រាជធានីភ្នំពេញ ៖ លោក ស៊ិត វណ្ណៈ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ កាលពីព្រឹកថ្ងៃទី១៦ ខែមករា ឆ្នាំ២០២២ បានបើកការស៊ើបសួរលើអតីតសង្ឃមួយអង្គ ពាក់ព័ន្ធសំណុំរឿង. បរិហារកេរ្តិ៍ជាសាធារណៈ. ប្រើប្រាស់ត្រាក្លែងក្លាយ. បន្លំឯកសារសាធារណៈ. ប្រើប្រាស់ឯកសារសាធារណៈក្លែង. ញុះញង់ឲ្យមានការរើសអើង និងបាតុកម្ម តាមពាក្យបណ្តឹងអន្តរាគមន៍របស់លោកជំទាវឧកញ៉ា សៀង ចាន់ហេង ។
អតីតសង្ឃខាងលើនោះមានឈ្មោះ ពឿយ មេត្តា ភេទប្រុស អាយុ៤៧ឆ្នាំ មានអាសយដ្ឋាននៅសង្កាត់ទួលសង្កែ២ ខណ្ឌឬស្សីកែវ រាជធានីភ្នំពេញ ។
ជនជាប់សង្ស័យជាអតីតសង្ឃ ពឿយ មេត្តា ត្រូវបានសមត្ថកិច្ចនាយកដ្ឋានកណ្តាលសន្តិសុខនៃក្រសួងមហាផ្ទៃចាប់ខ្លួន កាលពីថ្ងៃទី១៤ ខែមករា ឆ្នាំ២០២២ តាមដីកាបញ្ជាឲ្យចូលខ្លួនរបស់លោក ច្រឹង ខ្មៅ ព្រះរាជអាជ្ញាអមសាលាដំបូងរាជធានីភ្នំពេញ និងតាមពាក្យបណ្តឹងសុំអន្តរាគមន៍របស់លោកជំទាវឧកញ៉ា សៀង ចាន់ហេង ។
តាមប្រភពព័ត៌មានឲ្យដឹងថា ការចាប់ខ្លួនអតីតសង្ឃខាងលើនេះ ធ្វើឡើងក្រោយពីមានការធ្វើបាតុកម្មទ្រង់ទ្រាយធំមួយមុខភូមិគ្រឹះលោកជំទាវឧកញ៉ា សៀង ចាន់ហេង ពាក់ព័ន្ធដីវត្តនៅប្រទេសជប៉ុន ។
យោងតាមដីកាបញ្ជាឲ្យចូលខ្លួនរបស់លោក ច្រឹង ខ្មៅ ព្រះរាជអាជ្ញាអមសាលាដំបូងរាជធានីភ្នំពេញ ចុះថ្ងៃទី១៣ ខែមករា ឆ្នាំ២០២២ បង្ហាញឲ្យឃើញថា អតីតសង្ឃ ពឿយ មេត្តា ត្រូវចូលបង្ហាញខ្លួននៅនាយកដ្ឋានកណ្តាលសន្តិសុខ នៃក្រសួងមហាផ្ទៃ ឲ្យបានមុនថ្ងៃទី៣ ខែកុម្ភៈ ឆ្នាំ២០២២ ខាងមុខនេះ ។
ដើមចមនៃការចាប់ខ្លួនអតីតសង្ឃនោះ បានបញ្ជាក់ថា សង្ឃដីកាសម្រេចមួយស្ដីពី ដំណោះស្រាយករណីអធិករណ៍នៅវត្តបារមីគិរីខេមរា ភ្នំបិតាធំ ហៅវត្តលោកយាយជំទាវហេង នៅប្រទេសជប៉ុន បានចេញនៅថ្ងៃទី១៤ ខែធ្នូ ឆ្នាំ២០២១ នេះ មានរហូតដល់ចំនួន៩ប្រការ ។
ក្នុងសង្ឃដីកាសម្រេចនេះ គឺបានថ្វាយប្រគល់សិទ្ធិគ្រប់គ្រង និងកាន់កា.ប់ដីវត្តលោកយាយជំទាវហេង នៅប្រទេសជប៉ុន ដល់គណៈសង្ឃនាយក គណៈមហានិកាយនៃព្រះរាជាណាចក្រកម្ពុជា សម្រាប់ទុកជាគរុភ័ណ្ឌសង្ឃ និងសម្បត្តិមរតកពុទ្ធសាសនាថេរវាទកម្ពុជា តទៅ ។
ជាមួយគ្នានោះ សង្ឃដីកាសម្រេចក៏បានឲ្យព្រះទេវសត្ថា ពឿយ មេត្តា និងក្រុមការងារត្រូវបញ្ចប់អធិករណ៍ ការតវ៉ា និងការទាមទារដីវត្តលោកយាយជំទាវហេង ព្រមទាំងសំណងពីគ្រប់ភាគីទាំងអស់ក្នុងអធិករណ៍នេះ ពេលនេះតទៅ ។
សង្ឃដីកាសម្រេចនេះ ក៏បានព្រមានដែរថា «ក្នុងករណីមិនគោរពតាមសង្ឃដីកាសម្រេចនេះ សាមីខ្លួនត្រូវទទួលខុសត្រូវចំពោះមុខវិន័យ និងច្បាប់ជាធរមាន» ។ ដូច្នេះអតីតសង្ឃ ពឿយ មេត្តា អាចនឹងពាក់ព័ន្ធដីកាសម្រេច ដូចរៀបរាប់ខាងលើនេះ ទើបត្រូវចាប់ខ្លួនបញ្ជូនទៅតុលាការនោះ ៕
ចែករំលែកព័តមាននេះ