ភ្នំពេញ៖ ចាប់ពីខែមករា ឆ្នាំ២០២២ នេះតទៅ រាជរដ្ឋាភិបាលបានសម្រេចបញ្ចប់ការផ្តល់ប្រាក់ឧបត្ថម្ភ សម្រាប់កម្មករនិយោជិត ដែលព្យួរកិច្ចសន្យាការងារ ក្នុងវិស័យវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប។ ក៏ប៉ុន្តែកម្មករនិយោជិត ដែលព្យួរកិច្ចសន្យាការងារក្នុងវិស័យទេសចរណ៍ នៅទទួលបានប្រាក់ឧបត្ថម្ភដដែល រហូតដល់វិស័យនេះ មានសភាពធូរស្បើយជាងនេះ។ នេះបើតាមសេចក្តីប្រកាសរបស់ក្រសួងការងារ។
សេចក្តីប្រកាស លើកឡើងថា ដោយសារតែការឆ្លងរីករាលដាលជំងឺកូវីដ១៩ នៅតាមរោងចក្រសហគ្រាស ត្រូវបានគ្រប់គ្រងប្រកបដោយប្រសិទ្ធភាពខ្ពស់ ដែលធ្វើឲ្យរោងចក្រ សហគ្រាស ភាគច្រើន បានចាប់ផ្តើម មានដំណើរការជាប្រក្រតីឡើងវិញ និងយោងសេចក្តីជូនដំណឹងរបស់ក្រសួងសេដ្ឋកិច្ច និងហិរញ្ញវត្ថុ គឺក្រសួងការងារ និងបណ្តុះបណ្តាលវិជ្ជាជីវៈ បានប្រកាស ជូនដំណឹងដល់ម្ចាស់ ឬនាយករោងចក្រ សហគ្រាស និងបងប្អូនកម្មករនិយោជិត ក្នុងវិស័យវាយនភណ្ឌកាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប មេត្តាជ្រាបថា រាជរដ្ឋាភិបាល បានសម្រេចបញ្ចប់ការអនុវត្តវិធានការរាជរដ្ឋាភិបាល ក្នុងការផ្តល់ប្រាក់ឧបត្ថម្ភ ចំនួន ៤០ដុល្លារអាមេរិក ក្នុង ១ខែ សម្រាប់កម្មករនិយោជិត ដែលព្យួរកិច្ចសន្យាការងារក្នុងវិស័យវាយនភណ្ឌ កាត់ដេរ ផលិតស្បែកជើង និងផលិតផលិតផល ធ្វើដំណើរ និងកាបូប គិតចាប់ពីខែមករា ឆ្នាំ២០២២ តទៅ។
សេចក្តីប្រកាស លើកឡើងថា ចាប់ពីថ្ងៃជូនដំណឹងនេះតទៅ ម្ចាស់ ឬនាយករោងចក្រ សហគ្រាស ក្នុងវិស័យវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប ត្រូវអនុវត្តការព្យួរកិច្ចសន្យាការងារ ស្របតាមខ្លឹមសារមាត្រា ៧១ និង៧២ នៃច្បាប់ស្តីពីការងារ ឬតាមការព្រមព្រៀងគ្នារវាងនិយោជក និងកម្មករនិយោជិត។
សូមរម្លឹកថា ក្នុងអំឡុងពេលកូវីដ ឆ្លងរាលដាល នៅក្នុងប្រទេសកម្ពុជាយើង ក៏ដូចជាពិភពលោក កាលពីដើមឆ្នាំ២០២០ គឺរាជរដ្ឋាភិបាល បានសម្រេចផ្ដល់ប្រាក់ឧបត្ថម្ភ ៤០ដុល្លារអាមេរិក ក្នុងមួយខែ សម្រាប់កម្មករ-និយោជិតម្នាក់ ក្នុងវិស័យកាត់ដេរ និងវិស័យទេសចរណ៍ ដែលត្រូវព្យួរការងារ ដោយសាររោងចក្រ ឬក្រុមហ៊ុនបិទទ្វារ។ ចំណែកម្ចាស់រោងចក្រ-សហគ្រាស ឬម្ចាស់ក្រុមហ៊ុន ត្រូវបន្ថែមចំនួន ៣០ដុល្លារ សម្រាប់កម្មករ-និយោជិតម្នាក់។ ជាសរុប កម្មករ-និយោជិតម្នាក់ ដែលមិនមានការងារធ្វើ ក្នុងអំឡុងពេលកូវីដ ទទួលបាន ៧០ដុល្លារ ក្នុងមួយខែ។
ក្រៅពីនោះ រាជរដ្ឋាភិបាល ក៏បានលើកលែងការបង់ពន្ធប្រចាំខែគ្រប់ប្រភេទ ចំពោះសណ្ឋាគារ, ផ្ទះសំណាក់ ភោជនីយដ្ឋាន និងក្រុមហ៊ុនភ្នាក់ងារទេសចរណ៍ ជាដើម។ ក្នុងនោះ ក៏មានការអនុគ្រោះដល់រោងចក្រ, សហគ្រាស និងអាជីវកម្មក្នុងគ្រប់វិស័យ ពន្យារពេលទូទាត់ប្រាក់រំលឹក ប្រាក់បំណាច់អតីតភាពការងារ មុនឆ្នាំ២០១៩ និងការទូទាត់ប្រាក់បំណាច់ អតីតភាពការងារ សម្រាប់ឆ្នាំ២០២០ និង២០២១ ទៅឆ្នាំ២០២២។
ក្រៅពីនោះ គ្រួសារក្រីក្រ និងអ្នកបាត់បង់ការងារ ក្នុងអំឡុងពេលកូវីដ ក៏ត្រូវបានរាជរដ្ឋាភិបាល ផ្តល់ប្រាក់ឧបត្ថម្ភរៀងរាល់ខែ រហូតដល់ពេលនេះ ផងដែរ៕
ចែករំលែកព័តមាននេះ