រាជធានីភ្នំពេញ ៖ លោក អួង វុទ្ធា ចៅក្រមជំនុំជម្រះសាលាដំបូងរាជធានីភ្នំពេញ កាលពីព្រឹកថ្ងៃទី១២ ខែមករា ឆ្នាំ២០២២ បានប្រកាសសាលក្រមលើសំណុំរឿងប្ដីកំណាចជះទឹកអាស៊ីតដាក់ប្រពន្ធ បណ្ដាលឲ្យរបួសពេញផ្ទៃមុខ ព្រោះតែភ្លើងប្រចណ្ឌ ដោយផ្ដន្ទាទោសជនជាប់ចោទដាក់ពន្ធនាគារកំណត់១០ឆ្នាំ ក្រោមការចោទប្រកាន់ពីបទទារុ.ណកម្ម និង អំពើឃោរ.ឃៅដោយប្រើទឹកអាស៊ីតខ្លាំង ។
ជនជាប់ចោទមានឈ្មោះ ហេង ចាន់ឌី អាយុ៤៣ឆ្នាំ មានមុខរបរជាអ្នករត់ម៉ូតូឌុប មានទីលំនៅភូមិ២ ឃុំកំពង់ទ្រាស ស្រុកក្រូច ឆ្មារ ខេត្តត្បូងឃ្មុំ ។ សាលក្រមបានបើកផ្លូវទុកសិទ្ធិឲ្យប្តឹងឧទ្ធរណ៍តាមកំណត់ច្បាប់ បើសិនភាគីណាមួយមិនសុខចិត្តចំពោះការកាត់ក្តីនេះ ។
សូមរម្លឹកថា បុរសម្នាក់ដែលចុះចោលប្រពន្ធទៅមានស្រីថ្មី រយៈពេលដល់ទៅ៥ឆ្នាំហើយវិលត្រឡប់មកសុំរួមរស់ជាមួយប្រពន្ធវិញ តែប្រពន្ធអត់ព្រមក៏កើតចិត្តក្ដៅក្រហាយ រួចធ្វើសកម្មភាពយកទឹកអាស៊ីតចាក់ស្រោចលើប្រពន្ធ បណ្ដាលឲ្យរងរបួសធ្ងន់ធ្ងរនោះត្រូវបានកម្លាំងនគរបាលខណ្ឌពោធិ៍សែនជ័យ រាជធានីភ្នំពេញ សហការជាមួយកម្លាំងនគរបាលស្រុកក្រូចឆ្មារ ខេត្តត្បូងឃ្មុំ ចាប់ខ្លួនបានហើយ ក្រោយពីរត់គេចខ្លួនអស់រយៈពេល១ឆ្នាំកន្លងមក ។
ពេលនេះមុខមាត់ស្ត្រីរងគ្រោះដែលធ្លាប់តែស្រស់ស្អាតផូរផង់បានបាត់បង់សម្រស់ទាំងស្រុងដោយសារទឹកអាស៊ីត ហើយគាត់ក៏បានលើកដៃសំពះសុំដល់ថ្នាក់ដឹកនាំជួយដល់រូបគាត់ថែមទៀតផង ។ ជនដៃដល់ខាងលើ ត្រូវនគរបាលឃាត់ខ្លួនពីបទប៉ុនប៉ងមនុស្សឃា.ត កាលពីវេលាម៉ោង៥និង៣០ល្ងាច ថ្ងៃទី៥ មិថុនា ឆ្នាំ២០២១ ខណៈពេលកំពុងធ្វើចត្តាឡីស័ក នៅក្នុងភូមិ២ ឃុំកំពង់ទ្រាស ស្រុកក្រូចឆ្មារ ខេត្តត្បូងឃ្មុំ ។
តាមប្រភពព័ត៌មានពីនគរបាលបានឲ្យដឹងថា ស្ត្រីជាប្រពន្ធដែលរងគ្រោះព្រោះស្នាដៃប្ដីកំណាចខាងលើនោះ ឈ្មោះ លី រ៉ានី អាយុ៥០ឆ្នាំ មុខរបរសន្តិសុខយាម រោងចក្រកាត់ដេរ ស្នាក់នៅផ្ទះជួលភូមិត្រពាំងថ្លឹង១ សង្កាត់ចោមចៅទី១ ខណ្ឌពោធិ៍សែនជ័យ ។ រងរបួសខូចមុខមាត់ទាំងស្រុង ព្រមទាំងរលាករលួយខ្លួនប្រាណថែមទៀតផង ។
ចំណែកឯប្ដីហេង ស៊យ ដែលជាជនដៃដល់ឈ្មោះ ហេង ចាន់ឌី អាយុ៤៣ឆ្នាំ មុខរបររត់ម៉ូតូឌុប មានទីលំនៅភូមិ២ ឃុំកំពង់ទ្រាស ស្រុកក្រូចឆ្មារ ខេត្តត្បូងឃ្មុំ ។
ប្រភពដដែលបានឲ្យដឹងបន្តទៀតថា ហេតុការណ៍នេះបានកើតឡើង តាំងពីអំឡុងឆ្នាំ២០២០មកម្ល៉េះ ហើយចំពោះសាវតាអ្នកទាំង២ គឺបានរួមរស់នៅជាមួយគ្នាជាប្ដីប្រពន្ធពុំបានរៀបការ ឬសែនព្រេននោះឡើយ ព្រមទាំងបង្កើតបានកូនស្រីម្នាក់ អាយុ១៣ឆ្នាំទៅហើយ ។ កាលពីអំឡុងឆ្នាំ២០១៥ ជនដៃដល់ជាប្ដីរូបនេះបានបែកចិត្តផិតក្បត់ពីប្រពន្ធ និងចុះចោលទៅមានស្រីថ្មីម្នាក់ទៀតយ៉ាងសុខសាន្តគ្មានអាល័យធ្វើឲ្យជនរងគ្រោះដែលជាប្រពន្ធរស់នៅក្នុងសភាពគ្រាំគ្រាចិត្តតែឯង ។
ប្រភពខាងលើបានឲ្យដឹងបន្តថា ធ្មេចបើកៗរយៈពេល៥ឆ្នាំ គឺនៅក្នុងឆ្នាំ២០២០ ស្រាប់តែប្ដីហេងស៊យចិត្តសាវ៉ារូបនេះបានវិលត្រឡប់ទៅរកឆ្នាំងចាស់រូបនេះ ដើម្បីរួមរស់ជាមួយគ្នាវិញ ។ ព្រោះតែឆ្អែតចិត្តនឹងប្ដីរូបនេះខ្លាំងពេក ទើបប្រពន្ធមិនព្រមឡើយ សុខចិត្តរស់នៅឲ្យបេះដូងកំព្រាល្អជាជាង ព្រោះជនកំហូចនេះមិនត្រឹមតែក្បត់ចិត្តប៉ុណ្ណោះទេ ថែមទាំងងប់ងុល និងល្បែងស៊ីសងបំផ្លាញអស់ទ្រព្យសម្បត្តិលុយកាក់នៅក្នុងផ្ទះទៀតផង ។
នគរបាលបានឲ្យដឹងបន្ថែមទៀតថា ដោយសារតែប្រពន្ធបដិសេធន៍ពុំព្រមទទួលយកវិញបែបនេះ ទើបក្លាយជាទំនាស់ហើយជននេះខឹងប្រពន្ធដាច់ក្បាលដាច់កន្ទុយតែម្ដង ហើយបានទិញទឹកអាស៊ីតត្រៀមទុករួចជាស្រេច ។ លុះដល់វេលាម៉ោង១០និង១៥នាទីយប់ ថ្ងៃទី២៨ ខែមីនា ឆ្នាំ២០២០ ជនដៃដល់រូបនេះបានយកទឹកអាស៊ីតទៅសម្ងំលាក់ខ្លួននៅក្បែរជណ្ដើរផ្ទះជួល ដែលប្រពន្ធស្នាក់នៅក្នុងភូមិត្រពាំងថ្លឹង១ សង្កាត់ចោមចៅទី១ ខណ្ឌពោធិ៍សែនជ័យ ។ ខណៈពេលជនរងគ្រោះដែលជាប្រពន្ធកំពុងដើរចេញពីធ្វើការឡើងលើជណ្ដើរផ្ទះជួលបាន២កាំប៉ុណ្ណោះ ជនសង្ស័យក៏បានយកទឹកអាស៊ីតចាក់ស្រោចលើបណ្ដាលឲ្យរងរបួសធ្ងន់ធ្ងរ ព្រមទាំងដណ្ដើមយកទូរស័ព្ទ១គ្រឿងថែមទៀត ។ ពេលនោះជនរងគ្រោះមានការឈឺចាប់យ៉ាងខ្លាំង និងបានស្រែកឲ្យអ្នកជិតខាងជួយបង្កការភ្ញាក់ផ្អើលទាំងយប់ ហើយជនកំណាចជាអតីតប្តីក៏បានរត់គេចខ្លួនបាត់ដោយសុវត្ថិភាព ។
នគរបាលបានបញ្ជាក់ថា ស្ត្រីរងគ្រោះរងរបួសយ៉ាងធ្ងន់ធ្ងរទាំងផ្ទៃមុខ និងខ្លួនប្រាណ ហើយភ្លាមៗនោះត្រូវបានអ្នកជិតខាងបញ្ជូនទៅកាន់មន្ទីរពេទ្យ ដើម្បីសង្គ្រោះបន្ទាន់ទាំងយប់ ។ ចំណែកកម្លាំងនគរបាលប៉ុស្តិ៍ចោមចៅទី១ និងនគរបាលផ្នែកព្រហ្មទណ្ឌនៃអធិការដ្ឋាននគរបាលខណ្ឌពោធិ៍សែនជ័យ ក៏បានចុះទៅធ្វើការស្រាវជ្រាវលើរឿងនេះ ព្រមទាំងស្វែងរកចាប់ខ្លួនជនដៃដល់រូបនេះដែរ ។
ប៉ុន្តែរកពុំឃើញ រហូតដល់ថ្ងៃទី២ ខែមិថុនា ឆ្នាំ២០២១ ទើបទទួលបានដំណឹងមកថា ជនសង្ស័យខាងលើកំពុងធ្វើចត្តាឡីស័កនៅភូមិ២ ឃុំកំពង់ទ្រាស ស្រុកក្រូចឆ្មារ ខេត្តត្បូងឃ្មុំ ទើបកម្លាំងនគរបាលខណ្ឌពោធិ៍សែនជ័យ ក៏ចុះទៅសហការណ៍ជាមួយកម្លាំងនគរបាលស្រុកក្រូចឆ្មារចាប់ខ្លួនជននោះ ៕
ចែករំលែកព័តមាននេះ