ខេត្តសៀមរាប ៖ ផ្ទះប្រជាពលរដ្ឋ១ខ្នងមានទំហំ៧គុណនឹង៩ម៉ែត្រ សង់អំពីឈើប្រក់ក្បឿង ជញ្ជាំងស្លឹក ត្រូវបានរលំទាំងស្រុង ខណៈមានភ្លៀងលាយឡំនឹងខ្យល់កន្ត្រាក់ កាលពីរសៀលម៉ោង១ និង៣០នាទី ថ្ងៃទី២៩ ខែមិថុនា ឆ្នាំ២០១៦ ដែលមានម្ចាស់ផ្ទះឈ្មោះ សឿន ឆន ភេទស្រី អាយុ៣២ឆ្នាំ ជាស្ត្រីមេម៉ាយ រស់នៅក្នុងភូមិរហាល ឃុំដូនកែវ ស្រុកពួក ខេត្តសៀមរាប។ លោកវរសេនីយ៍ត្រី ទេព ពុំសែន អធិការនគរបាលស្រុកពួកបានឱ្យដឹងតាមទូរស័ព្ទនៅវេលាម៉ោង៣និង០០នាទី ថ្ងៃទី៣០ ខែមិថុនា ឆ្នាំ២០១៦នេះថា ករណីរលំផ្ទះរបស់ស្ត្រីខាងលើដែលមានឈ្មោះ សឿន ឆន ភេទស្រី អាយុ៣២ឆ្នាំ ជាស្ត្រីមេម៉ាយ មានកូននៅក្នុងបន្ទុកចំនួន៤នាក់(ស្រី២ និងប្រុស២នាក់) រស់នៅក្នុងភូមិរហាល ឃុំដូនកែវ ស្រុកពួក ខេត្តសៀមរាប។
លោកបន្តថា ស្ត្រីមេម៉ាយរូបនោះ បានទៅរកឈ្មោះ ទុន សុផាត ហៅកិក ភេទប្រុស អាយុ៣៨ឆ្នាំ មានមុខរបរ ជាមេជាងស្ទួចផ្ទះ រស់នៅក្នុងភូមិគោកថ្មី ឃុំពួក ស្រុកពួក ខេត្តសៀមរាប ឱ្យមកជួយស្ទួចផ្ទះ របស់គាត់ដើម្បីដាក់ជើងសសរ កម្ពស់២.៥ម៉ែត្រកន្លះ ។ ពេលដែលស្ទួចឡើងលើ និងជីករណ្ដៅដាក់ជើងសសរបានចំនួន០៣ដើមហើយ ក៏មានភ្លៀងមួយមេធ្វើឱ្យទឹកហូរ ចូលរណ្ដៅជើងសសរ បន្ទាប់មកមេជាង និងកូនជាងបានបន្តស្ទួច ដើម្បីដាក់ជើងសសរបន្តទៀត ពេលនោះ ជើងសសរដែលបានដាក់រួចហើយនោះ វាក៏ស្រុតដីធ្វើឱ្យជន្ទល់ផ្សេងៗទៀតវិល ទើបបណ្ដាលឱ្យផ្ទះខាងលើរលំ និងខូចខាតទាំងស្រុង ហើយធ្វើឱ្យកូនជាងចំនួន០២នាក់រង របួសស្រាល បានបញ្ជូនទៅព្យាបាលនៅមន្ទីរពេទ្យ ស្រុកពួកភ្លាមៗផងដែរ៕
ចែករំលែកព័តមាននេះ