រាជធានីភ្នំពេញ ៖ លោក អ៊ិត សំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ ថ្លែងថា បើគិតរយៈពេល៦ខែដើមឆ្នាំ២០១៦ ឬគិតចាប់តាំងតែពីខែមករាដល់ដំណាច់ខែមិថុនាឆ្នាំនេះ ការធ្វើបាតុកម្ម កូដកម្មរបស់កម្មករកម្មការិនីនៅតាមបណ្តារោងចក្រទាំងក្នុងរាជធានីភ្នំពេញ ក៏ដូចជាតាមបណ្តាខេត្ត មានការធ្លាក់ចុះ បើប្រៀបធៀបទៅនឹងបណ្តាឆ្នាំកន្លងមក ។
លោករដ្ឋមន្ត្រី អ៊ិត សំហេង បានថ្លែងបែបនេះ ក្រោយពីបញ្ចប់បិទវគ្គបណ្តុះបណ្តាលស្តីពី «ការពង្រឹងគុណភាព និងផលិតភាពការងារ»ដែលបានរៀបចំឡើងនៅទីស្តីការក្រសួង កាលពីល្ងាចថ្ងៃទី២៩ ខែមិថុនា កន្លងមក ។
ថ្លែងបញ្ជាក់ប្រាប់ក្រុមអ្នកសារព័ត៌មានលោករដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ មានប្រសាសន៍ថា ការធ្លាក់ចុះនៃការធ្វើបាតុកម្ម កូដកម្មរបស់កម្មករកម្មការិនី ដោយសារតែផ្តើមចេញប្រសិទ្ធភាពនៃការអនុវត្តច្បាប់ និងពិសេសបណ្តានិយោជកមានការចាស់ទុំផ្នែកការងារ ។ នៅពេលមានបញ្ហាកើតឡើង តែងមានការសម្របសម្រួលគ្នាជាមួយកម្មករនិយោជិត ហេតុនេះហើយទើបបញ្ហាមួយចំនួនបានដោះស្រាយចេញដោយមិនកើតមានដូចកាលពីមុនទៀត ។ ដោយឡែកខាងសហជីព នាពេលបច្ចុប្បន្នបានយល់អំពីបញ្ហាផ្លូវច្បាប់កាន់តែច្រើន ហេតុនេះទើបគេឃើញថា ការធ្វើបាតុកម្ម កូដកម្ម បានធ្លាក់ចុះនារយៈពេលចុងក្រោយនេះ ។
លោករដ្ឋមន្ត្រីបញ្ជាក់ថា «បើមានក៏នៅតិចតួចដែរ ព្រោះថានាពេលបច្ចុប្បន្នវិធានការច្បាប់បានរឹតបន្តឹង ។ ពិសេសចុងក្រោយនេះ យើងបានអនុម័ត្រច្បាបស្តីពីសហជីព គឺវាបានជួយរំឭកឱ្យគ្រប់ភាគីគោរពទៅតាមអ្វីដែលត្រឹមត្រូវតាមច្បាប់ ហេតុនេះបើយើងមានច្បាប់ហើយគ្មាននរណាអាចបំពានច្បាប់បានឡើយ» ។
ទាក់ទិននឹងការធ្វើបាតុកម្ម កូដកម្ម របស់កម្មករនិយោជិតនេះដែរ លោករដ្ឋមន្ត្រីបានឱ្យដឹងថា មួយចំនួនគឺផ្តើមចេញពីក្រុមសហជីពជាអ្នកបង្កឡើង ក្នុងនោះដូចជានៅពេលបញ្ចប់កិច្ចសន្យា ហើយថៅកែរោងចក្រគេមិនបន្តកិច្ចសន្យាទៀត ទើបជាមូលហេតុធ្វើឱ្យមានការចោទប្រកាន់ថៅកែរោងចក្រថា រើសអើងសហជីព និងជាមូលហេតុនាំឱ្យមានការបំផុសកម្មករនិយោជិតធ្វើបាតុកម្មឡើង ។ ក្រៅពីនេះ ក៏កើតមានបញ្ហាទៅលើរោងចក្រដួលរលំ ហើយមិនបានបើកប្រាក់ឈ្នួលឱ្យដល់កម្មករនិយោជិត ក៏បង្កើតជាការប្រឆាំងតវ៉ាដើម្បីទាមទារប្រាក់ឈ្នួលរបស់ពួកគេ ។
លោករដ្ឋមន្ត្រីសង្កត់ធ្ងន់ថា «នៅពេលកើតបញ្ហាឡើង មន្ត្រីរបស់ក្រសួងបានប្រញាប់ទៅអន្តរាគមន៍ ប៉ុន្តែបើមិនបានទាន់ពេលវេលាពួកគេតែងប្រមូលផ្តុំដើម្បីឱ្យក្រសួងជួយដោះស្រាយឱ្យពួកគ» ។
សូមបញ្ជាក់ថា ក្នុងយុទ្ធសាស្ត្រដើម្បីពង្រឹងវិស័យការងារក៏ដូចជាកាត់បន្ថយទំនាស់ការងារនោះ កន្លងមកក្រសួងការងារបានពង្រឹងយន្តការរបស់ខ្លួន ដូចជាដោះស្រាយវិវាទការងារតាមរយៈអង្គការក្រោមឱវាទក្រសួង មានជាក្រុមប្រឹក្សាអាជ្ញាកណ្តាល គណៈកម្មការប្រឹក្សាការងារ គម្រោងរោងចក្រកាន់តែប្រសើរនៅកម្ពុជា និងយន្តការផ្សេងៗទៀត ដែលពាក់ព័ន្ធដើម្បីទប់ស្កាត់និងដោះស្រាយវិវាទឱ្យបានទាន់ពេលវេលា ។
ជាមួយគ្នានេះ ក្រសួងនឹងលើកកម្ពស់សិទ្ធិនិងផលប្រយោជន៍របស់កម្មករនិយោជិតនិងនិយោជក(ថៅកែ) ដូចជាការចុះបញ្ជិកាអង្គការវិជ្ជាជីវៈ ភាពជាតំណាងរបស់សហជីព ការចុះអនុសញ្ញារួម ពង្រីកការផ្សព្វផ្សាយអនុសញ្ញារួមឱ្យបានទូលំទូលាយ និងជំរុញការអនុវត្តអនុសញ្ញាឱ្យមានប្រសិទ្ធភាពបន្ថែមទៀត ។ ក្នុងយុទ្ធសាស្ត្រទាំងអស់នេះដែរ ទើបជំរុញឱ្យការធ្វើកូដកម្មកាន់តែថមថយចុះ ហើយទាំងកម្មករ និងនិយោជកទទួលបានផលប្រយោជន៍ដូចគ្នា ៕
ចែករំលែកព័តមាននេះ