រកឃើញហើយ! ម្ចាស់ជ័យលាភីកង់គួក កង់ភ្នំ ជើងឯកថ្នាក់ជាតិ
- សៀមរាប
រាជធានីភ្នំពេញ ៖ ការប្រកួតកីឡាទោចក្រយាន ជ្រើសរើសជើងឯកថ្នាក់ជាតិ ប្រចាំឆ្នាំ២០២១ ដែលប្រព្រឹត្តទៅពេញ១ថ្ងៃ កាលពីថ្ងៃ
រាជធានីភ្នំពេញ ៖ ការប្រកួតកីឡាទោចក្រយាន ជ្រើសរើសជើងឯកថ្នាក់ជាតិ ប្រចាំឆ្នាំ២០២១ ដែលប្រព្រឹត្តទៅពេញ១ថ្ងៃ កាលពីថ្ងៃ
ខេត្តសៀមរាប ៖ ការប្រកួតកីឡាទោចក្រយាន ជ្រើសរើសជើងឯកថ្នាក់ជាតិ ប្រចាំឆ្នាំ២០២១ ដែលប្រព្រឹត្តទៅពេញ១ថ្ងៃ កាលពីថ្ងៃទី១២ ខែមករា ឆ្នាំ២០២២ នៅខេត្តសៀមរាប បានបញ្ចប់ដោយជោគជ័យ ខណៈគណៈកម្មការបច្ចេកទេសបានរកឃើញកីឡាករ កីឡាការិនីជ័យលាភីលើវិញ្ញាសាសរុបចំនួន៧។
ជ័យលាភីលើប្រភេទកង់គួក ៖ ១-វិញ្ញាសាកង់គួកបុរសថ្នាល (Junior) ចំណាត់ថ្នាក់លេខ១ កីឡាករ ចេង ជេម, ២-វិញ្ញាសាកង់គួកបុរសឈុតធំ (Elite) លេខ១ កីឡាករ លឹម តិចហ៊ុយ, ៣-វិញ្ញាសាកង់គួកបុរស (Master) លេខ១ កីឡាករ អេង លីន។ ប្រភេទកង់ភ្នំ៖ ៤-កង់ភ្នំ (Man Master MTB) លេខ១ កីឡាករ Vasco Ramsperger, ៥-កង់ភ្នំបុរស (Elite) លេខ១ កីឡាករ ឃឹម ម៉េងឡុង (Team SEA GAMES), ៦-កង់ភ្នំថ្នាល (Man Junior MTB) លេខ១ កីឡាករ ធីម លីម៉េង, និងទី៧ វិញ្ញាសា កង់ភ្នំនារី ចំណាត់ថ្នាក់លេខ១ កីឡាការិនី ខេន ម៉ាឡៃ។ ក្រៅពីចំណាត់ថ្នាក់លេខ១ ក៏មានជ័យលាភីលេខ២ ដល់លេខ៥ លើវិញ្ញាសាទាំង៧នេះដូចៗគ្នាផងដែរ។
លោក នូ ចំរើន អគ្គលេខាធិការ សហព័ន្ធខ្មែរកីឡាទោចក្រយាន ទទួលបន្ទុកប្រធានគណៈកម្មការបច្ចេកទេសការប្រកួតនេះគូសបញ្ជាក់ថា យោងតាមកម្មវិធីប្រកួតប្រចាំឆ្នាំរបស់សហព័ន្ធ និងក្រសួងអប់រំ យុវជន និងកីឡា ក្រោមគម្រោងថវិកាគាំទ្រសហព័ន្ធរបស់ក្រសួងអប់រំ យុវជន និងកីឡា សម្រាប់ពន្លឿនការអភិវឌ្ឍសហព័ន្ធកីឡាជាតិ សហព័ន្ធខ្មែរកីឡាទោចក្រយានបានរៀបចំការប្រកួតកីឡាទោចក្រយានជ្រើសរើសជើងឯកថ្នាក់ជាតិ ប្រចាំឆ្នាំ២០២១ ចាប់ពីថ្ងៃថ្ងៃទី១១-១៣ ខែមករា ឆ្នាំ២០២២ នៅខេត្តសៀមរាប ដែលត្រូវបានបញ្ចប់នាពេលនេះ។ ការប្រកួតឆ្នាំនេះនេះមានសមាគម ក្លិប ប្រតិភូ គ្រូបង្វឹក និងកីឡាករ-កីឡាការិនី សរុប ២៤៩នាក់ ក្នុងនេះមានកីឡាករ ១៧៩នាក់ និងកីឡាការិនី១៩នាក់ និងមន្ត្រីគណៈកម្មការរៀបចំការប្រកួតចំនួន ៧០នាក់។
ប្រធានគណៈកម្មការបច្ចេកទេសរូបនេះបញ្ជាក់ទៀតថា ឆ្លងតាមការប្រកួតដោយស្មារតីយកចិត្តទុកដាក់ ខិតខំប្រឹងប្រែងអស់ពីសមត្ថភាព បច្ចេកទេស និងអនុវត្តបានល្អនូវស្មារតីសាមគ្គីភាព មិត្តភាព ព្រមទាំងអនុវត្តបានយ៉ាងល្អនូវគោលការណ៍លេងដោយយុត្តិធម៌ (Fair Play) បានជំរុញឲ្យការប្រកួតនេះទទួលបានលទ្ធផលល្អប្រសើរ។ «ខ្ញុំបាទ សូមគោរពថ្លែងអំណរគុណយ៉ាងជ្រាលជ្រៅបំផុតជូនចំពោះឯកឧត្តមអភិបាល នៃគណៈអភិបាលខេត្តសៀមរាប ដែលអនុញ្ញាតផ្តល់ទីតាំងឲ្យសហព័ន្ធខ្មែរកីឡាទោចក្រយានបានរៀបចំការប្រកួតកីឡាទោចក្រយានជ្រើសរើសជើងឯកថ្នាក់ជាតិឆ្នាំ២០២១ នេះចប់ទៅដោយរលូន និងទទួលបានជោគជ័យយ៉ាងល្អប្រសើរ»។ សម្រាប់ការប្រកួតកង់ភ្នំ ដែលប្រារព្ធធ្វើឡើងនៅនៅឧស្សានភ្នំគូលែន ភូមិបន្ទាយស្រី ឃុំឃ្នាសណ្តាយ ស្រុកបន្ទាយស្រី ខេត្តសៀមរាបក៏ទទួលបានការជួយជ្រោមជ្រែងគាំទ្រយ៉ាងខ្លាំងពីអភិបាលស្រុកបន្ទាយស្រី ហើយលោកអភិបាលស្រុកក៏ប្តេជ្ញាចិត្តខ្ពស់ក្នុងទទួលរៀបចំធ្វើជាម្ចាស់ផ្ទះ នៅស្រុកបន្ទាយស្រី លើកក្រោយៗទៀតផងដែរ។
លោក កឹម សុខុន រដ្ឋលេខាធិការ ក្រសួងពាណិជ្ជកម្ម និងជាអនុប្រធានសហព័ន្ធខ្មែរកីឡាទោចក្រយាន ថ្លែងក្នុងឱកាសបិទការប្រកួត និងពិធីបំពាក់មេដាយថា ឯកឧត្តមពិតជារីករាយ និងកោតសរសើរចំពោះការចូលរួមប្រកួតប្រជែងអស់ពីសមត្ថភាពរបស់កីឡាករ កីឡាការិនី និងមន្ត្រីបច្ចេកទេសដែលខិតខំអស់ពីសមត្ថភាព ដើម្បីជំរុញឲ្យការប្រកួតជើងឯកថ្នាក់ជាតិទទួលបានជោគជ័យ ដើម្បីបន្តការអភិវឌ្ឍទាំងគុណភាពបច្ចេកទេសរបស់អត្តពលិក និងមន្ត្រីបច្ចេកទេស ត្រៀមឆ្ពោះទៅទទួលរៀបចំធ្វើជាម្ចាស់ផ្ទះ ការប្រកួតកីឡា ស៊ីហ្គេម លើកទី៣២ ឆ្នាំ២០២៣ ជាប្រវត្តិសាស្ត្រដំបូង នៅព្រះរាជាណាចក្រកម្ពុជា ដែលយើងនៅសល់រយៈពេលត្រឹមជាង ៤០០ថ្ងៃទៀតប៉ុណ្ណោះ ។
សូមរំលឹកថា ការប្រកួតកីឡាទោចក្រយាន ជ្រើសរើសជើងឯកថ្នាក់ជាតិ ប្រចាំឆ្នាំ២០២១ បានចាប់ផ្តើមការប្រកួតជាផ្លូវការហើយ កាលពីព្រឹកថ្ងៃទី១២ ខែមករា ឆ្នាំ២០២២ នៅខាងមុខសួនព្រះអង្គចេកព្រះអង្គចម ខេត្តសៀមរាប ដោយមានកីឡាករ និង អ្នកចូលរួមទស្សនាយ៉ាងកក្រើកទីលានប្រកួតនៅសៀមរាប។ ព្រឹត្តិការណ៍នេះរំពឹងថានឹងកក្រើក ក្រោយអាចរៀបចំជាទ្រង់ទ្រាយធំជាថ្មី ដូចមុនផ្ទុះកូវីត១៩នោះផង។
ការប្រកួតនៅព្រឹកនេះប្រកួតលើវិញ្ញាសា កង់គួកបុរសឈុតធំ (Elite), កង់គួកបុរសថ្នាល (Junior) កង់គួកបុរស (Master)។
ចំណែកនៅពេលរសៀល ព្រត្តិការណ៍នេះនឹងបន្តរៀបចំការប្រកួតលើវិញ្ញាសាកង់ភ្នំ ដែលមានវិញ្ញាសា កង់ភ្នំថ្នាល កង់ភ្នំនារី កង់ភ្នំបុរស ដែលប្រកួតនៅឧស្សានភ្នំគូលែន (ជើងភ្នំហ៊ប់) ភូមិបន្ទាយស្រី ឃុំឃ្នាសណ្តាយ ស្រុកបន្ទាយស្រី ខេត្តសៀមរាប។
លោក កឹម សុខុន រដ្ឋលេខាធិការ ក្រសួងពាណិជ្ជកម្ម និងជាអនុប្រធានសហព័ន្ធខ្មែរកីឡាទោចក្រយាន ថ្លែងក្នុងឱកាសបើកការប្រកួតកីឡាទោចកយាននេះថា ក្នុងនាម លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ពុជា និងជាប្រធានសហព័ន្ធខ្មែរកីឡាទោចក្រយាន លោកបង្ហាញការកោតសរសើរ និងវាយតម្លៃខ្ពស់ចំពោះកិច្ចសហការរៀបចំព្រឹត្តិការណ៍ប្រកួតកីឡាទោចក្រយានឆ្នាំ២០២១ ដ៏មហោឡារឹក នាពេលនេះ។
លោកអនុប្រធានសហព័ន្ធបន្ថែមថា ក្រោមគម្រោងថវិកាគាំទ្ររបស់ក្រសួងអប់រំ យុវជន និងកីឡា ដើម្បីអភិវឌ្ឍវិស័យកីឡាជាតិឆ្ពោះទៅប្រកួត កីឡាស៊ីហ្គេម លើកទី៣២ ឆ្នាំ២០២៣ ដែលព្រះរាជាណាចក្រកម្ពុជាធ្វើជាម្ចាស់ផ្ទះ សហព័ន្ធខ្មែរកីឡាទោចក្រយាន សហការជាមួយសាលាខេត្តសៀមរាបរៀបចំការប្រកួតកីឡាទោចក្រយានជ្រើសរើសជើងឯកថ្នាក់ជាតិ ប្រចាំឆ្នាំ ២០២១ ដើម្បីជ្រើសរើសកីឡាករ-កីឡាកាវិនីឆ្នើមប្រចាំឆ្នាំ សម្រាប់ហ្វឹកហាត់បំប៉នសមត្ថភាព ដើម្បីត្រៀមចូលរួមការប្រកួតកីឡាស៊ីហ្គេមឆ្នាំ២០២៣ និងការត្រៀមលក្ខណៈចូលរួមការប្រកួតអន្តរជាតិនានា។
លោក កឹម សុខុន បន្ថែមថា យើងនៅសល់ត ចំនួនជាង៤០០ថ្ងៃទៀតតែប៉ុណ្ណោះ គឺប្រទេសកម្ពុជាកំពុងត្រៀមលក្ខណៈទទួលរៀបចំធ្វើជាម្ចាស់ផ្ទះ ការប្រកួតកីឡាស៊ីហ្គេម លើកទី៣២ ឆ្នាំ២០២៣ បន្ទាប់ពី ស៊ីហ្គេម លើកទី៣១ ឆ្នាំ២០២២ នៅប្រទេសវៀតណាម។ «សម្តេចតេជោនាយករដ្ឋមន្ត្រី នៃព្រះរាជាណាចក្រកម្ពុជាបានផ្តល់អនុសាសន៍ដ៏ខ្ពង់ខ្ពស់ ចំនួនពីរ ទី១-ត្រូវធ្វើជាម្ចាស់ផ្ទះរៀបចំឱ្យបានល្អ ទោះមិនបានឈ្នះមេដាយ ឬឈ្នះមេដាយតិចក្តី។ ទី២-ការឈ្នះមេដាយ គឺត្រឹមត្រូវយុត្តិធម៌ មិនត្រូវចង់ឈ្នះមេដាយ ដោយរំលោ.ភបំពានច្បាប់ ឬលក្ខន្តិកៈនៃការប្រកួតឡើយ»។
លោកកោតសរសើរចំពោះ ប្រតិភូដឹកនាំក្រុមកីឡាទោចក្រយានទាំងអស់ ដែលបានចូលរួមក្នុងការប្រកួតក្នុងព្រឹត្តិការណ៍នេះប្រកបដោយស្មារតី មិត្តភាព និងសាមគ្គីភាព។ «ខ្ញុំស្នើសុំឲ្យមានការយោគយល់គ្នា ហើយគោរពបានត្រឹមត្រូវតាមបទបញ្ជាបច្ចេកទេសនៃការប្រកួតដោយឈរលើស្មារតីទទួលខុសត្រូវខ្ពស់ មិនគិតតែពិការយក ឈ្នះ-ចាញ់ ពោលគឺ៖ ឈរលើស្មារតីកីឡា ដើម្បីសុខភាព សន្តិភាព មិត្តភាព សាមគ្គីភាព និងបង្កើនគុណផលបច្ចេកទេស។
ខ្ញុំក៏ស្នើសុំមន្ត្រីគណៈកម្មការបច្ចេកទេស សហព័ន្ធខ្មែរកីឡាទោចក្រយានត្រូវខិតខំប្រឹងប្រែងយកអស់កម្លាំងកាយចិត្ត ប្រកបដោយស្មារតីទទួលខុសត្រូវ ខ្ពស់ក្នុងការរៀបចំព្រឹត្តិការណ៍ការប្រកួត ជូនដល់កីឡាករ កីឡាកាវិនី ប្រកបដោយភាពយុត្តិធម៌ មិនលម្អៀង និងគោរពបានតាមបទបញ្ជាបច្ចេកទេសនៃការប្រកួតធ្វើឱ្យការប្រកួតប្រព្រឹត្តទៅដោយរលូន និងទទួលបានជោគជ័យជាផ្លែផ្កា»៕
ចែករំលែកព័តមាននេះ