ចិនបើកឡានបុករទះលក់ប្រហិត ក្រឡាប់របួសធ្ងន់ស្រាល៤នាក់
- ភ្នំពេញ
រាជធានីភ្នំពេញ ៖ ឧប្បត្តិហេតុគ្រោះថ្នាក់ចរាចរណ៍មួយបង្កឡើងដោយបុរសជនជាតិចិនម្នាក់បានបើករថយន្ត១គ្រឿងជ្រុលទៅ
រាជធានីភ្នំពេញ ៖ ឧប្បត្តិហេតុគ្រោះថ្នាក់ចរាចរណ៍មួយបង្កឡើងដោយបុរសជនជាតិចិនម្នាក់បានបើករថយន្ត១គ្រឿងជ្រុលទៅបុកម៉ូតូសណ្ដោងរ៉ឺម៉កលក់ប្រហិតពីក្រោយ បណ្ដាលឲ្យក្រឡាប់ ហើយអ្នកបើកបរម៉ូតូសណ្ដោងរ៉ឺម៉កលក់ប្រហិតនិងអ្នកដំណើរសរុបចំនួន៤នាក់បានរងរបួសធ្ងន់និងស្រាល ។
ហេតុការណ៍ខាងលើនេះបានកើតឡើងកាលពីវេលាម៉ោង២និង២០នាទីរសៀលថ្ងៃទី១០ ខែមករា ឆ្នាំ២០២២ នៅតាមផ្លូវវ៉េងស្រេង ស្ថិតនៅក្នុងភូមិត្រពាំងថ្លឹងសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានបានឲ្យដឹងថា នៅមុនពេលកើតហេតុ គេបានឃើញម៉ូតូសណ្ដោងរ៉ឺម៉កលក់ប្រហិតខាងលើបើកបរដោយបុរសម្នាក់ហើយមានប្រពន្ធជិះជាមួយម្នាក់ទៀតផងដែរ បានធ្វើដំណើរក្នុងទិសដៅពីកើតទៅលិច លុះពេលទៅដល់ត្រង់ចំណុចកើតហេតុ ស្រាប់តែមានរថយន្តមួយគ្រឿងពាក់ស្លាកលេខ ភ្នំពេញ 2AS-7067 បើកបរដោយបុរសជាជនជាតិចិនម្នាក់និងមានអ្នករួមដំណើរម្នាក់ទៀតធ្វើដំណើរក្នុងទិសដៅស្របគ្នាទៅដល់បុកពីក្រោយយ៉ាងពេញទំហឹង បណ្ដាលឲ្យក្រឡាប់ខ្ទាតត្រូវអ្នកថ្មើរជើងពីរនាក់ទៀត ។
តាមប្រភពដដែលបានបន្តថា ខណៈនោះបានបណ្ដាលឲ្យអ្នកលក់ប្រហិតទាំង២នាក់ប្ដីប្រពន្ធ រួមទាំងអ្នកដំណើរផ្សេងទៀតសរុប៤នាក់ រងរបួសធ្ងន់និងស្រាល ហើយត្រូវបានបញ្ជូនទៅសង្គ្រោះភ្លាមៗ។
ក្រោយពេលកើតហេតុ នគរបាលចរាចរណ៍នៃអធិការដ្ឋាននគរបាលខណ្ឌពោធិ៍សែនជ័យបានចុះទៅធ្វើការវាស់វែង នាំយករថយន្តនុងម៉ូតូសណ្ដោងរ៉ឺម៉កលក់ប្រហិតទៅរក្សាទុក ដើម្បីរង់ចាំធ្វើការដោះស្រាយនៅពេលក្រោយ៕
ចែករំលែកព័តមាននេះ