ខេត្តកំពង់ធំ ៖ ប្រជាសហគមន៍ តំបន់ការពារធម្មជាតិអូរ ចិញ្ជៀ ន ស្ថិតនៅឃុំសាគ្រាម ស្រុកប្រាសាទបាល្ល័ង្ក ខេត្តកំពង់ធំ មានជីវភាពធូធារបន្ទាប់ពីទទួលបានសត្វគោដោយឥតគិតថ្លៃយកចិញ្ចឹម…
ខេត្តកំពង់ធំ ៖ ប្រជាសហគមន៍ តំបន់ការពារធម្មជាតិអូរ ចិញ្ជៀ ន ស្ថិតនៅឃុំសាគ្រាម ស្រុកប្រាសាទបាល្ល័ង្ក ខេត្តកំពង់ធំ មានជីវភាពធូធារបន្ទាប់ពីទទួលបានសត្វគោដោយឥតគិតថ្លៃយកចិញ្ចឹម ហើយត្រូវចូលរួមថែរក្សាការពារបិររិស្ថាន ។ កសិករឈ្មោះ សិទ្ធ ភឿក ដែលបានទទួលបានគោ ចំនួន ៣ ក្បាលពីក្រសួងបរិស្ថាននិយាយទាំងមុខញញឹមថា លោកសប្បាយចិត្តជាខ្លាំងនៅពេលទទួលបានគោមកចិញ្ចឹម ។ គោទាំងនោះជាផ្នែកមួយជួយដល់គ្រួសាររបស់គាត់ឱ្យមានជីវភាពល្អប្រសើរឡើង ។
«គោ ដែលខ្ញុំទទួលបាន បើគិតពីតម្លៃវាច្រើនណាស់ ខ្ញុំមិនអាចទិញវាបានទេ ហេតុនេះខ្ញុំត្រូវតែខិតខំថែទាំ និងចាក់ថ្នាំបង្កា រោគជំងឺ ដើម្បីកុំឱ្យឈឺងាប់ដោយប្រការណាមួយ ។ គោទាំងនេះខ្ញុំសង្ឃឹមថា វានឹងបង្កើតកូនចៅឱ្យខ្ញុំនៅថ្ងៃខាងមុខ ហើយពេលនោះខ្ញុំលែងព្រួយថា គ្មានគោចិញ្ចឹមដូចគេទៀតហើយ» ។
ក្រសួងបរិស្ថាន បានផ្តល់ពូជគោកាលពីអំឡុងដើមឆ្នាំ ២០២១ កន្លងមកដល់សហគមន៍តំបន់ការពារធម្មជាតិ អូរ ជញ្ជាន ស្ថិតនៅឃុំសាគ្រាម ស្រុកបាល្ល័ង ខេត្តកំពង់ធំ ចំនួន ៤២ ក្បាល ដើម្បីចែកជូនដល់ប្រជាសហគមន៍ចំនួន ១៤ គ្រួសារ និងសហគមន៍ តំបន់ការពារធម្មជាតិ អូរ បញ្ញា ស្ថិតនៅឃុំសាគ្រាម ស្រុកបាល្ល័ង ខេត្តកំពង់ធំ ទទួលបានពូជគោចំនួន ៤២ ក្បាល ដោយក្នុងនេះ បានចែកជូនប្រជាសហគមន៍ក្រីក្រ ចំនួន ១៤ គ្រួសារ ដូចគ្នា ។
ក្នុង ឆ្នាំ ២០២០ រហូតដល់ពេលនេះ ក្រសួងបរិស្ថាន បានផ្តល់ពូជក្របី ២១៦ ក្បាល សត្វគោខ្មែរ ចំនួន ១៥៣ ក្បាល គោពូជកាត់ ចំនួន ៦១ ក្បាល គោបា ចំនួន ៦ ក្បាល ចៀម ២៤៧ ក្បាល ពពែ ២៦៧ ក្បាល និងពូជជ្រូកឦសាន ចំនួន ៥០ ក្បាល ជូន សហគមន៍មូលដ្ឋានប្រជាពលរដ្ឋ និងកងទ័ពសម្រាប់ចិញ្ចឹម ដើម្បីពង្រឹងជីវភាពស្នូល ។
លោក សឿន រី ប្រធានសហគមន៍តំបន់ការពារធម្មជាតិ អូរចិញ្ជៀន បានឱ្យដឹងថា សហគមន៍របស់លោកបានទទួលគោពី ក្រសួងបរិស្ថាន ចំនួន ៤២ ក្បាល កាលពីអំឡុងដើមឆ្នាំ ២០២១ កន្លងមក ហើយលោកបានចែកឱ្យសហគមន៍ ចំនួន ១៤ គ្រួសារ ។ ប្រជាពលរដ្ឋមានជីវភាពខ្វះខាត បានទទួលយកគោទៅចិញ្ចឹម ដើម្បីជួយដោះស្រាយជីវភាពគ្រួសារបានមួយកម្រិត ។
លោក សឿន រី បានឱ្យដឹងបន្ថែមថា ក្នុង សហគមន៍របស់លោកមានសមាជិក ២៧០ គ្រួសារ ហើយក្នុងចំណោមនេះប្រជា សហគមន៍ ចំនួន ៥០ ភាគរយហើយដែលចិញ្ចឹមគោសម្រាប់ទុកលក់ និងមួយផ្នែកតិចតួចប៉ុណ្ណោះ ដែល ប្រើ សម្រាប់ជាកម្លាំង អូសទាញ ។
លោក សាយ សំអាល់ រដ្ឋមន្ត្រីក្រសួងបរិស្ថាន បានលើកទឹកចិត្តដល់ប្រជាពលរដ្ឋ ចូលរួមការពារ និងអភិរក្សព្រៃឈើ សត្វព្រៃ ដែលមាននៅក្នុងតំបន់ការពារធម្មជាតិទាំងអស់គ្នា ។ ប្រជាពលរដ្ឋក៏ត្រូវផ្លាស់ប្តូរមុខរបរដែលធ្លាប់បរបាញ់សត្វមកជាការចូលរួម ចិញ្ចឹមសត្វជំនួសវិញ ព្រោះការបរបាញ់សត្វព្រៃជាអំពើល្មើសច្បាប់ ប្រឈមនិងទោសទណ្ឌ ចំពោះមុខច្បាប់ ៕
ចែករំលែកព័តមាននេះ