រាជធានីភ្នំពេញ ៖ ខ្លះបានបើកអាជីវកម្មឡើងវិញ ខ្លះបានកំពុងខ្ចីបុលគេបន្ថែមដើម្បីដំណើរការសេវាកម្ម ខ្លះបានចុះធ្វើការងារក្នុងវិស័យទេសចរណ៍មិនទាន់បានប៉ុន្មានថ្ងៃផង តែបានកំពុងជួបក្តីកង្វល់ជាថ្មីពីវត្តមានវីរុសបំប្លែងថ្មីអូមីក្រុង ។ អ្នករកទទួល ទានក្នុងវិស័យទេសចរណ៍បារម្ភថា បើវីរុសបំប្លែងនេះអាចបណ្តាលឱ្យមានការបិទប្រទេសជាថ្មីនោះ ពួកគាត់នឹងលំបាកជាងលើកមុខខ្លាំងណាស់ ។
លោក ធឿន វុឌ្ឍី អ្នកនាំភ្ញៀវទេសចរម្នាក់នៅខេត្តសៀមរាប និយាយទាំងក្តីបារម្ភថា វត្តមានពលរដ្ឋដើរកម្សាន្តកាលពីចូលឆ្នាំសកលបានធ្វើឱ្យលោកមានក្តីសប្បាយចិត្ត ព្រោះបានឃើញភ្ញៀវជាតិមកដើរលេងកម្សាន្តនៅខេត្តសៀមរាប ។ អ្នកលក់ដូរវត្ថុអនុស្សាវរីយ៍ និងអាហារផ្សេងៗបានទទួលកម្រៃពីភ្ញៀវទេសចរច្រើនគួរសម ។ ប៉ុន្តែពេលនេះបើសិនជាអូមីក្រុងបានចូលដល់សហគមន៍ទៀត ធ្វើឱ្យអ្នករកទទួលទានក្នុងវិស័យនេះបារម្ភជាខ្លាំងសារជាថ្មី ។
ខេត្តសៀមរាប បានបើការហោះហើរពីសិង្ហបុរី មកកម្ពុជា យ៉ាងហោចណាស់យើងមានភ្ញៀវបរទេសចូលមកកម្សាន្តសន្សឹមៗ តួយ៉ាងកាលពីសប្តាហ៍មុនយើងបានទទួលបានភ្ញៀវបរទេសមួយក្រុម ។ អូមីក្រុង ពេលនេះបានធ្វើឱ្យអ្នករកស៊ីក្នុងវិស័យទេសចរណ៍ធ្លាក់ទឹកចិត្ត ម្តងទៀតហើយ ។ នេះការលើកឡើងរបស់លោក ធឿន វុឌ្ឍី ។
លោកស្រី ឆាយ ស៊ីវលីន ប្រធានសមាគមទេសចរណ៍កម្ពុជាបានឱ្យដឹងថា អ្នករកទទួលទានក្នុងវិស័យទេសចរណ៍មានការព្រួយបារម្ភជាខ្លាំងពីវីរុសបំប្លែងថ្មីអូមីក្រុង នេះ ។ លោកស្រីបាននិយាយថា តាំងពីយើងបានបើកប្រទេសឡើងវិញ គឺយើងនៅមិនទាន់ទទួលបានភ្ញៀវទេសចរឱ្យបានពេញលេញនៅឡើយទេ ដោយសារភ្ញៀវត្រូវការធ្វើផែនការក៏ដូចជាវិស័យដឹកជញ្ជូនតាមផ្លូវអាកាសវិញក៏នៅមិនទាន់ហោះហើរបានពេញលេញដែរ ។
ប្រសិនបើមានការបិទខ្ទប់ប្រទេសដោយសារតែវីរុសបំប្លែងថ្មី អូមីក្រុង ទៀតនោះនឹងធ្វើឱ្យប៉ះពាល់ទៅដល់អាជីវកម្មនៅក្នុងវិស័យទេសចរណ៍ធ្ងន់ធ្ងរណាស់ ។ លោកស្រី ឆាយ សីវលីន អះអាងថា វិស័យទេសចរណ៍បានរងផលប៉ះពាល់រយៈពេល ២ ឆ្នាំមកហើយ បានធ្វើអ្នករកស៊ីមួយចំនួនខំប្រមូលដើមទុនក៏ដូចជាខ្ចីបុលពីគេដើម្បីស្តារអាជីវកម្មឡើងវិញជាបណ្តើរៗ ក្នុងការត្រៀមទទួលភ្ញៀវ ។ មិនទាន់ទាំងដំណើរការស្រួលបួលផង បើត្រូវបិទខ្ទប់ទៀតនោះនឹងធ្វើឱ្យអ្នករកស៊ីក្នុងវិស័យនេះដួលរំលំកាន់តែច្រើន ហើយពិបាកនឹងងើបឡើងវិញណាស់ ព្រោះថា ម្ចាស់អាជីវកម្មទាំងនោះភាគច្រើនមិនមានដើមទុនសល់ទុកសម្រាប់ទ្រទ្រង់អាជីវកម្មឱ្យបានពេលយូរឡើយ ។
ចាប់ពីតាំងពីថ្ងៃទី ៥ ខែមករា មក កម្ពុជាមិនមានអ្នកស្លាប់ដោយជំងឺកូវីដ ១៩ ខណៈថ្ងៃនេះរកឃើញអ្នកឆ្លងកូវីដថ្មីចំនួន ៣៤នាក់ ប្រភេទអូមីក្រុង ក្នុងនោះករណីនាំចូលចំនួន ២២ នាក់ និងឆ្លងក្នុងសហគមន៍ ១២ នាក់ អ្នកជំងឺចំនួន ១៤ នាក់ជាសះស្បើយ ។ គ្មានសញ្ញាពីការប្រកាសបិទប្រទេសកម្ពុជាឡើងវិញនោះទេ ។ កន្លងមកប្រមុខរដ្ឋាភិបាលបានអំពាវនាវដល់ពលរដ្ឋកុំឱ្យមានការភ័យស្លន់ស្លោ តែត្រូវនាំគ្នាអនុវត្តវិធានការពារ ៣ កុំ ៣ ការពារ និងទៅចាក់វ៉ាក់សាំងដូសជំរុញឱ្យបានគ្រប់គ្នា ៕
ចែករំលែកព័តមាននេះ