ខេត្តកំពត ៖ អាជ្ញាធរខេត្តកំពត កាលពីវេលាម៉ោង១០និង៣០នាទីយប់ ថ្ងៃទី១៦ ខែមករានេះ បានស្ទាក់ចាប់រថយន្តចំនួន២គ្រឿងដែលដឹកបង្គាសង្ស័យមានសារធាតុគីមីធ្វើអោយឲ្យប៉ះពាល់ដល់សុខភាពអ្នកបរិភោគ នៅលើកំណាត់ផ្លូវជាតិលេខ33 ត្រង់ចំណុចផ្លូវបំបែក ស្ថិតក្នុងភូមិកំពង់ត្រាចទី១ ឃុំកំពង់ត្រាចខាងកើត ស្រុកកំពង់ត្រាច ខេត្តកំពត ។
ការស្ទាក់ចាប់រថយន្តខាងលើ គឺសង្ស័យដឹកបង្គាមានសារធាតិគីមីដែលចាក់ចាហួយ នៅខួរក្បាលធ្វើអោយបង្គានីមួយៗ ឡើងគីឡូធ្ងន់ភ្នែកជញ្ជីង ។ ក្នុងប្រតិបត្តិការណ៍នេះដែរក៏មានអាជ្ញាធរមានមន្ត្រីនគរបាល មន្ត្រីកាំកុងត្រូល មន្ត្រីជលផល និងមន្ត្រីមកពីសាលាខេត្តកំពតប្រចាំការនៅច្រកទ្វារព្រំដែនអន្តរជាតិព្រែកចាក ក្នុងនោះក៏មានលោកឈារីម៉ារ៉ូ ព្រះរាជអាជ្ញារងសាលាដំបូងខេត្តកំពតផងដែរ ។
លោកង៉ែត សាវឿន ប្រធានស្នាក់ការច្រកទ្វារព្រំដែនអន្តរជាតិព្រែកចាក បាននិយាយប្រាប់អោយដឹងនៅរសៀលថ្ងៃទី១៧ ខែមករាថា រថយន្តចំនួន២គ្រឿងនេះបានដឹកបង្គា និងក្ដាមថ្ម ហើយមានមឹកសរុបចំនួន៦១០កេស ។
លោកង៉ែត សាវឿន បាននិយាយថា ការដឹកបង្គាឆ្លងដែនបែបនេះ គឺម្ចាស់នាំបង្គាពីវៀតណាមនេះ មិនទាន់មានច្បាប់គ្រប់គ្រាន់ទេ ។ លោកង៉ែត សាវឿន បន្តថា ការដឹកជញ្ជូនបង្គានេះខាងជំនាញបានរកឃើញថា បង្គានៅក្នុងកេសនីមួយៗ សុទ្ធតែត្រូវបានចាក់ចាហួយនៅខួរក្បាលធ្វើអោយបង្គានីមួយៗ ឡើងគីឡូធ្ងន់ភ្នែកជញ្ជីង ។
លោកឃឹម សាមី អភិបាលរងស្រុកកំពង់ត្រាចបាននិយាយប្រាប់ថាការចាក់ចាហួយក្នុងខួក្បាលបង្គានេះ មានសារធាតុជាតិគីមីធ្វើអោយមានការប៉ះពាល់ដល់សុខភាពប្រជាពលរដ្ឋដែលបានទិញយកទៅបរិភោគ ។
លោកឃឹម សាមី អភិបាលរងស្រុកកំពង់ត្រាចនិយាយបន្តថា ការពិនិត្យជាក់ស្ដែងរបស់បង្គានៅក្នុងកេសនីមួយៗមានចំនួន៦១០កេសស្មើរនឹង១២តោនអាច និងធ្វើការដុតកម្ទេចចោលនៅថ្ងៃខាងមុខ ។ ប៉ុន្តែគេក៏បានរិះគន់ដល់មន្ត្រីនគរបាលច្រកទ្វារអន្តរជាតិ និងមន្ត្រីគយដែរថា បើកដៃអោយថៅកែនាំបង្គាឆ្លងដែនដោយមានជាតិគីមីចូលក្នុងស្រុក ៕
ចែករំលែកព័តមាននេះ