រាជធានីភ្នំពេញ ៖ បុរសម្នាក់បានចាញ់បោកអ្នកលក់ដូរតាមអនឡាញ ខណៈដែលគាត់កុម្ម៉ង់ទិញម៉ាស៊ីនចាក់ភ្លេង ចំនួន២គ្រឿង ត្រូវអ្នកលក់តម្រូវឲ្យបង់ប្រាក់មុន ទើបដឹកទំនិញឲ្យតាមក្រោយ លុះក្រោយពេលគាត់វេរលុយឲ្យរួច បានឃើញអ្នកលក់ដឹកអីវ៉ាន់ឲ្យមែន ។
ប៉ុន្តែគាត់អត់បានស្រាយមាត់ថង់ឆែកពិនិត្យមើលភ្លាមៗនៅ នឹងមុខអ្នកលក់នោះទេ លុះជននេះចាកចេញទៅបាត់ ទើបស្រាយមាត់ថង់មើល ស្រាប់តែហួសចិត្តនិយាយលែងចេញព្រោះនៅក្នុងនោះឃើញមានតែមីខ្លាឃ្មុំ២កេសប៉ុណ្ណោះ អត់មានម៉ាស៊ីនចាក់ភ្លេងឡើយ ។
បន្ទាប់ពីដឹងថា ចាញ់បោកអ្នកលក់បែបនេះ គាត់អត់មាត់.ក អ្វីទេ រួចបានបង្កើតអាខោនហ្វេសប៊ុកថ្មី១ទៀត រួចបានប្រើល្បិចធ្វើជារកទិញម៉ាស៊ីនចាក់ភ្លេង២គ្រឿងទៀតទើបចាប់ខ្លួនជនសង្ស័យខាងលើនោះបាន នាំយកទៅប្រគល់ជូននគរបាលចាត់ការតាមច្បាប់តែម្ដង ។
ការចាប់ខ្លួននោះបានធ្វើឡើង កាលពីវេលាម៉ោង១២ថ្ងៃត្រង់ ថ្ងៃទី១១ ខែមករា ឆ្នាំ២០២២ នៅតាមផ្លូវចោមចៅ ហៅផ្លូវវ៉េងស្រេង ត្រង់ចំណុចមុខក្រុមហ៊ុន ហុងដា ស្ថិតនៅក្នុងភូមិចោមចៅ២ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
បុរសដែលចាញ់បោកអ្នកលក់អនឡាញនោះ ឈ្មោះ ហង្ស វាសនា អាយុ៣៣ឆ្នាំ មុខរបរលក់រថយន្តផង និងជាតន្ត្រីករផងដែរ សព្វថ្ងៃមានទីលំនៅក្នុងភូមិព្រែកតាឡុង១ សង្កាត់ចាក់អង្រែក្រោម ខណ្ឌមានជ័យ ។ ដោយឡែកជនសង្ស័យខាងលើឈ្មោះ សុខ ហេង ភេទប្រុស អាយុ២១ឆ្នាំ មុខរបរលក់អីវ៉ាន់តាមអនឡាញ និងមានទីលំនៅភូមិឈូកវ៉ា១ សង្កាត់គោករកា ខណ្ឌព្រែកព្នៅ រាជធានីភ្នំពេញ ។
ជនរងគ្រោះបានទាមទារសំណងដែលខកខានមិនបានទៅលេងភ្លេងឲ្យគេចំនួន២៨០០ដុល្លារ និងលុយថ្លៃវេរទិញទំនិញមកទាំងអស់មកវិញផងដែរ ។
លោក ហង្ស វាសនា ដែលជាជនរងគ្រោះបានប្រាប់ឲ្យនគរបាលដឹងថា គាត់ត្រូវបានគេជួលឲ្យទៅប្រគុំតន្ត្រីនៅក្នុងកម្មវិធីនៅឯខេត្តត្បូងឃ្មុំ ហើយលោកត្រូវការម៉ាស៊ីនចាក់ភ្លេងទើបនៅវេលាព្រឹកថ្ងៃទី១០ ខែមករា ឆ្នាំ២០២២ លោកបានបញ្ជាទិញម៉ាស៊ីនចាក់ភ្លេងចំនួន២គ្រឿងពីជនសង្ស័យខាងលើ តាមអនឡាញ ។
ខណៈនោះ មានការចចារតម្លៃគ្នា ហើយជនសង្ស័យយល់ព្រមលក់ឡាយឡុងក្នុងតម្លៃ២០០ដុល្លារប៉ុណ្ណោះ រួចបានតម្រូវឲ្យលោកបង់លុយមុនទើបដឹកម៉ាស៊ីនចាក់ភ្លេងឲ្យតាមក្រោយ ហើយលោកក៏យល់ព្រមវេរលុយឲ្យតាមលក្ខខណ្ឌនេះ ។
តន្ត្រីកររូបនេះបាននិយាយបន្តទៀតថា បន្ទាប់មកជនសង្ស័យបានណាត់ជួបយកទំនិញនៅជិតសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញហើយក៏បានឃើញជននេះដឹកទៅឲ្យមែន ដោយច្រកនៅក្នុងថង់ពណ៌ខ្មៅចំនួន២ ។ ប៉ុន្តែក្រោយទទួលបានទំនិញរួច លោកអត់បានស្រាយមាត់ថង់បើកមើលនៅនឹងមុខជនសង្ស័យឈ្មោះ សុខ ហេង នេះភ្លាមៗឡើយ លុះជននេះចាកចេញទៅបាត់ទើបបើកមើល ស្រាប់តែហួសចិត្តយ៉ាងខ្លាំង ព្រោះតែអត់ឃើញម៉ាស៊ីនចាក់ភ្លេងសោះ តែបែរជាឃើញតែមីខ្លាឃ្មុំ២កេសទៅវិញ ។
បុរសនេះបានបញ្ជាក់ប្រាប់នគរបាលទៀតថា ខណៈនោះគាត់បានដឹងថាចាញ់បោកជនសង្ស័យ ប៉ុន្តែគាត់អត់ធ្មត់មិននិយាយអ្វីឲ្យជននោះច្រើនឡើយ ហើយក៏បានបង្កើតអាខោនហ្វេសប៊ុកផ្សេងមួយទៀត បន្ទាប់មកបានប្រើល្បិចឆាតទាក់ទងទៅទិញម៉ាស៊ីនចាក់ភ្លេងពីជនសង្ស័យ២គ្រឿងទៀត ព្រមទាំងវេលុយឲ្យមុន២០០ដុល្លារទៀត ។ ខណៈនោះជនសង្ស័យបានប្រាប់ឲ្យចាំទទួលយកអីវ៉ាន់នៅតាមផ្លូវវ៉េងស្រេង ត្រង់ចំណុចមុខក្រុមហ៊ុន ហុងដា ស្ថិតនៅក្នុងភូមិចោមចៅ២ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
លុះពេលឃើញជនសង្ស័យទៅដល់គាត់ក៏បានឃាត់ខ្លួន ហើយបើកមើលអីវ៉ាន់ក្នុងថង់ខ្មៅ ស្រាប់តែឃើញមីខ្លាឃ្មុំ២កេសដូចមុនទៀត ទើបនាំយកទៅប្រគល់ជូននគរបាលប៉ុស្តិ៍ចោមចៅទី៣ (ដោយសារសង្កាត់ចោមចៅទី២ ជនរងគ្រោះអត់ស្គាល់ ទើបនាំយកជនសង្ស័យទៅប៉ុស្តិ៍ទី៣តែម្តង) ឲ្យជួយចាត់ការ ប៉ុន្តែដោយសារតែទីតាំងឆបោក នៅសង្កាត់ចាក់អង្រែក្រោម ខណ្ឌមានជ័យ ទើបបញ្ជូនជននោះទៅកាន់ប៉ុស្តិ៍ចាក់អង្រែក្រោមចាត់ការបន្តវិញ ៕
ចែករំលែកព័តមាននេះ