មនុស្សម្នាកំពុងតែតាមដានថា តើនឹងមានអ្វីកើតឡើងនៅលើពិភពលោក ដោយសារតែប្រជាជនអង់គ្លេសសម្រេចចេញពីសហភាពអឺរ៉ុប ។ ផលប៉ះពាល់ដំបូងបានចាប់ផ្តើម ធ្វើឱ្យរង្គើដល់ពិភពលោកទាំងមូល នៅពេលរញ្ជួយដីបានកើតឡើងនៅចក្រភពអង់គ្លេស ដែលប្រជាជនភាគច្រើន បានសម្រេចចិត្តដើរចេញពីសហភាពអឺរ៉ុប ។
តម្លៃភាគហ៊ុនទាំងអស់ បានធ្លាក់ដោយសារតែការសម្រេចចិត្តរបស់ប្រជាជនអង់គ្លេស ។ ប៉ុន្តែការព្រួយបារម្ភរឹតតែខ្លាំងនោះ គឺថាតើនឹងមានប្រទេសផ្សេងៗទៀត ចាកចេញពីសហភាពអឺរ៉ុបដែរឬទេ?
សហភាពអឺរ៉ុបដ៏បែកខ្ចាយមួយ អាចនឹងនាំដល់ផលប៉ះពាល់ដល់ប្រទេសកម្ពុជាយើង ដោយសារតែសហភាពអឺរ៉ុប គឺជាម្ចាស់ជំនួយដ៏សំខាន់របស់កម្ពុជា និងជាទីផ្សារ សម្រាប់ផលិតផលនាំចេញរបស់កម្ពុជា ពិសេសឧស្សាហកម្មផ្នែកសម្លៀកបំពាក់ ។
នៅឆ្នាំ២០១៤ ប្រទេសកម្ពុជាបាននាំចេញសម្លៀកបំពាក់ ទៅសហភាពអឺរ៉ុបជាង២.២០០លានដុល្លារ ក្នុងនាមជាទីផ្សារធំបំផុតរបស់កម្ពុជា ។
កម្ពុជាអាចនឹងបាត់បង់ជំនួយខ្លះ ព្រមទាំងបាត់បង់ទីផ្សារ សម្រាប់ការនាំចេញរបស់ខ្លួន បើសិនជាស្ថានភាពនៅសហភាពអឺរ៉ុបកាន់តែធ្ងន់ធ្ងរ ។
បើសិនជាការបញ្ជាទិញផ្នែកសម្លៀកបំពាក់ធ្លាក់ចុះនោះ វានឹងធ្វើឱ្យរោងចក្រកាត់ដេរមួយចំនួនត្រូវបិទទ្វារ ។ ចំណែកកម្មករមួយចំនួនអាចនឹងបាត់បង់ការងារ ។
ដូច្នេះ កម្ពុជាអាចនឹងរងផលប៉ះពាល់ច្រើនផងដែរ នៅពេលដែលមានការរង្គោះរង្គើ នៅសហភាពអឺរ៉ុបតាមរយ:ការដើរចេញរបស់ចក្រភពអង់គ្លេស ឬក៏អាចនឹងមានប្រទេសផ្សេងទៀត ដែលដើរចេញពីសហភាពអឺរ៉ុប ។
ឥឡូវ ភ្នែកពិភពលោកទាំងមូល កំពុងតែតាមដានចំពោះអ្វីដែលកើតមាននៅចក្រភពអង់គ្លេស ព្រមទាំងតំបន់អឺរ៉ុបទាំងមូល ៕
ចែករំលែកព័តមាននេះ