ហុងកុងផ្អាកជើងហោះហើរឆ្លងកាត់ខ្លួនពីប្រទេសជាង១៥០ ដើម្បីទប់ស្កាត់ Omicron
ហុងកុង ៖ ទីក្រុងហុងកុងនឹងធ្វើការផ្អាកជើងហោះហើរឆ្លងកាត់ខ្លួនរយៈពេលមួយខែពីប្រទេស និងតំបន់ចំនួន ១៥០ដែលត្រូវ
ហុងកុង ៖ ទីក្រុងហុងកុងនឹងធ្វើការផ្អាកជើងហោះហើរឆ្លងកាត់ខ្លួនរយៈពេលមួយខែពីប្រទេស និងតំបន់ចំនួន ១៥០ដែលត្រូវចាត់ទុកថាមានហានិភ័យខ្ពស់ដោយសារការរាតត្បាតយ៉ាងលឿនរបស់កូវីដ ១៩។
វិធានការផ្អាកអ្នកដំណើរឆ្លងកាត់ទីក្រុងខ្លួនកើតឡើងខណៈហុងកុងរកឃើញករណីឆ្លងវីរុសបំប្លែងថ្មីប្រហែល ៥០ករណីចាប់តាំងពីបំណាច់ចុងឆ្នាំមុនមក។
មុនពេលមានការផ្ទុះឆ្លងថ្មី ទីក្រុងនេះគ្មានករណីឆ្លងក្នុងសហគមន៍រយៈពេលជាង៣ខែ។
ព្រលានយន្តហោះអន្តរជាតិហុងកុងបានថ្លែងក្នុងសេចក្តីប្រកាសនៅថ្ងៃសុក្រនេះថា រាល់អ្នកណាដែលស្នាក់នៅក្នុងតំបន់ដែលចាត់ចូលជាកន្លែងមានហានិភ័យខ្ពស់ដោយអាជ្ញាធរសុខាភិបាលក្នុងរយៈពេល ២១ថ្ងៃមុនពេលធ្វើដំណើរ មិនអាចឆ្លងកាត់ទីក្រុងហុងកុងបានឡើយចាប់ពីថ្ងៃទី ១៦ ខែមករា រហូតដល់ថ្ងៃទី ១៥ ខែកុម្ភៈ។
សេចក្តីប្រកាសបញ្ជាក់ទៀតថា វិធានការនេះគឺដើម្បីទប់ស្កាត់ការរាតត្បាតនៃវីរុសបំប្លែងថ្មី Omicron។
បច្ចុប្បន្ន ហុងកុងចាត់ទុកប្រទេស និងតំបន់ជាង ១៥០ជាកន្លែងមានហានិភ័យខ្ពស់។
សូមបញ្ជាក់ថា កាលពីសប្តាហ៍មុន ហុងកុងបានហាមឃាត់ជើងហោះហើរមកពីប្រទេសអូស្ត្រាលី កាណាដា បារាំង ឥណ្ឌា ប៉ាគីស្ថាន ហ្វីលីពីន អង់គ្លេស និងសហរដ្ឋអាមេរិក ដើម្បីទប់ស្កាត់ការឆ្លងកូវីដ៕ (យោងតាមប្រភព៖ Reuters)
ចែករំលែកព័តមាននេះ