រាជធានីភ្នំពេញ ៖ ក្រុមតន្ត្រីដ៏ល្បីល្បាញរបស់ប្រទេសអ៉ីតាលី Andrea Borcelli គ្រោងនឹងមកសម្តែងតន្ត្រីនៅខេត្តសៀមរាប ទឹកដីអង្គរ ក្នុងខែមេសា ឆ្នាំ ២០២២ ខាងមុខនេះ ។ វត្តមានតារាអន្តរជាតិនេះ ត្រូវគេរំពឹងថា នឹងបានរួមចំណែកយ៉ាងសំខាន់ដល់ការផ្សព្វផ្សាយ និងទាក់ទាញភ្ញៀវទេសចរ និងវិនិយោគិនបរទេសមកកាន់ប្រទេសកម្ពុជា ។
ក្រុមតន្ត្រីដ៏ល្បីល្បាញរបស់ប្រទេសអ៊ីតាលី Andrea Borcelli បានជួបជាមួយលោក សុខ សុក្រឹត្យា រដ្ឋលេខាធិការក្រសួងទេសចរណ៍ នៅទីក្រុងបាងកកប្រទេសថៃកាលពីពេលថ្មីៗនេះ ។ លោក សុខ សុក្រឹត្យា បានបញ្ជាក់ថា ដើម្បីផ្សព្វផ្សាយ និងជាគោលដៅអូសទាញភ្ញៀវទេសចរ និងវិនិយោគិនអន្តរជាតិមកកម្ពុជា លោកបានស្នើក្រុមតន្ត្រីដ៏ល្បីល្បាញលើសកលលោកមួយនេះមកសម្តែងនៅខេត្តសៀមរាប ហើយគេបានទទួលតាមការអញ្ជើញនោះ ។
មន្ត្រីជាន់ខ្ពស់ក្រសួងទេសចរណ៍ចាត់ទុកការប្រគំតន្ត្រីរបស់ក្រុមតន្ត្រី Adrea Borcelli នៅខេត្តសៀមរាបក្នុងខែមេសានោះ គឺជាព្រឹត្តិការណ៍អន្តរជាតិ មិនធ្លាប់មាននាពេលកន្លងមក សម្រាប់ប្រទេសកម្ពុជា ។
សូមជម្រាបថា ក្រុមតន្ត្រី Andrea Borcelli គឺជាក្រុមតន្ត្រីដ៍ល្បីល្បាញខ្នាតអន្តរជាតិរបស់ប្រទេសអ៊ីតាលី ខណៈដែលតារាចម្រៀង Andrea Borcelli ដែលជាជនពិកាកើតថ្ងៃទី ២២ ខែកញ្ញា ឆ្នាំ ១៩៥៨ ក្នុងត្រកូលកសិករនៃប្រទេសអ៊ីតាលី ។ បទចម្រៀងរបស់ Anrea Borcelli ដែលល្បីល្បាញបំផុតក្នុងឆ្នាំ ១៩៩៩ គឺបទ “The Prayer” ដែលច្រៀងរួមគ្នាជាមួយ Celine Dion ហើយទទួលបានពានរង្វាន់ Golden Globe សម្រាប់ចម្រៀងដើមល្អបំផុត ។ គាត់គឺជាតារាចម្រៀងដែលត្រូវពិការភ្នែកតាំងពីអាយុ ១២ ឆ្នាំដោយឧបទ្ទវហេតុ ។ យ៉ាងណាក៏ដោយគាត់បានសាងភាពល្បីល្បាញជាបន្តបន្ទាប់រហូតមានឈ្មោះបោះសំឡេងហើយល្បីទូទាំងពិភពលោកតែម្តង ៕
ចែករំលែកព័តមាននេះ