រាជធានីភ្នំពេញ ៖ កញ្ញាដេនី ខ្វាន់ តារាសិចស៊ី ទើបតែបានតំណែងជាតួអង្គសម្តែងក្នុងខ្សែភាពយន្តខ្នាតធំលើកទីមួយ ។
ដេនី ខ្វាន់ ចូលរួមសម្តែងក្នុងខ្សែភាពយន្តបែបកំប្លែង និងភ័យរន្ធត់រឿង «ផ្ទះចិញ្ចឹមខ្មោច» របស់ផលិតកម្ម«Wonder Film Cambodia»។ ពិធីក្រុងពលីបើកដំណើរការថតខ្សែភាពយន្តនោះកាលពីថ្ងៃទី២០ ខែមិថុនា ឆ្នាំ២០១៦ ។ ក្នុងខ្សែភាពយន្តនោះចូលរួមសម្តែងដោយតារាកំប្លែងនាយគ្រឿន, លោកប៊ីអាយជី, លោកប៉ីប៉ីឌី, កញ្ញាដេនី ខ្វាន់, លោក Cool Sool, លោកគឹម សាន និងកញ្ញាលីង លីងជាដើម ។
ដេនី ខ្វាន់ មួយរយៈចុងក្រោយនេះមិនសូវមមាញឹកនឹងការងារសិល្បៈទេ គឺមានតែការងារជំនួញមួយចំនួនរបស់នាង ។ ចំពោះខ្សែភាពយន្ត«ផ្ទះចិញ្ចឹមខ្មោច» ក្លាយជាខ្សែភាពយន្តខ្នាតធំដំបូងដែលដេនី ខ្វាន់ចូលរួមសម្តែង ដោយកន្លងមកនាងធ្លាប់សម្តែងតែក្នុងបទចម្រៀងខារ៉ាអូខេ និងខ្សែរឿងភាគប៉ុណ្ណោះ ។ សម្រាប់រឿង «ផ្ទះចិញ្ចឹមខ្មោច» ដេនី ខ្វាន់ តាំងចិត្តខិតខំសម្តែងឲ្យអស់ពីសមត្ថភាព ។ ក្នុងខ្សែភាពយន្តនោះដេនី ខ្វាន់ សម្តែងជាតួស្រីមានចរិតអង់អាចក្លាហាន មិនខ្លាចខ្មោច បិសាចអ្វីទាំងអស់ ។ «មិនមានឈុតឆាកសិចស៊ីណាមួយនោះទេនៅក្នុងខ្សែភាពយន្តនេះ ហើយនាងខ្ញុំរំពឹងថា បញ្ហាមួយចំនួនដែលកើតមានកន្លងមកនឹងមិនធ្វើឲ្យប៉ះពាល់ដល់ប្រជាប្រិយភាព និងការសម្តែងក្នុងខ្សែភាពយន្តនោះទេ ។ លើសពីនេះនាងខ្ញុំមិនថតឡើយរឿងណាដែលបញ្ចេញភាពអាសអាភាសពេញផ្ទៃរឿង ឱបថើបបញ្ចេញគល់ទ្រូងស្ទើរតែស្រាត គឺមិនថតឡើយ បើទោះបីនោះជាភាពយន្ត ហើយមានតារា ល្បីៗមួយចំនួនគាត់ហ៊ានថតក៏ដោយ ក៏នាងខ្ញុំមិនថតទេ ព្រោះនាងខ្ញុំឆើតឆាយតែក្រៅឆាក បើក្នុងលក្ខណៈបែបសម្តែងគឺមិនថតទេនាំឲ្យមានការរិះគន់ » ។ សម្តីដេនី ខ្វាន់ ។
តារាសម្តែងជើងចាស់លោកសែម វិសាល និងជាចាងហ្វាងផលិតកម្ម «Wonder Film Cambodia» ភាពយន្តបញ្ជាក់ថា នេះជារឿងទី២ដែលលោកផលិតឡើងបន្ទាប់ពីរឿង «ប្រាសាទអាថ៌កំបាំង» ជាស្នាដៃទីមួយដែលលោកផលិតក្នុងន័យស្ទាបស្ទង់ទីផ្សារ ។
រឿង «ផ្ទះចិញ្ចឹមខ្មោច» គ្រោងចំណាយទុនច្រើនដោយសារតែរឿងទាំងមូលពាក់ព័ន្ធមន្តអាគម អថ័ន ខ្មោច បិសាច និងតម្រូវឱ្យរៀបចំដេគ័រឆាកថ្មីសុទ្ធសាធ ដើម្បីឱ្យសមជាឈុតឆាកពាក់ព័ន្ធនឹងខ្មោច បិសាច ។ ចំណាយពេលផលិតរយៈពេល៦ខែរឿង «ផ្ទះចិញ្ចឹមខ្មោច» នឹងចាក់បញ្ចាំងនាចុងឆ្នាំ២០១៦ ឬដើមឆ្នាំ២០១៧។ រឿង «ផ្ទះចិញ្ចឹមខ្មោច» ចេញពីខួរក្បាល និងទេពកោសល្យខ្មែរ មិនចម្លងពីបរទេសទេ ។
ចំពោះការជ្រើសរើសនាងដេនី ខ្វាន់ ចូលរួមសម្តែងជាតួអង្គសំខាន់មួយក្នុងខ្សែភាពយន្តរឿង«ផ្ទះចិញ្ចឹមខ្មោច» លោកសែម វិសាល បញ្ជាក់ថា លោកបានទាក់ទងនាងឱ្យចូលរួមសម្តែងតាំងពីមុនពេលនាងរងការរិះគន់ខ្លាំងរឿងស្លៀកពាក់សិចស៊ីម៉្លេះ ។
លោកសែម វិសាល មិនព្រួយបារម្ភខ្សែភាពយន្តរបស់លោកមិនទទួលបានការគាំទ្រដោយវត្តមានដេនី ខ្វាន់ទេ ព្រោះយល់ថាវាគឺជារឿងពីរផ្សេងគ្នា ។ ម្យ៉ាងដេនី ខ្វាន់ បានសុំទោសជាសាធារណៈរួចហើយ ៕
ចែករំលែកព័តមាននេះ