រាជធានីភ្នំពេញ ៖ ប្រធានក្រុមប្រឹក្សាភិបាលសមាគមមៀនប៉ៃលិន តំណាងឱ្យកសិករដាំដុះមៀនប៉ៃលិន ឱ្យដឹងថា ដំណឹងស្តីពីការនាំមៀនប៉ៃលិនទៅប្រទេសចិន ធ្វើឱ្យអ្នកដាំមៀនសប្បាយចិត្ត ប៉ុន្តែទីផ្សារចិន នេះនៅមិនទាន់បានកំណត់ថា អាចនាំចេញបាននៅពេលណានោះទេ…
រាជធានីភ្នំពេញ ៖ ប្រធានក្រុមប្រឹក្សាភិបាលសមាគមមៀនប៉ៃលិន តំណាងឱ្យកសិករដាំដុះមៀនប៉ៃលិន ឱ្យដឹងថា ដំណឹងស្តីពីការនាំមៀនប៉ៃលិនទៅប្រទេសចិន ធ្វើឱ្យអ្នកដាំមៀនសប្បាយចិត្ត ប៉ុន្តែទីផ្សារចិន នេះនៅមិនទាន់បានកំណត់ថា អាចនាំចេញបាននៅពេលណានោះទេ ។ រហូតមកដល់ពេលនេះកសិករនៅតែមានក្តីព្រួយបារម្ភពីទីផ្សារនៅឡើយ ។
«បច្ចុប្បន្ននេះកសិកររួមនិងសមាជិសហគមន៍មួយចំនួនខិតខំថែទាំ និងធ្វើការដាំដុះមៀនប៉ៃលិនរៀងៗខ្លួនទៅតាមរដូវកាល ។យើងសង្ឃឹមថា ដល់រដូវប្រមូលផលពេលក្រោយអាចនាំចេញទៅប្រទេសចិនបាន ។ មកដល់ខែមករា ឆ្នាំ ២០២២ នេះតម្លៃផ្លែមៀននៅក្នុងស្រុកគឺពួកឈ្មួញកណ្តាលទទួលទិញពីកសិករតែ ១០០០ រៀល ក្នុងមួយគីឡូក្រាម ធ្វើឱ្យកសិករដាំដុះមៀនប៉ៃលិនរងការខាតបង់ប្រាក់ស្ទើរតែគ្រប់គ្នា» នេះបើតាមការបញ្ជាក់របស់លោក ស្រេង ស្រៀង ប្រធានក្រុមប្រឹក្សាភិបាលសមាគម មៀនប៉ៃលិន ។
មៀនប៉ៃលិនកន្លងមកបានលក់ចេញឱ្យឈ្មួញនាំទៅប្រទេសថៃ ហើយឈ្មួញថៃបន្តនាំចេញទៅប្រទេសចិន ។ កាលពីឆ្នាំ ២០២១កន្លងមកនេះដោយសារជំងឺកូវីដ ១៩ ឈ្មួញថៃ មិនទទួលទិញមៀនប៉ៃលិនដូចទម្លាប់ឡើយ បានធ្វើឱ្យកសិករអ្នកដាំមៀនខាតបង់ថវិកាជាច្រើន ។ មៀនខូចខាតស្ទើរពាក់កណ្តាលក្នុងចំណោមផ្លែមៀនសរុបប្រចាំឆ្នាំពី ៤ ម៉ឺនទៅ ៥ ម៉ឺនតោនបានខូចខាត ។
លោក ស្រេង ស្រៀង ថា តម្លៃផ្លែមៀននៅលើទីផ្សារបើអាចលក់បាន ៣០ បាតថៃ ឬស្មើប្រមាណជាង ៣០០០ រៀលក្នុងមួយគីឡូក្រាម អាចជួយឱ្យកសិកររស់ និងមានសង្ឃឹមបានខ្លះ តែបើតម្លៃផ្លែមៀនលក់បានតែជាង ១០០០ ទៅ ២០០០ រៀលនេះកសិករប្រឈមការខាតបង់ហើយ ។ បើនៅពេលខាងមុខផ្លែមៀនប៉ៃលិនអាចនាំចេញត្រង់ទៅចិនបានវាជួយឱ្យទីផ្សារក្នុងស្រុកប្រសើរ ។
កាលពីថ្ងៃទី ៤ ដល់ ៦ ខែមករា ឆ្នាំ ២០២២ កន្លងមកនេះរដ្ឋបាលគយប្រទេសចិន បានធ្វើការវិភាគហានិភ័យ និងការត្រួតពិនិត្យផ្លែមៀនកម្ពុជាតាមរយៈវីដេអូ មុននឹងសម្រេចធ្វើការនាំចូលមៀនប៉ៃលិនទៅប្រទេសខ្លួន ប៉ុន្តែដំណឹងលម្អិតជាងនេះកសិករនៅមិនទាន់ទទួលនៅឡើយទេ ។
ប្រធានក្រុមប្រឹក្សាភិបាលសមាគមមៀនប៉ៃលិនបានទទួចឱ្យអ្នកដាំមៀនប៉ៃលិន ពង្រឹងសុវត្ថិភាពកសិផលរបស់ខ្លួនឆ្លើយតបទៅតាមស្តង់ដារបស់ប្រទេសចិន ។ លោកថា បើមិនអាចធ្វើបានទេនោះ វាជាហានិភ័យណាស់ចំពោះកសិករ ៕
ចែករំលែកព័តមាននេះ