មន្ត្រីអាមេរិកនិយាយថា រុស្សីកំពុងរៀបចំផែនការបង្កហេតុ ដើម្បីបានជាលេសឈ្លានពានប្រទេសអ៊ុយក្រែន។ នេះបើយោងតាមការចុះផ្សាយរបស់ BBC នៅព្រឹកថ្ងៃសៅរ៍នេះ ។
អ្នកនាំពាក្យមន្ទីរបញ្ចាកោណនៃក្រសួងការពារជាតិអាមេរិកនិយាយថា រុស្សីកំពុងរៀបផែនការធ្វើសកម្មភាពដោយមានចេតនាក្លែងបន្លំ ដើម្បីឲ្យទីក្រុងម៉ូស្គូ ចោទប្រកាន់ប្រទេសអ៊ុយក្រែនពីបទរៀបចំការវា.យប្រហារ។ ប៉ុន្តែរុស្សីបានបដិសេធការអះអាងនោះ។
ការអះអាងរបស់អាមេរិកកើតឡើងក្រោយពេលមហាអំណាចទាំងពីរបានជួបប្រជុំគ្នាអស់រយៈពេល១សប្តាហ៍ក្នុងគោលបំណងលុបបំបាត់ភាពតានតឹងនៅព្រំដែនអ៊ុយក្រែន ។
កាលពីថ្ងៃសុក្រម្សិលមិញនេះ អ៊ុយក្រែនបានចោទប្រកានរុស្សីថាជាអ្នកនៅពីក្រោយការវា.យប្រហារតាមអ៊ីនធឺណេតលើវេបសាយជាច្រើន។
មុនពេលគេហទំព័រទាំងនោះលែងដំណើរការ មានចេញសារព្រមានប្រជាជនអ៊ុយក្រែនឲ្យត្រៀមខ្លួនសម្រាប់ផលវិបាក។ ប៉ុន្តែវ៉េបសាយទាំងនោះ ត្រូវបានគ្រប់គ្រងបានវិញក្នុងរយៈពេលប៉ុន្មានម៉ោងបន្ទាប់។
អាមេរិក និងអង្គការណាតូ បានថ្កោលទោសការវា.យប្រហារនោះ និងបានផ្តល់ការគាំទ្រដល់អ៊ុយក្រែន។ រហូតមកដល់ពេលនេះ
រុស្សីមិនទាន់បានធ្វើការអត្ថាធិប្បាយនៅឡើយទេ លើការវា.យប្រហារតាមអ៊ីនធើរណេតនោះ។
សូមរម្លឹកថា ការវា.យប្រហារកើតឡើងក្រោយពេលមន្ត្រីជាន់ខ្ពស់អាមេរិកបានធ្វើការព្រមានកាលពីថ្ងៃព្រហស្បតិ៍ថា «ស្គរនៃសង្គ្រាមកំពុងបន្លឺឡើង» បន្ទាប់ពីការចរចាផ្នែកការទូតរយៈពេលមួយសប្តាហ៍រវាងប្រទេសលោកខាងលិច និងរុស្សីត្រូវបានបិទបញ្ចប់។
ការចរចាបានបញ្ចប់ដោយគ្មានលទ្ធផលច្បាស់លាស់ឡើយជុំវិញកងទ័ពរាប់ពាន់នាក់របស់រុស្សីនៅព្រំដែនអ៊ុយក្រែន បណ្តាលឲ្យទំនាក់ទំនងការទូតនាពេលអនាគត និងការបន្ធូរបន្ថយភាពតានតឹងស្ថិតនៅក្នុងភាពសង្ស័យ ខណៈដែលមន្ត្រីរុស្សីបានលើកឡើងថាពួកគេអាចនឹងងាកទៅរកជម្រើសយោធាក្នុងពេលឆាប់ៗនេះ។
រុស្សីបានប្រតិកម្មជាមួយនឹងការខកចិត្ត និងភាពគ្មានការអត់ធ្មត់នៃកិច្ចប្រជុំ ដោយបានលើកឡើងថា ពួកគេត្រៀមខ្លួនរួចរាល់ក្នុងការបោះបង់ចោលកិច្ចចរចានោះ ដោយសារការបដិសេធរបស់អាមេរិក និងអង្គការណាតូក្នុងការធ្វើតាមការទាមទារសំខាន់ៗរបស់
រុស្សី។ ការទាមទាររបស់រុស្សីមានដូចជា ការធានាថា អ៊ុយក្រែននឹងមិនត្រូវបានអនុញ្ញាតឲ្យចូលរួមជាមួយអង្គការណាតូ និងការដកខ្លួនរបស់អង្គការណាតូចេញពីអ៊ីរ៉ុបខាងកើត។
ប៉ុន្តែអាមេរិក និងអង្គការណាតូបានលើកឡើងម្តងហើយម្តងទៀតថា សំណើនោះរបស់រុស្សីមិនអាចកើតឡើងទេ៕ (យោងតាមប្រភព៖ BBC)
ចែករំលែកព័តមាននេះ