រាជធានីភ្នំពេញ ៖ សមត្ថកិច្ចជំនាញនៃមន្ទីរប្រឆាំងបទល្មើសគ្រឿងញៀនបង្ក្រាបករណីកែច្នៃជួញដូរគ្រឿងញៀនចាប់ខ្លួនជនជាតិចិន១នាក់ និងរឹបអូសគ្រឿងញៀនជាង៦គីឡូក្រាម នៅរាជធានីភ្នំពេញ ។
ដោយអនុវត្តតាមបញ្ជា ឯកឧត្តម នាយឧត្ដមសេនីយ សន្តិបណ្ឌិត នេត សាវឿន អគ្គស្នងការនគរបាលជាតិ សហការជាមួយគ្នា ក្រោមការបញ្ជាដឹកនាំផ្ទាល់ របស់ ឯកឧត្តម ឧត្ដមសេនីយ៍ឯក ឡឹក វណ្ណៈ នាយកមន្ទីរប្រឆាំងបទល្មើសគ្រឿងញៀន ។
កាលពីថ្ងៃទី១១ ខែមករា ឆ្នាំ២០២២ វេលាម៉ោង១៩ និង២០នាទី កម្លាំងជំនាញនៃមន្ទីរប្រឆាំងគ្រឿងញៀន(ក៣) ដឹកនាំដោយលោក ឧត្តមសេនីយ៍ទោ ប្រុញ សាន បានធ្វើការស៊ើបអង្កេត ស្រាវជ្រាវ បង្ក្រាបនៅចំណុច ផ្ទះជួលលេខ១ ផ្លូវលេខ៦ បូរីសែនសុខ សង្កាត់ទួលសង្កែ២ ខណ្ឌប្ញស្សីកែវ រាជធានីភ្នំពេញ ។
ជាលទ្ធផល ដោយឃាត់ខ្លួនជនសង្ស័យម្នាក់ឈ្មោះ លី ស៊ូចៃ (LY XU JAY) ភេទប្រុស អាយុ៦៣ ឆ្នាំ ជាជនជាតិចិន ។ វត្ថុតាងចាប់យករួមមាន : អ៊ិចស្តាស៊ី(MDMA)ទម្ងន់សុទ្ធ ៦ គ.ក្រ ៤០ក្រាម ។ កេតាមីន (KETAMINE)ទម្ងន់សុទ្ធ ១០.២៥ក្រាម ។
សរុបសារធាតុញៀនទម្ងន់០៦ គ.ក្រ ៥០.២៥ ក្រាម សារធាតុផ្សំ ៩ គ.ក្រ ៦៦៥ក្រាម និងឧបករណ៍កែច្នៃមួយចំនួនទៀត ។
ក្រោយឃាត់ខ្លួនជនសង្ស័យ និងវត្ថុតាងត្រូវបានកសមត្ថកិច្ចកសាងសំណុំរឿង បញ្ជូនទៅសាលាដំបូងរាជធានីភ្នំពេញ តាមនីតិវិធី ៕
ចែករំលែកព័តមាននេះ