ដំបង ក៏បានចេញលិខិតអញ្ជើញ (លើកទី១) ជូនលោក លី ឌីនូរី មន្ត្រីការិយាល័យគ្រប់គ្រងបុគ្គលិក នៃទីចាត់ការគ្រប់គ្រងធនធានមនុស្សសាលាខេត្តបាត់ដំបង ដើម្បីចូលមកបំពេញការងារនៅការិយាល័យគ្រប់គ្រងបុគ្គលិក ក្រោយពីអវត្តមាន (គ្មានច្បាប់អនុញ្ញាតជាប់ៗគ្នារយៈពេល ២សប្តាហ៍កន្លងមក) ចាប់ពីម៉ោង០៧និង០០នាទីព្រឹកថ្ងៃទី១៩ ខែមករា ឆ្នាំ២០២២ នៅទីកន្លែងការិយាល័យគ្រប់គ្រងបុគ្គលិក នៃទីចាត់ការគ្រប់គ្រងធនធានមនុស្សសាលាខេត្ត។
ក្រោយពីទទួលបានលិខិតអញ្ជើញ (លើកទី១) លោក លី ឌីនូរី មិនបដិសេធទេ ប៉ុន្តែលោកមានសំណួរថា « ទី១- តើរយៈកាលកន្លងមក ក្រុមអស់លោក ធ្វើទុក្ខបុកម្នេញខ្ញុំ វាមិនទាន់គ្រប់គ្រាន់មែនទេ ? ទី២- នៅពេល ដែលខ្ញុំចូលបំពេញការងារ តើធានាទេ មានការងារធ្វើសម្រាប់ខ្ញុំដូចមន្ត្រីធម្មតា ? រឺត្រឹមតែចង់អោយខ្ញុំ មកអង្គុយអានកាសែត ដូចរយៈកាលមុន? តើខ្ញុំមានកំហុសអ្វី ? ប្រសិនបើមកអង្គុយត្រឹមអានកាសែត ខ្ញុំមិនមកល្អជាង សុខចិត្តសុំលាឈប់ ទៅធ្វើការងារឯកជនវិញ។ ទី៣- បក្សពួកនិយមខ្លាំងពេក នាំអោយអន្តរាយ ដល់ស្ថាប័នរដ្ឋ។ នេះប្រហែលមកពីខ្ញុំ មិនមែននៅក្នុងក្រុមគេទេដឹង? កន្លែងដែលមានបក្សពួកពេក ខ្ញុំមិនធ្វើការជាមួយទេ សូមជ្រាប»។
យ៉ាងណាក៏ដោយ ក្នុងលិខិតបំភ្លឺរបស់រដ្ឋបាលខេត្តបាត់ដំបង លើករណីអតីតអភិបាលរងស្រុកថ្មគោល លោក លី ឌីនូរី ខាងលើនេះ មិនបានលើកបង្ហាញពីការអះអាងរបស់លោក លី ឌូនូរី ពាក់ព័ន្ធនឹងការប្រកាន់ថា ធ្វើការដោយប្រកាន់បក្ខពួកនោះទេ៕
ចែករំលែកព័តមាននេះ