មហាជនបានសម្តែងការភ្ញាក់ផ្អើល បន្ទាប់គេបានឃើញតារាកំប្លែងវ័យក្មេងស្រស់ស្អាត នីឡា បានប្រកាសជាសាធារណៈថា «ខ្លួនបានចូលសម្តែងកំប្លែងប្រមាណជា១០ឆ្នាំមកហើយ ប៉ុន្តែនៅមិនទាន់
រាជធានីភ្នំពេញ ៖ មហាជនបានសម្តែងការភ្ញាក់ផ្អើល បន្ទាប់គេបានឃើញតារាកំប្លែងវ័យក្មេងស្រស់ស្អាត នីឡា បានប្រកាសជាសាធារណៈថា «ខ្លួនបានចូលសម្តែងកំប្លែងប្រមាណជា១០ឆ្នាំមកហើយ ប៉ុន្តែនៅមិនទាន់អាចក្លាយជាបុគ្គលិកពេញសិទ្ធិនៅស្ថានីយទូរទស្សន៍ CTN នៅឡើយទេ ខណៈពេលក្រុមកំប្លែងរួមក្រុមខ្លះបានចូលពេញសិទ្ធិទៅហើយ»។
បើយោងតាមអ្វីដែលស្រីស្អាត នីឡា បានសរសេរបង្ហោះតាមហ្វេសប៊ុកអមជាមួយនឹងរូបភាពចាស់ៗដែលបានសម្តែងពីមុនៗនោះ បានបញ្ជាក់ថា បានចូលលេងកំប្លែងតាំងពីឆ្នាំ២០១១ រហូតដល់ឆ្នាំ២០២២ គឺធ្វើការបាន១០ឆ្នាំមកហើយ នៅតែមិនទាន់បានក្លាយជាបុគ្គលិកពេញសិទ្ធិទៀត។
តាមរយៈសារខាងលើនេះ បានធ្វើមហាជន ជាពិសេសអ្នកគាំទ្រស្រីស្អាត នីឡា មួយចំនួន បានសម្តែងការងឿឆ្ងល់អំពីមូលហេតុអ្វីដែលជាឧបសគ្គធ្វើឲ្យតារារូបនេះ មិនអាចក្លាយជាបុគ្គលិកពេញសិទ្ធិនៅស្ថានីយទូរទស្សន៍នេះបាន ខណៈពេលដែលស្រីស្អាត នីឡា បានបង្ហាញខ្លួនសម្តែងផ្តាច់តែនៅ CTN តែមួយនោះ។
យ៉ាងណាពាក់ព័ន្ធបញ្ហាខាងលើនេះ ឪពុករបស់ស្រីស្អាត នីឡា គឺលោក សុវណ្ណរិទ្ធី ហៅតាវ៉ិចទ័រ បានអះអាងប្រាប់កោះសន្តិភាពតាមសារអេឡិចត្រូនិចនៅថ្ងៃនេះថា «នេះជារឿងពិត ដោយសាររហូតមកទល់នាពេលនេះ កូនស្រីរបស់លោកនៅមិនទាន់ក្លាយជាបុគ្គលិកពេញសិទ្ធិរបស់ CTN នៅឡើយទេ»។
លោកបញ្ជាក់ថា «មូលហេតុដែល នីឡា នៅមិនទាន់អាចក្លាយជាបុគ្គលិកពេញសិទ្ធិ ព្រោះគណៈគ្រប់គ្រងរបស់ស្ថានីយនៅតែមិនទាន់មានកន្លែងចន្លោះសម្រាប់បញ្ចូលឈ្មោះកូនស្រីរបស់លោកឲ្យក្លាយជាបុគ្គលិកពេញសិទ្ធិ ពោលគឺត្រូវង់ងចាំបន្តទៀតសិន»។
ទោះជាយ៉ាងណាក៏ដោយ បើតាមលោក សុវណ្ណ រិទ្ធី បានបន្តថា ការដែល នីឡា មិនទាន់ក្លាយជាបុគ្គលិកពេញសិទ្ធិនោះ ក៏ជាការល្អប្រសើរមួយដែរ ព្រោះយើងអាចស្វែងរកការងារខាងក្រៅធ្វើបានច្រើន ដែលនោះក៏ជាឱកាសម្រាប់ការរកប្រាក់ចំណូលពីការសម្តែងនេះផងដែរ»។
លោកបន្ថែមថា «កាលណាបើយើងជាបុគ្គលិកពេញសិទ្ធិនោះ យើងបានស៊ីប្រាក់ខែ តែបើមិនទាន់ពេញសិទ្ធិ គឺលោកអាចបានចំណូលពីការសម្តែងម្តងៗ ហើយយើងក៏មានឱកាសច្រើនសម្រាប់ស្វែងរកការងារខាងក្រៅសម្រាប់ធ្វើបានច្រើននោះ ក៏ជាការល្អមួយដែរ»។
លោក សុវណ្ណ រិទ្ធី បានលើកឡើងបន្ថែមថា «សម្រាប់ក្រុមកំប្លែងរបស់លោក គឺមានសមាជិកប្រមាណ៧ទៅ៨នាក់ប៉ុណ្ណោះ ដែលបានក្លាយជាបុគ្គលិកពេញសិទ្ធិ និងបានទទួលប្រាក់ប្រចាំខែពីក្រុមហ៊ុន ក្រៅពីនោះគឺនៅមិនទាន់ក្លាយជាបុគ្គលិកពេញសិទ្ធិដូចគ្នា»។
ជាការកត់សម្គាល់ បច្ចុប្បន្នក្រៅពីការលេងកំប្លែងនៅស្ថានីយទូរទស្សន៍ CTN នីឡា ក៏បានចាប់ជំនាញច្រៀងកាត់សក់ការផងដែរ ដែលអាជីពថ្មីរបស់នាងនាពេលនេះក៏មានការកាក់កបគ្រាន់បើផងដែរ បើប្រៀបធៀបទៅនឹងការសម្តែងកំប្លែងរបស់នាង។
លោកតា វ៉ិចទ័រ បញ្ជាក់ថា តាមពិតជំនាញកាត់សក់ការនេះ នីឡា កូនស្រីលោកបានហាត់រៀនចេះមកជាយូរហើយ ពោលគឺតាំងពីនាងមានអាយុប្រមាណ១០ឆ្នាំមកម្ល៉េះ នៅក្នុងនោះកូនស្រីរបស់លោកបានហាត់រៀនជំនាញនេះ ពីតារាកំប្លែងជើងចាស់មួយចំនួនទៀតផង៕
ចែករំលែកព័តមាននេះ