សហរដ្ឋអាមេរិក ៖ ទូរថភ្លើងដឹកទំនិញជាច្រើនរាប់សិបទូ ត្រូវពួកចោរប្លន់រៀងរាល់ថ្ងៃ នៅក្រុងឡូសអេនចឺឡេស ឆ្លៀតឱកាសរថភ្លើងឈប់ ដើម្បីយកទំនិញនានា ដោយបន្សល់ទុកចោលតាមផ្លូវដែកនូវកេសកាតុងរាយប៉ាយ ក្រោយយករបស់របរ ព្រមទាំងបណ្ដាផលិតផល ដែលគេទិញតាមអ៊ីនធើរណេត ដែលមិនបានបញ្ជូនទៅដល់គោលដៅ ព្រោះតែក្រុមចោរប្លន់លួចយកអស់ទៅហើយ។
ក្រុមហ៊ុនធំៗរបស់អាមេរិក ដូចជាអាម៉ាហ្សូន TARGET UPS FEDEX ជាដើម ទាក់ទិននឹងការប្លន់លួចយកទំនិញ ដែលកើតមានច្រើនចាប់តាំងពីច្រើនខែមកហើយ។ ពួកចោរឆ្លៀតឱកាសខ្សែរថភ្លើងដ៏វែងពេលឈប់ ដើម្បីឡើងលើបណ្ដាកុងតឺន័រដឹកទំនិញ ដែលពួកគេអាចបើកកុងតឺន័រទាំងនោះបានដោយស្រួលជាមួយដង្កាប់។ ពួកចោរបានទាញយកកេសទំនិញ ដោយរើយកតែរបស់ដែលចាំបាច់នានា ហើយចោលបណ្ដាទំនិញដែលគេគិតថា យកទៅលក់មិនបានថ្លៃ ឬពិបាកលក់ដូចជា ឧបករណ៍ធ្វើតេស្តកូវីដ បណ្ដាគ្រឿងសង្ហាររឹម ឬថ្នាំពេទ្យជាដើម។
ចាប់តាំងពីខែធ្នូ ឆ្នាំ២០២០មក ប្រតិបត្តិករផ្លូវដែក UNION PACIFIC កត់សម្គាល់ឃើញ មានការកើនឡើងដល់១៦០% ការលួចអមជាមួយការកើនឡើងនៃការវាយប្រហារលើរាងកាយ និងការប្លន់ដោយអាវុធ សំដៅលើបណ្ដានិយោជិតរបស់ក្រុមហ៊ុន UNION PACIFIC ។ យោងតាមបណ្ដាតួលេខចេញផ្សាយដោយ UNION PACIFIC ថា កុងតឺន័រដល់ជាង៩០ត្រូវបានគេប្លន់ គិតជាមធ្យមក្នុង១ថ្ងៃ នៅក្រុងឡូសអេនចឹឡេស ក្នុងត្រីមាសចុងក្រោយនៃឆ្នាំ២០២១។
ដើម្បីទប់ស្កាត់បាតុភូតនេះ UNION PACIFIC បាននិយាយថា បានពង្រឹងវិធានការត្រួតពិនិត្យដូចជា ប្រព័ន្ធដ្រូន និងប្រព័ន្ធកាមេរ៉ា និងជ្រើសរើសថែមទៀតនូវប៉ូលិស ដើម្បីការពារបណ្ដាផ្លូវដែក និងក្បួនរថភ្លើង។ ជាមួយប៉ូលិសក្រុងឡូសអេនចឹឡេស មនុស្សជាង១០០នាក់ត្រូវចាប់ខ្លួនរយៈពេល៣ខែចុងក្រោយនៃឆ្នាំ២០២១ ពិបទប្លន់ និងលួចតាមរថភ្លើង៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ