ខេត្តកណ្ដាល ៖ អ្នកស្រុកបានផ្តល់ដំណឹង កាលពីព្រឹកថ្ងៃទី១០ ខែមករា ឆ្នាំ២០២២ថា មានសង្វៀនបញ្ជល់មាន់មួយកន្លែងបើកលេងយ៉ាងគគ្រឹកគគ្រេងរាល់សប្តាហ៍ និងលេងបានយ៉ាងរលូនដោយមិនក្រែងញញើតសមត្ថកិច្ចមូលដ្ឋានសោះឡើយ ។ ទីតាំងសង្វៀននេះ ស្ថិតនៅភូមិសិត្បូ សង្កាត់សិត្បូ ក្រុងតាខ្មៅ ។
ម្ចាស់ទីតាំងត្រូវបានគេស្គាល់ថា ឈ្មោះ វៃ និងអាជ្ញាកណ្តាលបញ្ជល់មាន់ឈ្មោះ យ៉ា ។
អ្នកស្រុកលើកឡើងទៀតថា រៀងរាល់សប្តាហ៍ ក្រុមអ្នកញៀនល្បែងប្រមូលផ្តុំគ្នាណាត់គ្នាស្ពាយមាន់យ៉ាងចេញមុខ នាំគ្នាទៅបញ្ជល់ជាមួយនឹងការស្រែកហ៊ោកញ្ជ្រៀវអឺងកង ហាក់មិនក្រែងញញើតសមត្ថកិច្ចមូលដ្ឋានទាល់តែសោះ ។
ពួកគាត់បន្ថែមទៀតថា ហេតុអ្វីបានជាក្រុមអ្នកញៀនល្បែងបញ្ជល់មាន់ បើកលេងបានយ៉ាងរលូនបែបនេះ ឬក៏មានអី្វជាអាថ៌កំបាំង ?
ដោយឡែក ប៉ុស្តិ៍នគរបាលរដ្ឋបាលសិត្បូទើបតែមានការផ្លាស់ប្តូរនាយប៉ុស្តិ៍មកកាន់តំណែងថ្មីផង គឺវរសេនីយ៍ ស៊ាង រិទ្ធី ។ ពួកគាត់សង្ឃឹមថា លោកនាយប៉ុស្តិ៍ថ្មីនឹងបង្ក្រាបករណីនេះជាមិនខាន ដើម្បីភាពកក់ក្តៅរបស់ប្រជាពលរដ្ឋ និងធ្វើឱ្យភូមិ-ឃុំមានសុវត្ថិភាព ៕
ចែករំលែកព័តមាននេះ